ەلىمەن بىرگە ەڭسەلەنىپ وتىر

ەلىمىز تاۋەلسىزدىك العاندا مەن 60 جاسقا تولعان ەدىم. قازىر سەكسەننىڭ سەڭگىرىندەمىن. زەينەتكەرلىككە شىققانىما دا جيىرما جىل تولدى. وسى جيىرما جىلدا ەلىمىز ەلباسىمەن بىرگە تالاي اسۋلار مەن تار جول, تايعاق كەشۋلەردەن ءوتتى. نارىقتىڭ وتپەلى كەزەڭىندە ەلدەگى ءتۇستى مەتاللۋر­گيا­نىڭ الىپتارى – وسكەمەن قورعاسىن-مىرىش, تيتان-ماگني كومبيناتتارى, ءۇلبى مەتاللۋرگيا زاۋىتى, باسقا دا ونداعان كاسىپورىندار جابىلۋدىڭ ءسال الدىندا تۇردى. مىنە, ەلدىك پەن ەرلىك سىنالار وسىنداي ساتتە ەلباسى نۇرسۇلتان نازارباەۆ كەندى التايعا بىرنەشە رەت كەلىپ, تيتىقتاعان كاسىپورىنداردىڭ «ەكىنشى عۇمىرىن» باس­تات­قانىن كونەكوز قاريالاردىڭ قاتارىندا مەن دە كورگەن ەدىم. شەتەلدىك ينۆەستورلار مول قارجى قۇيدى, قازىر اتى اتالعان كاسىپورىندار ەل ەكونوميكاسىن كوتەرۋگە لايىقتى ۇلەس قوسىپ كەلەدى. بۇقارالىق اقپارات قۇرالدارىنان حالقىمىزدىڭ ءبىرتۋار ۇلى نۇرسۇلتان ءابىش ۇلى نازارباەۆقا «حالىق قاھارمانى» اتاعىن بەرۋ  تۋرالى ۇسىنىس قۇپ الىنعانى جونىندە ەستىگەن كەزىمدە, كوز الدىما جاڭاعى وقيعالار ەلەستەدى. شىن مانىندە ەلباسى قانداي قۇرمەتكە دە لايىق, مۇنىڭ الدىندا جوعارى ماراپاتقا ۇسىنعان كەزدە ودان باس تارتقانىن قاراپايىمدىلىقتىڭ ۇلگىسى رەتىندە قابىلداعان بولاتىنبىز. نۇرسۇلتان بالام, ەلىڭ مەن توبەگە كوتەرەتىن ازاماتتارىڭ ءوزىڭدى جوعارى اتاققا ورنىمەن ءارى دەر كەزىندە ۇسىندى دەپ ەسەپتەيمىن. شىن مانىندە ءسىز ۇلى تۇلعاسىز, حالىق ارداقتايتىن ازاماتسىز. باسقاسىن بىلاي قويعاندا, ءبىر جىل ىشىندە قازاقستاندا نەبىر كەرەمەت وقيعالار ءوتتى. ەقىۇ-عا توراعالىق ەتتىك, ۇيىمنىڭ ءسامميتىن ۇيىمداستىردىق. ازيا ويىندارىن دۇركىرەتىپ وتكىزۋ دە ابىرويىمىزدى ارتتىرا ءتۇستى. ەندى, مىنە, ارادا بەس-التى جىلدان كەيىن دۇنيەجۇزىلىك ۋنيۆەرسيادا الماتىدا وتپەك. دەمەك, قازاقستاننىڭ كوركەيۋى, ءوسىپ-وركەندەۋى ءسىزدىڭ بيىك بەدەلىڭىزدىڭ ارقاسى ەمەس دەپ كىم ايتار ەكەن؟ ەلىمەن ەتەنە ەلباسىمەن بىرگە تاۋەلسىزدىكتىڭ 20 جىلدىق مەرەيتويىن ەل ەسىندە قالارلىقتاي ءماندى دە ءساندى وتكىزەتىنىمىز داۋسىز. ەندەشە, ەلىمىزدى تەك بيىكتەردەن كورۋگە جازسىن! مامىربەك تۇرعانباەۆ, زەينەتكەر, قازاق كسر-ءىنىڭ ەڭبەك سىڭىرگەن ۇستازى. وسكەمەن.