دۇنيەنىڭ تۇكپىر-تۇكپىرىنەن اتاقتى ەكونوميستەردى جيناپ, عالامدىق عالىمداردىڭ باسىن قوساتىن, نوبەل سىيلىعى لاۋرەاتتارىن شاقىرىپ, جا-ھاندىق ماسەلەلەردى بىرگە وتىرىپ تالقىلايتىن جىل سايىنعى شاراعا بۇگىنگە دەيىن الەمنىڭ 150 ەلىنەن 50 000-نان استام دەلەگات قاتىسقان ەكەن. البەتتە, شارانىڭ جىل سايىن وتكىزىلىپ وتىرعانىنا قاراعاندا, فورۋمنىڭ ەل ءۇشىن دە, الەم ءۇشىن دە ءتيىمدى قاجەتتىلىگىن اڭعارۋ قيىن ەمەس. ەندەشە, وسىعان دەيىن ون رەت وتكىزىلگەن اۋقىمدى جيىننىڭ نەگىزگى ناتيجەلەرىنە توقتالىپ كورەلىك.
جالپى, اەف ۇسىنىستارى تەك ماسەلەگە كوڭىل ءبولۋ عانا ەمەس, ناقتى ارەكەتتەردى ورىنداۋ كەزىندە ولاردى ەسكەرۋ. ايتالىق, فورۋم G8 جانە G20, بۇۇ ەكوسوس, يۋنكتاد, ەسكاتو فورماتتارى اياسىنداعى شارالار مەن داعدارىسقا قارسى شارالاردىڭ قابىلدانۋىمەن بايلانىستى عالامدىق پروتسەستەرگە ىقپال ەتە باستادى. مىسالى, 2012 جىلى استانا ەكونوميكالىق فورۋمىنىڭ ۇسىنىستارى بۇۇ باس اسسامبلەياسىنىڭ پلەنارلىق سەسسياسىندا تانىستىرىلىپ, بۇۇ باس حاتشىسى پان گي مۋننىڭ, بۇۇ باس اسسامبلەياسىنىڭ 66-سەسسياسىنىڭ پرەزيدەنتى ان-ناسەردىڭ جانە G20-داعى مەكسيكا وكىلدىگىنىڭ جوعارى باعاسىنا يە بولدى. 2013 جىلى VI استانا ەكونوميكالىق فورۋمىندا وتكىزىلگەن اسا ماڭىزدى شارا – بۇۇ باس اسسامبلەياسىنىڭ قولداۋىمەن, قازاقستان رەسپۋبليكاسى حالىقارالىق ۇيىمدارمەن بىرلەسىپ باستاماشى بولعان ءى دۇنيەجۇزىلىك داعدارىسقا قارسى كونفەرەنتسيا بولدى. ونىڭ قورىتىندىسى بويىنشا استانا دەكلاراتسياسى مەن بۇۇ-عا مۇشە مەملەكەتتەرگە ارنالعان الەمدىك داعدارىسقا قارسى جوسپار جوباسىنىڭ نەگىزگى باعىتتارى قابىلداندى.
2014 جىلى VII استانا ەكونوميكالىق فورۋمى الاڭىندا بۇۇ-عا مۇشە مەملەكەتتەردىڭ ورتالىق بانكتەرىنىڭ باسشىلارى, ەكونوميكا, قارجى مينيسترلەرىنىڭ دەڭگەيىندە ءىى دۇنيەجۇزىلىك داعدارىسقا قارسى كونفەرەنتسيا وتكىزىلدى. ونىڭ قورىتىندىسى بويىنشا بۇۇ-عا مۇشە ەلدەرگە ارنالعان دۇنيەجۇزىلىك داعدارىسقا قارسى جوسپاردىڭ تۇجىرىمداماسى قابىلدانعان بولاتىن.
2015 جىلعى 22 مامىردا «ينفراقۇرىلىم: ەكونوميكانىڭ تۇراقتى ءوسىمىنىڭ درايۆەرى» VIII فورۋمى اياقتالىپ, وعان 3000-نان استام دەلەگات قاتىستى. فورۋم بارىسىندا قازاقستان پرەزيدەنتىنىڭ بەس ينستيتۋتتىق رەفورماسىن ىسكە اسىرۋ بويىنشا «100 ناقتى قادام» ۇلت جوسپارى جوعارى باعالاندى. اەف-ءتى توعىزىنشى رەت وتكىزگەن كەزدە قازاقستان پرەزيدەنتى نۇرسۇلتان نازارباەۆ الەمدىك ەكونوميكانى قالپىنا كەلتىرۋگە جانە دامۋشى ەلدەرگە قولداۋ كورسەتۋگە, سونداي-اق «جاسىل ەكونوميكانى» دامىتۋ مەن تابيعي رەسۋرستاردى ۇتىمدى پايدالانۋعا باعىتتالعان بىرقاتار باستامالاردى ۇسىندى. سونداي-اق «جاڭا ەنەرگيا – جاڭا ەكونوميكا» مەرەيتويلى ح استانا ەكونوميكالىق فورۋمى ەۋرازيالىق كەڭىستىك ءۇشىن تاريحي وزگەرىستى كەزەڭدە وتكىزىلدى. رەسپۋبليكا پرەزيدەنتى قازاقستاندى ءۇشىنشى جاڭعىرتۋ جانە ەنەرگەتيكا سالاسىن جاڭعىرتۋ بويىنشا قابىلدانعان شارالار توڭىرەگىندە ەلدەگى اۋقىمدى ءىس-شارالار تۋرالى مالىمدەدى.
ال ۇيىمداستىرۋشىلار بيىلعى فورۋمنىڭ تۇبەگەيلى جاڭا فورماتتا وتەتىنىن مالىمدەپ وتىر. جاڭارتىلعان فورۋم الەمنىڭ جەتەكشى سامميتتەرىنىڭ بىرىنە اينالاتىنىنا سەنىمدى. Global Challenges Summit - 2018 نەگىزگى پلانەتالىق سىن-تەگەۋرىندەر ماسەلەلەرىن تالقىلاماق. كونگرەسكە قاتىسۋشىلاردىڭ, الەمدىك ساراپشىلار قاۋىمداستىعى, تەحنولوگيالىق ەليتا, قالا جانە مەملەكەتتىك باسقارۋ وكىلدەرى, ۆيزيونەرلەر مەن ءىرى كورپوراتسيالاردىڭ باسشىلارىنىڭ مىندەتى – اتالعان سىن-تەگەۋرىندەرگە جاۋاپ تابۋ جانە جاھاندىق اۋقىمداعى ءتيىستى شەشىمدەردى ازىرلەۋ.
بيىل بارلىق شارالار ءۇش بلوكقا بولىنەدى: ىسكەرلىك باعدارلاما, ستراتەگيالىق سەسسيا جانە زەرتتەۋ. فورماسى مەن اقپارات بەرۋ ءتاسىلى وزگەرگەن. بۇعان دەيىن ءداستۇرلى پانەلدىك سەسسيالار وتكىزىلسە, ەندى مۇندا TED talks, يننوۆاتسيالىق پرەزەنتاتسيالار, ۆوركشوپتار مەن نارىقتىڭ بولاشاقتا دامۋىن بولجاي الاتىن جانە وعان اسەر ەتە الاتىن ساراپشى-ۆيزيونەرلەردىڭ باياندامالارى وتكىزىلەدى. اەف العاش رەت جاستارعا ارنالعان ارنايى باعدارلاما ۇسىنادى, دەيدى ۇيىمداستىرۋشىلار. استانانىڭ جەتەكشى جوعارى وقۋ ورىندارىنىڭ بازاسىندا ەڭ ۇزدىك ەكونوميستەرمەن دارىستەر, پرەزەنتاتسيالار جانە كەزدەسۋلەر وتەدى. بۇرىنعى فورۋمداردا سپيكەرلەردىڭ دەنى ساياساتكەرلەر, عالىمدار جانە ەكونوميستەر, الەمدىك دەڭگەيدەگى جۋرناليستەر مەن قوعام قايراتكەرلەرى, حالىقارالىق ۇيىمدار, قارجى ينستيتۋتتارى جانە بيزنەس-ەليتالاردىڭ وكىلدەرى بولعان. ال بيىلعى فورۋمعا قاتىساتىندار قاتارىندا فيزيك, فۋتۋرولوگ جانە عىلىمدى دارىپتەۋشى, عىلىمي-كوپشىلىك ادەبيەت جانرىنىڭ اۆتورلارى بولادى دەپ كۇتىلۋدە. Global Challenges Summit-2018 الاڭىندا الەمنىڭ 24-تەن استام ەلىنەن 450-دەن استام سپيكەر پىكىر الماسادى.
فورۋم قورىتىندىسى بويىنشا الەم جانە قازاقستان ءۇشىن ءتيىمدى شەشىمدەر مەن پراكتيكالىق ۇسىنىستار ازىرلەۋ, جاھاندىق ينۆەستورلاردىڭ قىزىعۋشىلىعىن ارتتىرۋ كوزدەلگەن. ەلدەر, قالالار مەن كومپانيالار اراسىندا ماڭىزدى كەلىسىمدەر جاسالادى. تاعى ءبىر ماڭىزدىسى – ەكونوميستەردىڭ جاڭا بۋىنىن قالىپتاستىرۋ مۇمكىندىگى, سەبەبى اەف – ەكونوميكالىق عىلىم بويىنشا الەمدەگى ەڭ ۇزدىك ساراپشىلار مەن عالىمداردىڭ, نوبەل سىيلىعى لاۋرەاتتارىنىڭ باس قوساتىن ورنى, سوندىقتان مۇندا جاس قازاقستاندىق ەكونوميستەرگە باعا جەتپەس ءبىلىم, ۇلكەن تاجىريبە الۋعا مۇمكىندىك مول.
دينارا بىتىك,
«ەگەمەن قازاقستان»
