اقمولا وبلىسى تۋريستىك اقپارات ورتالىعىنىڭ كەڭ اۋقىمدى جارنامالاۋ جۇمىستارىن جۇرگىزۋى ناتيجەسىندە كوكشەتاۋ قالاسىنان 150 ادام ۆەلوتەبۋ ناۋقانىنىڭ اشىلۋىنا قاتىستى. ۆەلوشاباندوزداردى جارىس الاڭىنا دەيىن تەگىن جەتكىزۋ ءۇشىن ءتىپتى كولىك تە ۇيىمداستىرىلدى. ناتيجەسىندە ۆەلوجارىسقا 420 ادام قاتىسسا, ولاردىڭ ساپىندا «ۆەلوتوپ استانا», «كوكشە» ۆەلوقاۋىمداستىعىنىڭ كاسىبي ۆەلوشاباندوزدارى دا بولدى. سونىمەن قاتار قاتارعا اقمولا وبلىسىنىڭ ءارتۇرلى وڭىرلەرىنەن, استانا, كوكشەتاۋ, ستەپنوگور جانە ششۋچە قالالارىنان ۆەلوسيپەد تەبۋدى داعدىعا اينالدىرعان اۋەسقويلار دا كەلىپ قوسىلدى.
رەتى كەلگەندە ايتا كەتۋ كەرەك, «Burabay Land» تاقىرىپتىق ساياباعىندا اقمولا وبلىسىنىڭ اكىمى مالىك مىرزالين قاتىسۋشىلارعا ارناپ قۇتتىقتاۋىن جەتكىزگەننەن كەيىن ءوزى دە ۆەلوسيپەدكە قونىپ, كولوننانى باستاپ ءجۇردى. ۆەلوسيپەدپەن ءجۇرىپ ءوتۋ اراقاشىقتىعى 28 شاقىرىم ەڭسەرىلگەننەن كەيىن ەڭ جاس, ەڭ ەگدە جاسقا جەتكەن جانە ەڭ ۇزدىك ناتيجە كورسەتكەن نازىك جاندى سپورتشىعا سىياقى بەرىلدى.
اسقار تۇراپباي ۇلى,
«ەگەمەن قازاقستان»
اقمولا وبلىسى
