سايلاۋالدى دايىندىعىن جاريا ەتتى

3 جەلتوقساندا «ادىلەت» دەموكراتيالىق پارتياسىنىڭ كەزەكتەن تىس VII سەزى بولىپ ءوتتى. سەزد دەلەگاتتارى الداعى پارلامەنت ءماجىلىسىنىڭ سايلاۋىندا جەڭىسكە جەتەتىندىكتەرىنە سەنىمدەرى مول ەكەندىكتەرىن مالىمدەدى. «بۇل جەڭىسكە جەتۋ ءۇشىن ءبىزدىڭ قولىمىزدا بارلىعى: تاجىريبە, بىرلىك جانە بولاشاققا دەگەن تال­پىنىس بار» دەگەن ۇران اياسىندا وتكىزىلگەن سەزد ءوز جۇمىسىن تاۋەلسىز قازاقستاننىڭ تاريحي كە­زەڭدەرىن ەسكە ءتۇسىرۋ مەن «ءادى­لەت» پارتياسىنىڭ قول جەتكىزگەن جەتىستىكتەرىمەن كوپشىلىكتى تانىس ەتۋ شاراسىنان باستادى. سەزگە قاتىسۋشىلار «ءادى­لەت­كە بارار جول» اتتى پارتيانىڭ سايلاۋالدى باعدارلاماسىن قا­بىل­دادى جانە 61 ادامنان تۇراتىن پارلامەنت ماجىلىسىنە جانە بار­لىق دەڭگەيدەگى ءماسليحاتتار دە­پۋتاتتىعىنا كانديداتتاردىڭ پارتيالىق ءتىزىمىن بەكىتتى. فورۋمعا قازاقستاننىڭ بار­لىق ايماقتارىنان كەلگەن 246 دەلەگات قاتىستى. سايلاۋ الدىن­دا­عى باعدار­لامانىڭ الدىنا قويعان ناقتى ماقسات-مىندەتتەرىن پارتيا توراعاسى ماقسۇت نارىكباەۆ «ءبا­رىنەن دە جو­عارى تۇراتىن ادىلدىك» دەپ اتالاتىن بايانداماسىندا تا­نىستىرىپ ءوتتى. سايلاۋالدى باع­دارلاماسىنىڭ يدەولوگيالىق نەگىزى ادىلەتتىلىك ورناتۋ جانە ون­سىز قۇقىقتىق, دەموكراتيالىق, الەۋمەتتىك مەملەكەت قۇرۋ مۇمكىن ەمەستىگى, ءاربىر قازاقستاندىقتىڭ زاڭدى مۇددەلەرىن قورعاۋ بولىپ تابىلادى. ءبىزدىڭ سەزد تاۋەلسىزدىكتىڭ 20 جىلى ىشىندە اتقارىلعان ءىس-ارە­كەتتەردى قورىتىندىلاۋ كەزىندە ءوتىپ وتىر, دەدى ءوزىنىڭ سوزىندە م.نارىكباەۆ. بۇگىنگى كۇنى بۇكىل الەم ەكونوميكالىق داعدارىستىڭ قايتالانۋ قاۋپى تونگەندىكتەن, وزدەرىنىڭ داعدارىسقا توتەپ بەرۋ مۇمكىن­دىكتەرىن قاراستىرۋدا. ەل­با­سى ءبىر سوزىندە «داعدارىس­تىڭ تۋىنداۋ سەبەبى – ادىلدىكتەن تار­تىنۋ» دەگەن بولاتىن. ادىلەت­تى­لىك­سىز اۋقاتتى ءارى قۋاتتى ەلى­مىز­دىڭ بارلىق جەتىستىكتەرىنىڭ ماعى­ناسى مەن ءمانى جويىلادى. ونسىز دامۋ مەن كوركەيۋ, تۇراقتىلىق پەن تىنىشتىق بولمايدى. ءادىل­دىكتى ادىلەتتىلىك رەتىندە بارلىق سالالاردا قالىپتاستىرۋ ءۇشىن قۇقىقتىق, دەموكراتيالىق جانە الەۋمەتتىك مەملەكەت قۇرۋىمىز قاجەت. پارتيانىڭ سايلاۋالدى باع­دار­لاماسىندا بولاشاق جاڭا ءما­جىلىس دەپۋتاتتارى ورىنداۋى ءتيىس ءما­سە­لەلەر مەن ساياسي-ەكونو­مي­كا­لىق جانە الەۋ­مەت­تىك سالادا ءجۇ­زە­گە اسۋى كەزەك كۇتتىرمەيتىن ءبىر­قاتار ۇسىنىستار بار ەكەن. اتاپ ايتقاندا, ەگەر «ادىلەت» پارتيا­سى پارلامەنتتەن ورىندارعا يە بولعان جاع­دايدا ساياسات سالا­سىن­دا كەڭ كولەمدەگى كونستيتۋتسيا­لىق رەفورما جۇرگىزۋ, پارلامەنتتىڭ وكىلەتتىلىگىن ارتتىرۋ, قالا جانە اۋدان اكىمدەرىن سايلانبالى ەتۋ, تاۋەلسىز اربيتر بولاتىن سوت جۇيەسىن ەنگىزۋ, قوعام­دىق تەلەارنا اشۋ, سونداي-اق ساياسي پارتيا­لار­دىڭ ءادىل باسەكەگە ءتۇسۋىن قام­تاماسىز ەتۋ سەكىلدى, ال ەكونوميكا سالاسىندا تابيعي مونوپوليانىڭ مەملەكەتتەندىرىلۋى, قوسىمشا قۇن سالىعىن 6 پايىزعا, الەۋ­­مەت­تىك سالىقتى 7 پايىزعا دەيىن ءتو­مەندەتۋ, با­عا­لى, قۇندى زاتتارعا سالىق سالۋ سەكىلدى ماسەلەلەر ءجۇ­زەگە اسىرىلماق كورىنەدى. سونى­مەن قاتار, بۇل باعدارلامادا الەۋ­مەتتىك ساياساتتا رەفورما جۇرگىزۋ, زەينەتاقى جۇيەسىنە ءتيىمدى ءتارتىپ ەنگىزۋ, گاز, ەلەكتر ەنەرگياسى, تەمىر جول تاريفتەرىنىڭ وسۋىنە شەكتەۋ قويۋ, بارلىق قازاقستان­دىق­تاردى قولجەتىمدى باسپانامەن قام­تاماسىز ەتۋ, ءبىلىم بەرۋ جانە دەنساۋلىق ساقتاۋ سالالارىنىڭ قولجەتىمدى بولۋىن قامتاما­سىز ەتۋ سەكىلدى ءبىرشاما جايتتەر قام­تىلىپتى. پارتيا سەزىندە ۇيىمدىق ءما­سەلەلەر دە قارالدى: پارتيانىڭ باس حاتشىسى بولىپ مۇرات راەۆ, پارتيا توراعاسىنىڭ ورىنباسارى بولىپ ءمادي ارتىعاليەۆ جانە ارتىقباي ۇكىباەۆ سايلاندى. سونىمەن قاتار, «ادىلەت» پار­تيا­سى توراعاسىنىڭ ءبىرىنشى ورىن­باسارى لاۋازىمىندا تولە­گەن سىدىحوۆ ءوز قىزمەتىن ءارى قا­راي جالعاستىراتىن بولدى. «ءادى­لەت» پارتياسى توراعاسىنىڭ يدەولوگيا جونىندەگى ءبىرىنشى ورىن­با­سارى دەگەن قوسىمشا لاۋازىم بەكىتىلىپ, وعان ءۋاليحان قايساروۆ تاعايىندالدى. پارتيا باسشىلىعى مەن سەزد دەلەگاتتارىنىڭ اتىنا تىلەك بىلدىرگەن بىرقاتار حاتتار كەلىپ ءتۇس­سە, ولاردىڭ قاتارىندا و.ءسۇ­لەي­مە­نوۆتىڭ, سونداي-اق «سپراۆەدليۆايا روسسيا» پارتياسىنىڭ توراعا­سى ن.لەۆيچەۆتىڭ, ۋكراينا سوتسياليستىك پارتياسىنىڭ توراعاسى ا.موروزدىڭ, بەلارۋس رەسپۋبلي­كا­سىنىڭ ەڭبەك جانە ادىلەت رەس­پۋبليكالىق پارتياسىنىڭ ءتور­اعا­سى ۆ.زادنەپريادنىيدىڭ جانە سول سياقتى تمد ەلدەرى ساياسي پارتيا­لارى وكىلدەرىنىڭ جەدەلحاتتارى بار ەكەن. ولار سەزد بارىسىندا قاتىسۋشىلاردىڭ نازارىنا ۇسى­نىلدى. قانات ەسكەندىر. استانا.