وبلىس ورتالىعىنداعى اسكەري ءبولىمنىڭ كومانديرى, پودپولكوۆنيك مۇرات اراپباەۆ وسكەمەن گارنيزونى ەلباسى – قارۋلى كۇشتەردىڭ جوعارعى باس قولباسشىسى قويعان مىندەتتەردى ابىرويمەن اتقارىپ كەلە جاتقانىن ايتادى. «27943 اسكەري ءبولىمىنىڭ جاۋىنگەرلەرى قىسقا مەرزىم ىشىندە ۇلكەن جەتىستىكتەرگە قول جەتكىزدى. بريگادا بولىمشەلەرى قارۋلى كۇشتەردەگى ءىرى وقۋ-جاتتىعۋلارىنا قاتىسىپ, وزدەرىنىڭ جوعارى كاسىبي دايارلىقتارىن پاش ەتىپ كەلەدى. قازىرگى ۋاقىتتا ءبىزدىڭ گارنيزون «شىعىس» وڭىرلىك قولباسشىلىعىنا قاراستى اسكەري بولىمدەر اراسىندا 1-ورىندا, رەسپۋبليكا بويىنشا العاشقى ۇشتىكتە», دەيدى ول.
اسكەري ءبولىم ساربازدارى 2008 جىلى «شۇباركول» پوليگونىندا رەسەي فەدەراتسياسىنىڭ قارۋلى كۇشتەرىمەن بىرلەسە وتكەن ء«وزارا ارەكەتتەسۋ-2008», 2009 جىلى سەمەيدەگى «شىعىس» پوليگونىنداعى ء«وزارا ارەكەتتەسۋ-2009», 2015-2016 جىلدارى الماتى مەن سەمەي قالالارىنداعى «ايبالتا-2015», «ايبالتا-2016» وقۋ جاتتىعۋلارىنا قاتىسىپتى. اسكەري ءبولىمنىڭ 1 موتواتقىشتار باتالونىنىڭ جاۋىنگەرلىك ۇرىس ماشيناسىنىڭ ەكيپاجى 2016 جىلى حالىقارالىق «ارميا-2016» ويىندارىندا «سۋۆوروۆ تەگەۋرىنى» نوميناتسياسى بويىنشا 3-ورىندى جەڭىپ الىپتى. پرەزيدەنت جارلىعىمەن بريگادا جاۋىنگەرلەرى – اعا لەيتەنانت م.ابدۋللين ءىىى دارەجەلى «ايبىن» وردەنىمەن, پودپولكوۆنيك ءا.ساليحوۆ, كەلىسىمشارت بويىنشا اسكەري قىزمەتشى, 3-سىنىپتى سەرجانت ل.كوتوۆا, 3-سىنىپتى سەرجانت ت.مۇشەلباەۆ «جاۋىنگەرلىك ەرلىگى ءۇشىن» مەدالدارىمەن ماراپاتتالىپتى. سانكت-پەتەربۋرگ قالاسى, «كراسنوە» اۋىلىندا وتكەن «اسكەري-مەديتسينالىق ەستافەتا» بايقاۋىندا قازاقستاندىق كوماندا قۇرامىنىڭ مەحانيك جۇرگىزۋشىسى, 3-سىنىپتى سەرجانت نۇرجان مايحانوۆ جساك (جەڭىل ساۋىتتى امبەباپ كولىك) كەدەرگىلەر جولاعىنان, اتىس شەبىنەن وتۋدە كاسىبي شەبەرلىگىنىڭ جوعارى دەڭگەيدە ەكەندىگىن كورسەتىپتى.
بيىل وسكەمەندەگى 27943 اسكەري ءبولىمىنىڭ قۇرىلعانىنا 25 جىل تولىپ وتىر. اسكەري ءبولىم قورعانىس مينيسترلىگىنىڭ 1993 جىلعى 26 ساۋىردەگى دەرەكتيۆاسى نەگىزىندە ۇكىمەتتىڭ شەشىمىمەن مەملەكەتتىك شەكارانى قورعاۋدى قامتاماسىز ەتۋ ماقساتىندا موتواتقىشتار پولكى رەتىندە جارما اۋدانىنىڭ قالباتاۋ قالاشىعىندا جۇمىسىن باستاعانى بەلگىلى. 1998 جىلى 1 جەلتوقساننان باستاپ موتواتقىشتار پولكى جەكە موتواتقىشتار بريگاداسى بولىپ قايتا قۇرىلىپ, 2004 جىلى جەكە موتواتقىشتار بريگاداسى مەحانيكالاندىرىلعان بريگادا بولىپ اۋىستىرىلىپ, وسكەمەنگە, احمەر كەنتىنە كوشىپ كەلگەن-ءدى.
جاقىندا وسكەمەندە ءبولىمنىڭ 25 جىلدىعىنا وراي سالتاناتتى جيىن ءوتىپ, ءبولىمنىڭ قۇرىلۋىنا, قالىپتاسۋىنا ەڭبەك سىڭىرگەن كەشەگى قىلشىلداعان ساربازدار – بۇگىنگى اعا بۋىن ارداگەرلەر باس قوسىپ, وتكەن كۇندەردى تەبىرەنە ەسكە الىپ, ەستەلىكتەرىمەن ءبولىستى. «27943 اسكەري ءبولىمى ەلىمىز ءوز تاۋەلسىزدىگىن العان ەلەڭ-الاڭ شاقتا, ياعني 1993 جىلى قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆتىڭ بۇيرىعىمەن قۇرىلعان ەدى. مەن سول جىلدىڭ 18 قازانىندا قالباتاۋعا كەلدىم. ەلدىڭ ەڭسەسى ەزىلگەن قيىن كەز. ءبارىن باسىنان باستاۋعا تۋرا كەلدى. سولداتتار مەن سەرجانتتاردى, وفيتسەرلەردى اسكەري بولىمدەردەن جينادىق. اۋەلدە بولىمدە بار بولعانى 312 سارباز, 16-17 وفيتسەر عانا بولدى. اكادەميالىق ءبىلىمى بار جالعىز ادام مەن بولسام, اسكەري ۋچيليششەلەردى بىتىرگەندەر سانى 5-6-دان اسپادى. قالعاندارى زووتەحنيك, مەحانيك, ياعني زاپاستاعى وفيتسەرلەر بولدى. جۇمىستى توزىپ كەتكەن كازارمالار مەن شتابتان باستادىق. «قاراۋىلدى 200 گرامم ديزەل وتىنىمەن 18 شاقىرىم جەردەگى كەزەككە قالاي اپارامىن؟» دەپ باس قاتقان كەزدەردى دە وتكەردىك. سول شاقتاردا مەنىڭ جانىمدا بولعان, كۇن-ءتۇن دەمەي ءبولىمنىڭ جاۋىنگەرلىك قابىلەتىن ۇشتاعان, شىڭداعان بارلىق ارداگەرلەرگە العىسىمدى بىلدىرەمىن», دەيدى ءبولىمنىڭ تۇڭعىش كومانديرى, اۋعان سوعىسىنىڭ ارداگەرى, گەنەرال-مايور ءالىمجان ەرنيازوۆ.
بۇدان كەيىنگى جىلداردا بولىمگە تيمۋر ابىشەۆ, باۋىرجان قاباتوۆ, ۆيتالي دوبرينسكي, اسقان تاسبولاتوۆ, نۇرلان قاشاعانوۆ, دانيار قوناقباەۆ, رۋسلان اقمولين, تالعات ساپارباەۆ, ەرجان يبراەۆ سىندى ازاماتتار جەتەكشىلىك جاسادى. «سەرجانتتىق قوزعالىس ەلىمىزدىڭ قارۋلى كۇشتەرىنە 2003 جىلدان باستاپ ەنگىزىلدى. اۋەلدە قيىنشىلىقتار, تۇسىنبەۋشىلىكتەر بولدى. الايدا, ءبىر ادامداي جۇمىلىپ, سەرجانتتار قوزعالىسىن جاقسى جولعا قويا بىلدىك. سول كەزدە مەنىڭ قول استىمدا جۇمىس ىستەگەن باتالون سەرجانتتارىنىڭ كوبى قازىر قورعانىس مينيسترلىگىندە, باسقا وكرۋگتەردە, اسكەري بريگادالاردا ادال قىزمەت اتقارىپ ءجۇر», دەيدى ءبولىمنىڭ ەڭ العاشقى سەرجانت بريگاداسى بولعان, ارتيللەريالىق قوندىرعىنىڭ تەحنيگى, ۆزۆود كومانديرى قىزمەتتەرىن اتقارعان قايرات ءجۇنىسوۆ.
ءيا, بۇگىندە وسكەمەندەگى 27943 اسكەري ءبولىمىنىڭ ساربازدارى ەلدىڭ شەبىن ابىرويمەن قورعاپ, جاۋىنگەرلىك سەرتتەرىنە ادالدىق تانىتىپ كەلەدى. مۇنى ءبولىمنىڭ 25 جىلدىعىنا ارنالعان سالتاناتتى جيىندا «شىعىس» وڭىرلىك قولباسشىلىعى اسكەرلەر قولباسشىسىنىڭ ورىنباسارى, پولكوۆنيك الەكساندر ءاشىروۆ ەرەكشە اتاپ ءوتتى. «اسكەري ءبولىم ءاردايىم الدىڭعى ساپتان كورىنىپ ءجۇر. ەكىنشى موتواتقىشتار باتالونى بيىل قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ اسكەري بولىمدەرى مەن قۇرىلىمدارىنىڭ باتالوندارى اراسىنداعى «مەرگەندەر باتالونى» سايىسىندا 1-ورىن الدى. جاقىندا قۇرلىق اسكەرلەرى قاراۋىل قىزمەتى بويىنشا تەكسەرۋ جۇرگىزگەندە ءبولىم جوعارى بالل يەلەندى. مۇنىڭ ءوزى بريگادانىڭ تۇتاستىعى مەن ۇيىمشىلدىعىن اڭعارتسا كەرەك», دەيدى قولباسشى ورىنباسارى.
ازامات قاسىم,
«ەگەمەن قازاقستان»
وسكەمەن
