جاس رەجيسسەر ءادىل مۇساتاەۆ تۇسىرگەن دەبيۋتتىك كارتينا ىشتەي جان ارپالىسىنا ءتۇسىپ, اناسىنا حات جازۋدى ارمانداپ, تولعانىستا جۇرگەن بالالار ءۇيىنىڭ تاربيەلەنۋشىسى تۋرالى باياندايدى.
– فيلم وقيعاسى شىنايى ومىردەن الىنعان. بۇل وقيعا وسكەمەن قالاسىنداعى بالالار ۇيىندە بولعان ەكەن. وسى وقيعانى تانىسىمنان ەستي سالا, دايىن دراماتۋرگيانىڭ بار ەكەنىن اڭعارىپ, ونى كينو تىلىمەن سويلەتۋگە اسىقتىم. جاس رەجيسسەرلەرگە قانات بىتىرەتىن وسىنداي بەدەلدى كينوفەستيۆالدە العاشقى ءفيلمىمنىڭ تۇساۋى كەسىلگەنىنە وتە قۋانىشتىمىن,– دەيدى رەجيسسەر ءادىل مۇساتاەۆ.
«وبەرحاۋزەن» كينوفەستيۆالىنىڭ رەسمي سايتىنىڭ مالىمەتى بويىنشا, بيىلعى حالىقارالىق فەستيۆالدىڭ نەگىزگى بايقاۋىنا 33 ەلدەن 53 قىسقامەتراجدى ءفيلمنىڭ قاتىسقانى بەلگىلى بولدى. ولاردىڭ اراسىندا اقش, قىتاي, مىسىر, ارگەنتينا, برازيليا, ءۇندىستان, فرانتسيا, جاپونيا, رەسەي, قازاقستان, فينليانديا جانە تاعى دا باسقا ەلدەردىڭ رەجيسسەرلەرى تۇسىرگەن فيلمدەر بار. جالپى بيىلعى بايقاۋعا 6000-عا جۋىق فيلمنەن تاپسىرىس تۇسكەن.
الپىس جىلدىق تاريحى بار «وبەرحاۋزەن» حالىقارالىق قىسقامەتراجدى فيلمدەر كينوفەستيۆالى الەمدەگى قىسقامەتراجدى فيلمدەرگە ارنالعان ەڭ ءىرى بايقاۋلاردىڭ ءبىرى. ول 1954 جىلدان بەرى وتكىزىلىپ كەلەدى.
ايگۇل احانبايقىزى,
«ەگەمەن قازاقستان»
الماتى
