BBC
ارمەنيا پارلامەنتىنىڭ دەپۋتاتتارى نيكولا پاشينياندى پرەمەر-مينيستر قىزمەتىنە سايلامادى. بۇل شەشىمگە قارسى حالىق نارازىلىق شەرۋىنە شىقتى.
ارمەنيا بيلىگى اۋىسادى دەپ كۇتىلگەن 1 مامىر كۇنى ون مىڭداعان حالىق الاڭعا جينالىپ, جاقسى جاڭالىق كۇتتى. جينالعان جۇرت سەرج سارگسيان باسقارعان بيلىك ارمەنيانى «ارتتا قالعان» مەملەكەتكە اينالدىرىپ جىبەردى دەپ شۋلادى. تۇسكى 12-دە تىكەلەي ەفيردەن كورسەتىلە باستاعان ۇلتتىق جينالىس 8 جارىم ساعاتقا سوزىلدى. وتىرىسقا 105 دەپۋتاتتىڭ 102-ءسى قاتىستى. ونىڭ 45-ءى ن.پاشينياننىڭ كانديداتۋراسىن قولداسا, 56-سى قارسى داۋىس بەردى.
نيكولا پاشينيان ءوز باعدارلاماسىن تانىستىرىپ, 26 دەپۋتاتتىڭ سۇراعىنا جاۋاپ بەردى. وعان پرەمەر بولىپ سايلانۋ ءۇشىن 53 داۋىس, ياعني, رەسپۋبليكالىق پارتيا دەپۋتاتتارىنىڭ داۋىسى كەرەك ەدى. ءوز سوزىندە ول «سىزدەردەن ارمەنيانىڭ بولاشاعى ءۇشىن ەشقانداي قۇرباندىق كەرەك ەمەس. تەك حالىق كانديداتىن پرەمەر-مينيستر قىزمەتىنە تاعايىنداساڭىزدار بولعانى», دەدى.
وتىرىس بارىسىندا ن.پاشينياننىڭ پرەمەر-مينيستر لاۋازىمىنا سايلانباعانىن ۆيتسە-پرەمەر ەدۋارد شارمازانوۆ ايتتى. دەپۋتاتتاردىڭ كوبى كانديداتتىڭ باعدارلاماسى ناقتى ەمەس ەكەنىن, سىبايلاس جەمقورلىق پەن قاۋىپسىزدىكتى كۇشەيتۋگە بايلانىستى جوسپارىنىڭ جوق ەكەنىن جەتكىزدى.
كونستيتۋتسيا بويىنشا پاشينيانعا تاعى ءبىر مۇمكىندىك بەرىلمەك. 8 مامىر كۇنى تاعى سايلاۋ وتەدى. ەگەر دەپۋتاتتار ونى سايلاماسا, بيلىك ۋاقىتشا ۇكىمەتكە وتەدى دە, جاڭا پارلامەنتتىك سايلاۋ بەلگىلەنەدى.
NYTIMES
وڭتۇستىك كورەيا سولتۇستىكپەن شەكاراداعى ۇگىت-ناسيحاتتى توقتاتادى
دۇيسەنبى كۇنى وڭتۇستىك كورەيا وسى اپتادا سولتۇستىك كورەيامەن شەكاراداعى داۋىس زورايتقىشتاردى الىپ تاستايتىنىن مالىمدەدى. ون جىلدان استام ۋاقىت بويى بۇل قۇرىلعىلار ارقىلى سولتۇستىككە قاتىستى ۇگىت-ناسحاتار مەن ءتۇرلى جاعىمسىز مۋزىكا قويىلاتىن ەدى. وڭتۇستىك كورەيا بيلىگى بۇل شەشىمدى كورەياارالىق سامميت ناتيجەسىندە قابىلدانعان كەلىسىمدى جۇزەگە اسىرۋ ءۇشىن جانە سولتۇستىك كورەيا سولتۇستىك پەن وڭتسۇتىكتىڭ ۋاقىت ارالىعىن تەڭەستىرەتىنىن مالىمدەگەننەن كەيىن قابىلداعانىن ايتتى.
سولتۇستىك كورەيا 2015 جىلى «پحەنيان ۋاقىتىن» قابىلداپ, وڭتۇستىك كورەيادان 30 مينۋتقا كەرى شەگەرگەن بولاتىن. ال وڭتۇستىك كورەيا 250 كيلومەترگە جۋىق داۋىس زورايتقىشتاردى سەيسەنبى كۇنى الىپ تاستاي باستادى. بۇل وڭتۇستىك كورەيانىڭ پسيحولوگيالىق سوعىس جۇرگىزۋدەگى نەگىزگى قۇرالى بولعان ەدى. داۋىس زورايتقىشتارى ارقىلى كۇنى-ءتۇنى سولتۇستىكتەگى ادام قۇقىقتارىنىڭ شەكتەلۋى تۋرالى سىن, دورەكى مۋزىكا قويىلىپ جۇرگەن. وتكەن جۇما كۇنى ەكى ەل پرەزيدەنتتەرى كەزدەسەتىن كەزدە حابار تاراتۋ ۋاقىتشا توقتاتىلدى.
The Guardian
پلاستيك جەيتىن باكتەريا تابىلدى
اعىلشىن عالىمدارى پلاستيكالىق بوتەلكەلەرمەن قورەكتەنەتىن جاڭا باكتەريا ءتۇرىن تاپتى. بۇل جاڭالىق قازىرگى تاڭدا الەمدى جاۋلاعان پلاستيكالىق لاستانۋمەن كۇرەسۋگە كومەكتەسپەك.
ەڭ قىزىعى, عالىمدار جاڭا فەرمەنتتى ويلاماعان جەردەن تاپقان ەكەن. 2016 جىلى جاپونياداعى قوقىستاردا پلاستيكالىق ونىمدەرمەن قورەكتەنەتىن باكتەريا بار ەكەنى تۋرالى جاڭالىق جاريالانعانى بەلگىلى. اتالعان فەرمەنتتى زەرتتەپ, ونىڭ قالاي داميتىنىن باقىلاۋعا تالپىنعان عالىمدار مولەكۋلانى ودان بەتەر كۇشەيتە تۇسكەن. ياعني, باكتەريالاردىڭ پلاستيكالىق ونىمدەردى جويۋ قابىلەتى ارتقان.
پورتسمۋت ۋنيۆەرسيتەتىنىڭ پروفەسسورى, زەرتتەۋ جۇمىسىنىڭ جەتەكشىسى دجون ماكگيحەننىڭ ايتۋىنشا, بۇل جاڭالىقتىڭ ماڭىزى وتە زور. مۋتاتسياعا ۇشىراعان باكتەريا بىرنەشە كۇن ىشىندە كەز كەلگەن پلاستيكتىڭ «تاس-تالقانىن» شىعارادى. تابيعي جاعدايدا ونداي ونىمدەردىڭ جويىلۋى ءۇشىن عاسىرلار قاجەت ەكەنى بەلگىلى. عالىمدار باكتەريانى جەتىلدىرە ءتۇسىپ, كەڭ كولەمدە قولدانىسقا ەنگىزۋگە نيەتتى.
ايتا كەتەرلىگى, الەمدە مينۋتىنا ميلليون پلاستيكالىق بوتەلكە ساتىلادى. ونىڭ 14 پايىزى عانا قايتا وڭدەلەدى ەكەن. ال باسىم بولىگى مۇحيتقا اعىپ كەتەدى. ناتيجەسىندە تەڭىز جانۋارلارى ۋلانىپ, مۇحيتتاردا پلاستيكالىق «ارالدار» پايدا بولعان.
دايىنداعان
گۇلنۇر قۋانىشبەكقىزى,
«ەگەمەن قازاقستان»
