– ون ءبىرىنشى رەت وتكىزىلىپ وتىرعان بۇل فورۋم ەكونوميكانىڭ, ينۆەستيتسيانىڭ جانە يننوۆاتسيانىڭ مەيلىنشە وزەكتى ماسەلەلەرىن تالقىلاۋعا ارنالعان. بيىلعى فورۋم جاھاندىق سىن-تەگەۋرىندەرگە لايىقتى جاۋاپ تابۋ ماسەلەلەرىن دە قاراستىرادى, – دەدى قازاقستان پرەزيدەنتى.
نۇرسۇلتان نازارباەۆ شيەلەنىستى جاعدايلاردىڭ كوبەيگەنىنە جانە قازىرگى وركەنيەتتىڭ جاڭا جاھاندىق ترانسفورماتسياسىنا توقتالىپ, عالامدىق دامۋدىڭ باستى بەس مەگاترەندىن اتاپ ءوتتى. ولاردىڭ قاتارىندا ادام قىزمەتىنىڭ بارلىق سالالارىن تسيفرلاندىرۋ, ەنەرگەتيكالىق رەۆوليۋتسيا, جەر شارىنداعى تۇرعىندار سانىنىڭ جىلدام ءوسۋى, ۋربانيزاتسيا قارقىنى مەن سيپاتىنىڭ جانە جاھاندىق ەڭبەك نارىعىنىڭ وزگەرۋى بار.
مەملەكەت باسشىسى ەكونوميكانىڭ جاڭا تسيفرلىق مودەلىنىڭ ناتيجەسى ونىڭ ۇلعايۋىنا عانا ەمەس, سونداي-اق 2017 جىلى بيزنەس ءۇشىن ەڭ قاۋىپتى دەپ تانىلعان كيبەرقاۋىپسىزدىكتىڭ ارتۋىنا دا بايلانىستى ەكەنىن ايتتى.
– ءبىز دە وسى جاڭا جاعدايعا بەيىمدەلىپ كەلەمىز. «تسيفرلىق قازاقستان» باعدارلاماسىن ىسكە اسىرۋ ارقىلى ەلىمىزدە تسيفرلىق ينفراقۇرىلىمنىڭ جانە ءىت-ەكوجۇيەسىنىڭ دامۋى قامتاماسىز ەتىلىپ, تۇرعىنداردىڭ 85 پايىزىنىڭ تسيفرلىق ساۋاتتىلىعى ارتادى. ءبىز جاڭا تەحنولوگيالاردى قولدانا وتىرىپ, 5 جىل ىشىندە وڭدەۋ سەكتورىنداعى ەڭبەك ونىمدىلىگىن 1,5 ەسە ارتتىرۋدى جوسپارلاپ وتىرمىز, – دەدى قازاقستان پرەزيدەنتى.
سونىمەن قاتار, نۇرسۇلتان نازارباەۆ جيىنعا قاتىسۋشىلارعا قازاقستاندا «جاسىل» ەكونوميكانى جۇيەلى تۇردە دامىتۋدىڭ نەگىزىنە اينالعان «بولاشاقتىڭ ەنەرگياسى» تاقىرىبىمەن ۇيىمداستىرىلعان «ەكسپو-2017» حالىقارالىق كورمەسىنىڭ قالاي وتكەنى جونىندە اڭگىمەلەدى.
مەملەكەت باسشىسى جەر شارى تۇرعىندارىنىڭ سانى جىلدام ءوسىپ كەلە جاتقانىنا توقتالىپ, بازالىق رەسۋرستاردىڭ شەكتەۋلى ەكەنىنە جانە اۋىز سۋ تاپشىلىعىنىڭ ارتۋىنا بايلانىستى ازىق-ت ۇلىك ءوندىرىسىن كوبەيتۋ قاجەتتىگىن ايتتى.
– اگروونەركاسىپ كەشەنىنىڭ ونىمدىلىگى مەن رەسۋرستاردى پايدالانۋ تيىمدىلىگىن ايتارلىقتاي ارتتىرۋ قاجەت. بۇل سالا ەندى جوعارى تەحنولوگيالىق سالالاردىڭ بىرىنە اينالۋعا ءتيىس. قازاقستاندا زاماناۋي جەتىستىكتەردى قولدانا وتىرىپ, 5 جىلدا اگروونەركاسىپ كەشەنىنىڭ ونىمدىلىگىن 2,5 ەسە ارتتىرۋ ماقساتى قويىلىپ وتىر , – دەدى قازاقستان پرەزيدەنتى.
سونىمەن بىرگە, نۇرۇلتان نازارباەۆ قازاقستاندا اگلومەراتسيالاردى دامىتۋ جونىندەگى ستراتەگيا ىسكە اسىرىلىپ جاتقانىن, سونداي-اق استانانىڭ 20 جىلدىعىن مەرەكەلەۋ بارىسىندا وتەتىن جىبەك جولى ەلدەرى ءىرى قالالارىنىڭ فورۋمى تۋرالى ايتتى.
مەملەكەت باسشىسى جاھاندىق ەڭبەك نارىعىنىڭ ترانسفورماتسيالانۋ ماسەلەسىنە توقتالىپ, كرەاتيۆتى ويلاۋ قابىلەتىن قالىپتاستىرۋعا, قاجەتتى اقپاراتتى تاۋىپ, ونى دۇرىس قولدانۋ قابىلەتتەرىن جەتىلدىرۋگە باعىتتالعان ءبىلىم بەرۋ سالاسىن رەفورمالاۋ جونىندە قازاقستان تاراپىنان قابىلدانىپ جاتقان شارالارعا نازار اۋداردى.
– ءبىز مەملەكەت قالىپتاستىرۋ ءىسىنىڭ باستاۋىندا «بولاشاق» باعدارلاماسىن جۇزەگە اسىرۋعا كىرىستىك. سول ارقىلى 13 مىڭ قازاقستاندىق مەملەكەت ەسەبىنەن الەمنىڭ ۇزدىك ۋنيۆەرسيتەتتەرىندە وقۋعا مۇمكىندىك الدى. سونىمەن قاتار, ەلىمىزدە الەمدىك دەڭگەيدەگى ۋنيۆەرسيتەتتەر اشىلدى. ولاردىڭ قاتارىندا نازارباەۆ ۋنيۆەرسيتەتى, قازاقستان-بريتان تەحنيكالىق ۋنيۆەرسيتەتى, قازاقستاندىق مەنەدجمەنت, ەكونوميكا جانە بولجاۋ ينستيتۋتى جانە حالىقارالىق اقپاراتتىق تەحنولوگيالار ۋنيۆەرسيتەتى بار. جاڭا «بەس الەۋمەتتىك باستاما» ارقىلى وقۋ گرانتتارىنىڭ سانى كوبەيىپ, ستۋدەنت جاستاردىڭ تۇرمىس جاعدايى جاقسارادى, – دەدى قازاقستان پرەزيدەنتى.
نۇرسۇلتان نازارباەۆ اتالعان جاھاندىق 5 ترەند الەمدە ورىن الىپ جاتقان تۇراقسىزدىق جاعدايىنىڭ ارتا ءتۇسۋىنىڭ نەگىزگى فاكتورلارى بولىپ سانالاتىنىن جانە G-Global باستاماسىن ۇسىنعانىن اتاپ ءوتتى. بۇل باستاما G-7 جانە G-20 باستامالارىنا قاراعاندا, بارلىق ەلدەردىڭ پىكىرلەرى مەن مۇددەلەرىن بىرىكتىرۋگە مۇمكىندىك بەرىپ, مەيلىنشە تەڭگەرىمدى شەشىمدەر تابۋدىڭ ناقتى تەتىگىنە اينالا الادى.
– وسى باسقوسۋدا ورنىقتى دامۋ, ەكونوميكالىق تەڭسىزدىكتى قىسقارتۋ, حالىقارالىق ساۋدا-ساتتىقتىڭ, جالعان اقپارات تاراتۋدىڭ, كريپتوۆاليۋتانى قولدانۋ مەن ونى رەتتەۋدىڭ جاڭا ەرەجەلەرىن ايقىنداۋ ماسەلەلەرىن تالقىلاۋعا بولادى. جاھاندىق داعدارىسقا قارسى شەشىمدەر ازىرلەۋ ىسىنە بۇكىل حالىقارالىق قوعامداستىقتىڭ اتسالىسۋى قاجەت ەكەنىن ەسكەرىپ, بۇل باستامانى بىرىككەن ۇلتتار ۇيىمى اياسىنداعى الاڭدا جۇزەگە اسىرۋدى ۇسىنامىز, – دەپ تۇيىندەدى مەملەكەت باسشىسى.
سوڭىندا قازاقستان پرەزيدەنتى شاراعا قاتىسۋشىلارعا تابىس تىلەپ, فورۋم جۇمىسى ناتيجەلى ءارى جەمىستى بولاتىنىنا سەنىم ءبىلدىردى.
سۋرەتتەردى تۇسىرگەن ەرلان وماروۆ,
«ەگەمەن قازاقستان»
