كەڭەس بارىسىندا استانا اكىمى ءا. يسەكەشەۆ, اقمولا وبلىسىنىڭ اكىمى م. مىرزالين جانە سولتۇستىك قازاقستان وبلىسىنىڭ اكىمى ق. اقساقالوۆ اعىمداعى جىلدىڭ ءى توقسانىندا اتقارىلعان جۇمىستار جانە ەكونوميكا سالالارىن دامىتۋ, يندۋستريالاندىرۋ, تەحنولوگيالىق جاڭعىرتۋ جانە تسيفرلاندىرۋ جۇمىستارىن جۇرگىزۋ, ينۆەستيتسيالار تارتۋ جانە ەڭبەك ونىمدىلىگىن قامتاماسىز ەتۋ ماسەلەلەرى بويىنشا 2018 جىلعا ارنالعان جوسپارلار تۋرالى باياندادى.
ەلوردانى دامىتۋ تۇرعىسىنان تۋريزم, ساۋدا, جاپپاي كاسىپكەرلىك, ينۆەستيتسيالار تارتۋ جانە ءونىمدى جۇمىسپەن قامتۋ, ونىڭ ىشىندە ەڭبەك نارىعىنىڭ ينفراقۇرىلىمىن جاڭعىرتۋ جانە ەڭبەككە جۇمىلدىرۋ ماسەلەلەرىنە باسا نازار اۋدارىلدى.
وبلىستاردىڭ جۇمىستارىنىڭ باعىتتارى اوك-ءتى, ءتۋريزمدى, ءبىلىم بەرۋ سالاسىن, دەنساۋلىق ساقتاۋ سالاسىن, جاپپاي كاسىپكەرلىكتى دامىتۋ, سونداي-اق يندۋستريالاندىرۋ, ءونىمدى جۇمىسپەن قامتۋ, قارجىلىق تۇراقتىلىق, تەحنولوگيالىق جاڭارتۋ جانە ەكونوميكانى تسيفرلاندىرۋ سالالارىنا نەگىزدەلگەن.
كەڭەس بارىسىندا ماسەلەلەردى تالقىلاۋعا ۇلتتىق ەكونوميكا ءمينيسترى ت. سۇلەيمەنوۆ, قارجى ءمينيسترى ب. سۇلتانوۆ, دەنساۋلىق ساقتاۋ ءمينيسترى ە. ءبىرتانوۆ, مادەنيەت جانە سپورت ءمينيسترى ا. مۇحامەدي ۇلى, ەڭبەك جانە حالىقتى الەۋمەتتىك قورعاۋ ءمينيسترى م. ابىلقاسىموۆا, ينۆەستيتسيالار جانە دامۋ ءبىرىنشى ۆيتسە-ءمينيسترى ر. سكليار جانە اۋىل شارۋاشىلىعى ۆيتسە-ءمينيسترى گ. يساەۆا قاتىستى.
