قازاق تەاترىنىڭ ورتا تولقىنىندا ءانۋار بورانباەۆتىڭ ورنى دا, ەڭبەگى دە ەرەكشە بولاتىن. ساحنادا ابايدان باستاپ, «ايمان-شولپانداعى» ارىستان, «قاراكوزدەگى» سىرىم, «قوبىلاندىداعى» ءبىرسىمباي, «ەڭلىك-كەبەكتەگى» كەمباي, ۋ.شەكسپيردىڭ «اساۋعا – تۇساۋىنداعى» ليۋچەنتسيو, «قان مەن تەردە» ەلامان, «اق كەمەدە» مومىن شال, «انا – جەر-انادا» مايسالبەك سياقتى كوپتەگەن رولدەرىن جوعارى كوركەمدىكپەن سومداعان ەدى. ال كينودا باسقاسىن ايتپاعاندا, ءبىر «گاۋھارتاستاعى» تاستاننىڭ ءوزى اكتەردىڭ اتىن قازاق كينوسى تاريحىندا قالدىردى.
امانگەلدى اۋدانىنىڭ 90 جىلدىعىنا جانە بيىل ءانۋار بورانباەۆتىڭ تۋعانىنا 70 جىل تولۋىنا وراي اۋداندىق كىتاپحانانىڭ وبلىس ورتالىعىنداعى كۇندەرى شەڭبەرىندە جەرلەستەرى اكتەردىڭ ەسكە الۋ كەشىنە جينالدى. وعان ءانۋاردىڭ تالانتىن ەرەكشە باعالايتىن كورەرمەندەرىمەن قاتار, امانگەلدىدەن, استانادان تۋىستارى مەن جارى, سىنىپتاستارى كەلدى. اكتەردىڭ ءومىرى مەن شىعارماشىلىعىنا ارنالعان كورمە تۇسىندا كورەرمەن كوپ كىدىردى. كەشكە جينالعاندار ءانۋاردىڭ تۇتىنعان بۇيىمدارىمەن قاتار ونىڭ فوتو سۋرەتتەرىن, ول تۋرالى جازىلعان ەستەلىك كىتاپتاردى, تەاتر ساحناسىندا ءوزى ويناعان سپەكتاكلدەرگە پايدالانعان زاتتارىن تاماشالادى.
كەشتە ونى جاقسى بىلەتىن تۋعان-تۋىس, دوس-جاراندارى, جارى ەستەلىكتەر ايتتى.
– بالالىق شاعىمىز بىرگە ءوتتى. ول كەزدە مەكتەپتى بىتىرگەندەردىڭ بار ارمانى وقۋعا ءتۇسۋ ءۇشىن الماتىعا بارۋ بولاتىن. ول كەزدە ماماندىقتىڭ ەڭ كۇشتىسى اگرونوم, ەكونوميست, دارىگەر, مال دارىگەرى بولىپ سانالاتىن. كوپشىلىگىمىز الماتىداعى ينستيتۋتتارعا ءتۇسىپ, سول ماماندىقتاردى الىپ شىقتىق, اۋىلعا كەلدىك. ءانۋار دا تۋعاندارىنىڭ قالاۋىمەن اۋىل شارۋاشىلىعى ينستيتۋتىنىڭ اگرونوميا فاكۋلتەتىنە تۇسكەن بولاتىن. بىراق ونى العاشقى كۋرستاردان تاستاپ كەتتى دە, جۇرەك قالاۋىمەن ونەر جولىن قۋدى. ول مەكتەپتە جۇرگەندە ادەبيەتتەن مىقتى بولاتىن, – دەيدى سىنىپتاسى حايروللا حاسەنوۆ.
اۋىلداستارى ءانۋاردىڭ كىشىپەيىل, قاراپايىم, ادامگەرشىلىگىن كوبىرەك ايتتى. ونىڭ اۋىلعا كەلگەنىن اۋدان باسشىلارى بىلمەي دە قالاتىن. اتاعىم بار ەكەن دەپ, اۋدان باسشىلارىنا كىرىپ, وزىنە جاعداي جاساۋدى, كولىك بەرۋدى سۇراپ كورمەپتى. ءتىپتى ەكى اۋىلدىڭ اراسىنا اتاربامەن كەتە بەرەدى ەكەن. ونىڭ ساحنا سىرتىندا, وتباسىندا قانداي بولعانىن جارى اقبوپە دە ساعىنا اڭگىمەلەدى.
– ءانۋار اۋىلىنا, تۋعان جەرىنە ەشتەڭە تەڭ كەلتىرمەيتىن, وتە جاقسى كورەتىن. امانگەلدىگە بارىپ, ءانۋاردىڭ تابانىنىڭ ءىزى قالعان توپىراقتى باسقانىما ءماز بولىپ كەلەمىن. مەن دە اكتەرلەر وتباسىنانمىن عوي. ونى تەاتر ساحناسىنان كورگەندە ءوزىم ءالى مەكتەپ قابىرعاسىندا جۇرگەن قىز ەدىم. «قانداي سۇلۋ جىگىت!» دەپ تاڭعالعانمىن. ساحناداعى جىگىتتىڭ سول سۇلۋ بەينەسى ويىمنان شىقپاي جۇرەتىن. كەيىن جولىمىز ءبارىبىر ءتۇيىستى. ونىڭ تالانتى عانا ەمەس, ادامگەرشىلىگى, تەكتى جاراتىلىسى كەرەمەت ەدى. مەن باقىتتىمىن, ونداي ازاماتپەن بىرگە عۇمىر ءسۇرۋ ءار ايەلدىڭ ارمانى ەكەنىن بىلەمىن. نەسىن ايتاسىڭ, عۇمىرى قىسقا بولدى, تاعدىر ءبىزدى ايىرىپ جىبەردى. بىراق ەلى-جۇرتى ۇمىتقان جوق, سوندىقتان ونى اركەز ءتىرى دەپ بىلەمىن. بۇگىن دە ءانۋار ورتامىزدا وتىرعانداي تولقىپ تۇرمىن, – دەدى اقبوپە بورانباەۆا.
امانگەلدى اۋدانىنداعى ءوزى وقىعان مەكتەپكە ءانۋار بورانباەۆتىڭ ەسىمى بەرىلگەن. ونەر قۋعان جاستارعا ءانۋاردىڭ كينودا سومداعان بەينەلەرى ومىرلىك مەكتەپ بولارى حاق. جەرلەستەرى اۋىلعا ءانۋار كەلىپ قالعانداي, تاعلىمى مول, ساعىنىشقا تولى كەشتەگى ەستەلىكتەردەن سەرپىلىپ تاراستى.
ءنازيرا جارىمبەت,
«ەگەمەن قازاقستان»
قوستاناي
