«روما» شيرەك فينالدا «بارسەلوناعا» قارسىلاس اتانعان كەزدە, ريمدىك جانكۇيەرلەردىڭ كوڭىلى ءتۇسىپ كەتتى. ارينە, قۇرامىندا مەسسي مەن سۋارەس سەكىلدى سايىپقىراندارى بار كومانداعا قارسى ويناۋ مولاعا جۇگىرگەنمەن تەڭ. «بارسەلونانىڭ» دا الەمدەگى كوپتەگەن فاناتتارى جەرەبە جولداس بولدى دەپ, بوركىن اسپانعا اتتى. «نوۋ كامپتاعى» العاشقى ويىن 4:1 بولعان سوڭ, بۇل كۇماننىڭ بەتى ودان ءارى سەيىلە ءتۇستى. تەك ويىننىڭ سوڭىنا قاراي ەدين دجەكونىڭ سوعىپ كەتكەن گولى كوڭىلگە كىربىڭ تۇسىرگەن.
جاۋاپتى ويىن الدىندا وسى گولدىڭ ماڭىزدى ەكەنى انىق سەزىلدى. ەگەر «روما» ءوز الاڭىندا 3:0 ەسەبىمەن جەڭىسكە جەتەتىن بولسا, كەلەسى كەزەڭگە ءوتۋى مۇمكىن. ۇزىلگەلى تۇرعان ءۇمىت ءجىبىن شابۋىلشى ەدين دجەكو ويىننىڭ 6 مينۋتىندا قايتا جالعادى. دەگەنمەن, ءالى دە 2 گول كەرەك. ول ەكى گولدى سوعامىن دەپ جۇرگەندە قاقپاعا مەسسي باستاعان مىقتىلار ءبىر گول سوقسا – وندا ءبارى كۇل تالقان بولادى. قورعانىستى مىعىم ۇستاپ, شاۋىلدا شيراق قيمىلداۋ قاجەت ەدى. سول باياعى دجەكو پيكەمەن الىسىپ ءجۇرىپ, ايىپ الاڭىندا قۇلاپ قالدى. جەرار پيكە الىپ شابۋىلشىنى قولىنان تارتىپ قۇلاتقانىن تورەشى انىق بايقادى. پەنالتيدى دە روسسي ءدال ورىندادى. ودان كەيىن كەزدەسۋدىڭ قاھارمانى بوسنيالىق شابۋىلشى ەدين دجەكو بۇرىشتاما دوبىن كوتەرەتىن مۇمكىندىك جاسادى. سول بۇرىشتاماعا كەلگەن قورعاۋشى كوستاس مانولاس تەر شتەگەننىڭ تەرلەپ قورعاعان قاقپاسىنا ءۇشىنشى گولدى سوقتى. عاسىرلىق تاريحى بار «وليمپيكو» ستاديونى مۇنداي عاجاپتى كورمەگەنىنە ءبىرشاما بولعان. بۇل ناعىز ەجەلگى ريم ەرتەگىسىندەي ەدى. «روما» چەمپيوندار ليگاسىنىڭ جارتىلاي فينالىنا ءوتتى.
سوڭعى رەت «روما» 1984 جىلى ءتاۋىر ونەر كورسەتتى دەدىك. سول جىلى ولار پلەي-وففتىڭ 1/8 فينالىندا سوفيانىڭ تسسكا كلۋبىمەن كەزدەسەدى. اتاعىنان ات ۇركىپ تۇرعان بولگاريالىقتاردى جەڭۋدىڭ ءوزى وڭايعا سوقپاعان. ءبىر قىزىعى سول كەزدە «روماعا» قارسى وتكەن 2 ويىندا تسسكا ساپىندا قىزىلوردالىق «قايساردىڭ» قازىرگى باس باپكەرى ستويچو ملادەنوۆ الاڭعا شىققان. تسسكانى اينالىپ وتكەن سوڭ يتاليالىقتار شيرەك فينالدا بەرليننىڭ «دينامو» كومانداسىمەن كۇش سىناسادى. وسى ويىنداردا كوماندانىڭ جارتىلاي قورعانىسىندا كەيىننەن اتاقتى باپكەر بولعان كارلو انچەلوتتي ونەر كورسەتكەن. شۆەد باپكەرى نيلس ءليدحولمنىڭ باستاۋىمەن «روما» فينالعا شىعىپ, وندا «ليۆەرپۋلگە» پەنالتي سەرياسىندا جەڭىلىپ قالادى. ايتپاقشى, «مانچەستەر سيتي» كومانداسىن ەكى ويىندا دا جەڭگەن «ليۆەرپۋل» بيىل «رومامەن» تاعى دا كەزدەسىپ قالۋى ىقتيمال. ونى 13 ءساۋىر, جۇما كۇنى بولاتىن جەرەبە شەشپەك. جەرەبەنى اتاقتى ۋكراين شابۋىلشىسى اندرەي شەۆچەنكو جۇرگىزەدى.
«روما» - «بارسەلونا» 3:0
گولدار: ەدين دجەكو 6, دانيەلە دە روسسي 58 (پەنالتي), كوستاس مانولاس 82.
ەرمۇحامەد ماۋلەن,
«ەگەمەن قازاقستان».
