كوپتەن بەرى ورەلى ونەرىمەن كوزگە ءتۇسىپ جۇرگەن نۇرسۇلتان قاسىمحانوۆتىڭ ەسىمى قالىڭ كورەرمەنگە ەتەنە تانىس. سپورتتىق مانسابىن قازاق كۇرەسىنەن باستاعان الماتى وبلىسى, الاكول اۋدانىنىڭ تۋماسى وسى كۇنگە دەيىن 8 كەزدەسۋ وتكىزىپ, 7 رەت جەڭىسكە جەتتى. بىلتىر ول الماتىدا وتكەن گران-پري تۋرنيرىندە 66 كيلو سالماق دارەجەسىندە قارسىلاس شاق كەلتىرمەي, باس جۇلدەگە تىگىلگەن «تەمىر تۇلپاردى» تىزگىندەدى. سودان نۇرسۇلتانعا بەدەلى جاعىنان الەمدە العاشقى ۇشتىككە ەنىپ وتىرعان اسۆ (Absolute Championship Berkut) ۇيىمى باسشىلارىنىڭ كوزى ءتۇستى. قوس تاراپ 4 جەكپە-جەك وتكىزۋ جونىندەگى كەلىسىمشارتقا قول قويدى. «سۇلتان» دەگەن لاقاپ اتپەن تانىمال قانداسىمىز تۇساۋكەسەر كەزدەسۋىن 21 ساۋىردە يتاليادا وتكىزەدى. قاسىمحانوۆتىڭ قارسىلاسى – شۆەتسيا سپورتشىسى.
29 ساۋىردە چەشەنستاننىڭ گروزنىي قالاسىندا اسۋ الماباەۆ پەن جەرگىلىكتى سپورتشى ءشامىل احماەۆ ايقاسادى. قازىرگى كەزگە دەيىن اسۋ 8 باسەكە وتكىزىپ, 6 رەت باسىمدىق تانىتتى. قارسىلاسى 6 رەت كۇش سىناسىپ, سول كەزدەسۋلەردىڭ تەڭ جارىسىندا جەڭىس تويىن تويلادى.
كوپشىلىك تاعاتسىزدانا كۇتكەن باسەكەلەر 5 مامىردا ماسكەۋدە وتەدى. اتاقتى اسۆ نۇسقاسى بويىنشا ۇيىمداستىرىلىپ وتىرعان ءدۇبىرلى دودادا الاشتىڭ قوس ماقتانىشى – ارمان «سۇڭقار» وسپانوۆ (65,8 كيلو) پەن اسىلجان «ساق» باقىتجان ۇلى (93 كيلو) ونەر كورسەتەدى. ەكەۋىنىڭ دە ءجۇرىپ وتكەن جولى جانكۇيەرلەردىڭ كوز الدىندا. ەرەجەسىز جەكپە-جەكتەن وتكەن 10 جەكپە-جەكتە 8 رەت جەڭىسكە جەتكەن 28 جاستاعى ارمان وسپانوۆ ارمەنيالىق اكوپ ستەپانيانمەن سايىسقا تۇسەدى. وڭتۇستىك قازاقستان وبلىسى, تولە بي اۋدانىنىڭ تۋماسى 2017 جىلعا دەيىن قارسى كەلگەندەردىڭ بارلىعىن قوعاداي جاپىرعان ەدى. تەك سوڭعى ەكى كەزدەسۋدە قانداسىمىزدىڭ جولى بولمادى. دەسەك تە وسى قوس ساتسىزدىكتىڭ وزىندىك سەبەپ-سالدارى بار. برازيليالىق تياگو سيلۆامەن ول جاراقاتىنان ايىقپاي شىقسا, رەسەيلىك الەكسەي پولپۋدنيكوۆپەن بولعان باسەكەدە تورەشىلەر بۇرا تارتقانىنا بارشا جۇرت كۋا. ال 31 جاستاعى اكوپ ستەپانيان «مەرگەن» دەگەن لاقاپ اتپەن تانىمال. قاپ تاۋىنىڭ قىرانى كۇنى بۇگىنگە دەيىن 35 كەزدەسۋ وتكىزىپ, 25 رەت باسىمدىق تانىتتى.
الماتىلىق اسىلجان باقىتجان ۇلى 7 باسەكەنىڭ بارلىعىندا ءوز قارسىلاستارىن كۇمانسىز ۇتتى. بىلتىرعى جىلدىڭ سوڭىندا اسۆ نۇسقاسىنداعى كەزدەسۋىندە 26 جاستاعى ورەنىمىز رەسەيلىك ءمۇسىلىم ماحمۋدوۆتى ەسىنەن تانعانشا ساباپ, كوپشىلىكتىڭ قوشەمەتىنە بولەندى. بۇل جولى ول تاعى ءبىر جەرگىلىكتى سپورتشى ءمۇسىلىم ماگومەدوۆپەن ايقاسادى.
عالىم سۇلەيمەن,
«ەگەمەن قازاقستان»
الماتى
