ءومىرىن ءوز قولىمەن قيعان جەتى بالانىڭ تورتەۋىنىڭ ولىمىنە جاۋاپسىز ماحاببات سەبەپ بولسا, بىرەۋى اتا-اناسىمەن جانجالدان كەيىن وسىنداي قاتىگەز تىرلىككە بارعان. التىنشى بالانىڭ ولىمىنە سەبەپكەر بولعان جاعداي ءالى تەكسەرىلىپ جاتىر. ال جەتىنشى وقيعا كۇنى كەشە عانا, ياعني كوميسسيا وتىرىسى بولعان كۇنى كەشكە قاراي بولدى. ون بەس جاسار قىز توعىزىنشى قاباتتان سەكىرىپ كەتكەن.
وبلىستىق ءبىلىم باسقارماسى ديرەكتورىنىڭ ورىنباسارى گۇلنار ۋكينانىڭ مالىمەتىنشە, وبلىس وڭىرىندە 2017 جىلى 10 ءجاسوسپىرىم وزىنە قول جۇمساعان. 33 بالا دا وسىنداي قاتەرگە بارعىسى كەلگەن. سوڭعى ەكى جىلدا جاسوسپىرىمدەر اراسىندا بولاتىن سۋيتسيد 3 وقيعاعا كوبەيگەن, ءوز ءومىرىن قيۋعا تالاپ جاساعانداردىڭ سانى دا بەسەۋگە ارتقان. 2018 جىلى 14 بالا سۋيتسيدكە ۇمتىلعان. سونىڭ 9-ى مەكتەپ وقۋشىلارى دا, بەسەۋى كوللەدجدە وقيتىن ستۋدەنت ەكەن.
«وسى مالىمەتتەر وبلىستا سۋيتسيدكە قارسى جۇمىستاردىڭ ءاتۇستى جۇرەتىندىگىن بىلدىرەدى. قالىپتاسىپ وتىرعان جاعدايعا قاراي پسيحولوگيالىق جۇمىستار جۇرگىزىلۋى ءتيىس ەكەندىگى نەشە رەت ايتىلىپ كەلەدى. جەرگىلىكتى جەرلەردە پسيحولوگيالىق قىزمەت كورسەتىلۋىن قامتاماسىز ەتۋ ۇشىن بارلىق ءبىلىم بولىمدەرىندە پەداگوگ-پسيحولوگ بىرلىگى اشىلدى. وبلىستا وسى ماقساتپەن پسيحولوگتار قاتارى 42-گە كوبەيدى» دەدى گۇلنار كوشكەنوۆا. بىراق ول رۋدنىي, قارابالىق, دەنيسوۆ پەن قوستاناي اۋداندارىندا پسيحولوگتار جۇمىسى كوڭىل كونشىتپەيتىنىن, ولاردا سۋيتسيد جونىندەگى لەكتسيالار جالپى ايتىلا سالاتىنىن جاسىرعان جوق. جىل باسىنان بەرى رۋدنىي قالاسىندا ەكى بالا سۋيتسيد جاساماق بولعان. رۋدنىي قالاسى اكىمىنىڭ ورىنباسارى ەلەنا سكارەدينا قالاداعى 30 مەكتەپتە پسيحولوگ جۇمىس ىستەيتىنىن, بىراق ولاردىڭ 64 پايىزىنىڭ تاجىريبەسى 5 جىلدان اسپايتىنىن تىلگە تيەك ەتتى. بيىل قالا اكىمى پسيحولوگتارمەن ءسۋيتسيدتىڭ الدىن الۋ تۋرالى جۇمىس جۇرگىزەتىن بىلىكتى, تاجىريبەلى پسيحولوگتار شاقىرۋ ءۇشىن 800 000 تەڭگە قوسىمشا قارجى بولۋگە شەشىم شىعارعان.
كوميسسيانىڭ كەڭەيتىلگەن وتىرىسىندا ءسۋيتسيدتىڭ الدىن الۋ تۋرالى كوپتەگەن ماسەلەلەر, اۋداندار مەن قالالاردا ءجۇرىپ جاتقان جۇمىستار جونىندە ايتىلدى. وبلىس اكىمىنىڭ ورىنباسارى مارات جۇندىباەۆ جالپى وڭىردە جاسوسپىرىمدەر اراسىندا بولاتىن سۋيتسيدكە قارسى 5-6 تارماقتان تۇراتىن جۇمىس جوسپارىن جاساۋعا ۇسىنىس ايتتى. وسى جوسپار جاسالعاننان كەيىن وبلىستا جاسوسپىرىمدەر ءسۋيتسيدىنىڭ الدىن الۋ جۇمىستارىمەن اينالىساتىن جۇمىس توبى قۇرىلاتىن بولادى.
ءنازيرا جارىمبەت,
«ەگەمەن قازاقستان
