ەكولوگيالىق ناۋقانعا استانا اكىمى اسەت يسەكەشەۆ, قر پارلامەنتى سەناتى مەن ءماجىلىسىنىڭ توراعالارى قاسىم-جومارت توقاەۆ پەن نۇرلان نىعماتۋلين, «نۇروتان», «اقجول», قكحپ پارتيالارى پارلامەنتتىك فراكتسيالارىنىڭ دەپۋتاتتارى, ءماجىلىس اپپاراتىنىڭ قىزمەتكەرلەرى دە قاتىستى. ولار ورىنبور كوشەسىندە ورنالاسقان «زەلەنىي كۆارتال» تۇرعىن ءۇي كەشەنى اۋدانىندا اعاش وتىرعىزدى.
«بۇگىن بارلىعىمىزدىڭ كوڭىل-كۇيىمىز جاقسى. سەنبىلىك استانانىڭ 20 جىلدىعى سياقتى تاماشا مەرەكەنىڭ قارساڭىندا ءوتىپ جاتىر. ارينە, مۇنداي شاراعا ءوز ۇلەسىمىزدى قۋانا قوسقىمىز كەلەدى. قالامىزدى اباتتاندىرۋ, ونىڭ كوركىن كەلتىرۋ جۇمىستارىندا سەنىڭ دە كىشكەنتاي ەڭبەگىڭنىڭ بار ەكەندىگىن ءبىلۋ ەرەكشە كۇيگە بولەيدى ەمەس پە؟!» - دەيدى قر پارلامەنتى ءماجىلىسىنىڭ دەپۋتاتى يرينا ارونوۆا.
ناۋقانعا قاتىسۋشىلار 120-عا تارتا اعاش كوشەتتەرىن وتىرعىزدى. ەندى استانانىڭ سول جاق جاعالاۋىنا تەرەك, شاعان, شەفەرديا سياقتى اعاشتار كورىك بەرمەك.
كەڭ اۋقىمدى سەنبىلىكتى وتكىزۋگە قاتىستى باستامانى ەڭبەكتەگەن سابيدەن ەڭكەيگەن قارياعا دەيىن قولدادى. قالا كوشەلەرىن تازارتۋعا كوپتەگەن وتباسىلار, ۇجىمدار شىقتى. ولاردىڭ اراسىندا مەملەكەتتىك مەكەمەلەردىڭ, قوعامدىق بىرلەستىكتەردىڭ قىزمەتكەرلەرى, الەۋمەتتىك جەلىلەردەگى «استانا – چتو؟ گدە؟ كوگدا؟», «استانا, حوچۋ پوحۆاليت/ حوچۋ پوجالوۆاتسيا» اتتى قاۋىمداستىقتاردىڭ جازىلۋشىلارى دا بار.
ەكولوگيالىق ناۋقان بارىسىندا بارلىعى 17 313 اعاش ەگىلەدى دەپ جوسپارلانعان.
9 ءساۋىر مەن 10 مامىر ارالىعىندا ەلوردا اۋماعىنان 4 227,74 توننا قالدىق شىعارىلىپ, 9 ءساۋىر مەن 9 مامىر ارالىعىندا 8 065 اعاش وتىرعىزىلدى.
