الماتىداعى دوستىق ۇيىندە قالامگەرلەر قاۋىمىمەن كەزدەسكەن پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا ەلىمىزدىڭ باي ادەبي مۇراسىن الەم حالقىنا تانىتۋدا بۇل باستامانىڭ ورنى ايرىقشا ەكەنىن ايتىپ, «رۋحاني جاڭعىرۋ» باعدارلاماسى بويىنشا جىل كولەمىندە اتقارىلعان جۇمىستاردىڭ ناتيجەسىنە توقتالدى.
– جۋىردا عانا 100 وقۋلىق جوباسىنىڭ نەگىزىندە اۋدارىلعان 18 كىتاپتىڭ تۇساۋى كەسىلدى. ەكىنشى كەزەڭدە تاعى دا 30 كىتاپ اۋدارىلۋعا دايىن. بۇل حالقىمىزدىڭ ءبىلىم كوكجيەگىنىڭ كەڭەيۋىنە عانا ەمەس, مەملەكەتتىك ءتىلىمىزدىڭ مارتەبەسىن كوتەرۋگە دە ىقپال بولعان يگى باستاما دەپ ەسەپتەيمىز. «جاھانداعى زاماناۋي قازاقستاندىق مادەنيەت» جوباسى اياسىندا تۇڭعىش رەت تاۋەلسىزدىك داۋىرىندەگى بۇكىل ونەر توپتالىپ, تۇگەندەلىپ ءتىزىمى جاسالدى. ەندىگى كەزەكتە 500-گە جۋىق ىرگەلى شىعارمانى ىرىكتەپ, الەمدىك نارىققا ناسيحاتتاۋعا كىرىسپەكپىز. ەلباسى ايتقانداي قوعامدىق سانانى جاڭعىرتىپ, ونى تۇبەگەيلى وزگەرتۋدە زيالى قاۋىم وكىلدەرىنىڭ ۇلكەن جاۋاپكەرشىلىگى جاتىر. سوندىقتان باعدارلامانىڭ ەكىنشى كەزەڭىندە قازاقستان جازۋشىلار وداعى باستاعان قالامگەرلەر قاۋىمىمەن بىرلەسە جۇمىس ىستەيمىز دەگەن ويدامىز. ءتول مادەنيەتىمىز بەن ادەبيەتىمىزدى الەمگە ايگىلەۋ ءۇشىن قازاقستاندىق پروزا مەن پوەزيا انتولوگياسىن قۇراستىرىپ, ولاردى اعىلشىن, فرانتسۋز, يسپان, قىتاي جانە ورىس تىلدەرىنە اۋدارۋ ءىسىن قولعا الدىق. بۇل جاي عانا جالاڭ اۋدارما جاساپ كىتاپ شىعارۋ دەگەن ماقسات ەمەس. ماقساتىمىز مادەنيەت سالاسىنداعى حالىقارالىق قارىم-قاتىناستاردى نىعايتۋ, ونىڭ اۋقىمىن كەڭەيتۋ, ادەبيەتىمىزدى الەمدىك نارىققا شىعارىپ دۇنيەجۇزىنە تانىستىرۋ, – دەيدى ايدا بالاەۆا.
الەمنىڭ ءار قيىرىنا تارايتىن قازاق پروزاسى مەن پوەزياسى انتولوگياسىنا 30 اقىن مەن 30 جازۋشىنىڭ تاۋەلسىزدىك داۋىرىندە جازىلعان وتتى شىعارمالارى ەنبەك. ازىرگە ەڭبەگى جيناققا ەنەتىن قالامگەرلەردىڭ ءتىزىمى انىقتالۋدا. زيالى قاۋىم وكىلدەرىنىڭ سوزىنشە, شەت تىلدەرىنە اۋدارىلاتىن شىعارمالار قازاق ادەبيەتىنىڭ بيىك ورەسىن تانىتاتىن شوقتىعى بيىك تۋىندىلار بولۋعا ءتيىس. باسقوسۋ بارىسىندا اقىن-جازۋشىلار تاراپىنان وسىعان قاتىستى ناقتى ۇسىنىس پىكىرلەر دە ايتىلماي قالعان جوق.
ءوز كەزەگىندە قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت جوبانى ويداعىداي جۇزەگە اسىرۋ بارشاعا ورتاق مىندەت ەكەنىن جەتكىزىپ, ۇلت ادەبيەتىنە تانىتقان جاناشىرلىعى مەن قولداۋى ءۇشىن پرەزيدەنت اكىمشىلىگىنە بارشا قالامگەرلەر اتىنان العىس سەزىمىن ءبىلدىردى.
ارمان وكتيابر,
«ەگەمەن قازاقستان»
المات
