مەملەكەت باسشىسى راسىمگە قاتىسۋشىلاردى قازاقستانداعى ديپلوماتيالىق ميسسيالارىنىڭ باستالۋىمەن قۇتتىقتاپ, ولاردىڭ قىزمەتتەرى مەملەكەتارالىق قارىم-قاتىناستاردى دامىتۋعا تىڭ سەرپىن بەرەتىنىنە سەنىم ءبىلدىردى.
– سىزدەردىڭ ديپلوماتيالىق قىزمەتتەرىڭىز ەلىمىز ءۇشىن مازمۇندى ءارى ماڭىزدى وقيعالارعا تولى كەزەڭدە باستالعالى تۇر. قازاقستان شيرەك عاسىر ىشىندە دەموكراتيالىق جۇيەسى ورنىققان, ازاماتتىق قوعامى كەمەلدەنگەن, ەكونوميكاسى دامىعان مەملەكەتكە اينالدى, – دەدى نۇرسۇلتان نازارباەۆ.
قازاقستان پرەزيدەنتى ەلىمىزدە حالىقارالىق بايلانىستاردى نىعايتۋعا باعىتتالعان كوپجاقتى سىرتقى ساياسات جالعاسا بەرەتىنىن اتاپ ءوتتى.
– ءبىز بەيبىتشىلىك پەن قاۋىپسىزدىكتى حالىقارالىق قۇقىق نەگىزىندە نىعايتۋدى كوزدەيتىن ءىس-ارەكەتتەردى قولدايمىز. بۇعان قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندە اتقارىپ كەلە جاتقان قىزمەتى دالەل, – دەدى مەملەكەت باسشىسى.
نۇرسۇلتان نازارباەۆ ەلىمىزدىڭ بىتىمگەرشىلىك جۇمىستارعا بەلسەندى اتسالىسىپ وتىرعانىنا نازار اۋدارىپ, سيرياداعى قاقتىعىستاردى رەتتەۋ ىسىندە استانا پروتسەسىنىڭ ايرىقشا ءرول اتقاراتىنىن ايتتى.
سونىمەن قاتار, قازاقستان پرەزيدەنتى ەۋرازيالىق ەكونوميكالىق وداق, شانحاي ىنتىماقتاستىق ۇيىمى, تمد جانە ۇجىمدىق قاۋىپسىزدىك تۋرالى شارت ۇيىمى سياقتى حالىقارالىق ۇيىمدار اياسىندا بىرلەسە ءىس-قيمىل جۇرگىزۋدىڭ ماڭىزدىلىعىن اتاپ ءوتتى.
مەملەكەت باسشىسى ەلىمىزدىڭ الەۋمەتتىك-ەكونوميكالىق دامۋ ناتيجەلەرىنە توقتالىپ, قازاقستاندا ينۆەستيتسيا تارتۋ ءۇشىن قالىپتاسقان مۇمكىندىكتەر جونىندە ايتتى.
نۇرسۇلتان نازارباەۆ «جاسىل» تەحنولوگيالاردى دامىتۋ جونىندەگى حالىقارالىق ورتالىقتىڭ, ءىت-ستارتاپتار تەحنوپاركىنىڭ, «استانا» حالىقارالىق قارجى ورتالىعىنىڭ جۇمىسى تۋرالى ايتىپ, ديپلوماتتاردى وسى باعىتتا بەلسەندى تۇردە ىنتىماقتاسۋعا شاقىردى.
– ءوزارا ءتيىمدى ساۋدا-ەكونوميكالىق ىنتىماقتاستىقتى نىعايتۋ ءۇشىن قازاقستانداعى زور مۇمكىندىكتەردى كەڭىنەن پايدالانۋ قاجەت. بيىل ءبىزدىڭ ەلىمىزدە بىرقاتار ماڭىزدى حالىقارالىق ءىس-شارالار جوسپارلانىپ وتىر. اتاپ ايتقاندا, استانا ەكونوميكالىق فورۋمى, الەمدىك جانە ءداستۇرلى ءدىن كوشباسشىلارىنىڭ VI سەزى جانە دۇنيەجۇزىلىك يسلام ەكونوميكالىق فورۋمى وتەدى. وسى باسقوسۋلارعا سىزدەردىڭ ەلدەرىڭىز بەلسەنە قاتىسادى دەپ ويلايمىن, – دەدى قازاقستان پرەزيدەنتى.
نۇرسۇلتان نازارباەۆ قازاقستان مەن رەسەي فەدەراتسياسى اراسىندا قالىپتاسقان مەملەكەتارالىق قارىم-قاتىناستىڭ جوعارى دەڭگەيدە ەكەنىن ايتىپ, ىنتىماقتاستىقتى ودان ءارى نىعايتا ءتۇسۋ باعىتى ەكى ەل حالقى تاراپىنان كەڭ قولداۋ تاۋىپ وتىرعانىن اتاپ ءوتتى.
– مەن رەسەي پرەزيدەنتى ۆلاديمير ۆلاديميروۆيچ پۋتينمەن دوستىققا نەگىزدەلگەن جەكە قارىم-قاتىناسىمىزدى جوعارى باعالايمىن. حالىقتارىمىزدىڭ يگىلىگى جولىندا قازاقستان ەكىجاقتى فورماتتا دا, حالىقارالىق كۇن ءتارتىبى اياسىندا دا رەسەيمەن بايلانىستى كەڭەيتە تۇسۋگە نيەتتى, – دەدى قازاقستان پرەزيدەنتى.
ءراسىم بارىسىندا مەملەكەت باسشىسى نۇرسۇلتان نازارباەۆ وزبەكستان پرەزيدەنتى شاۆكات ميرزيوەۆتىڭ قازاقستان-وزبەكستان قارىم-قاتىناسىن ودان ءارى نىعايتۋعا زور ۇلەس قوسقانىن اتاپ ءوتتى.
– ءبىزدى وزبەكستان رەسپۋبليكاسىمەن كوپعاسىرلىق دوستىق قاتىناستار, مادەنيەتىمىز بەن سالت-ءداستۇرىمىزدىڭ ورتاقتىعى تىعىز بايلانىستىرىپ وتىر. قازاقستانداعى وزبەكستان جىلىنىڭ باستالۋى جانە كەلەسى جىلى باۋىرلاس وزبەكستانداعى قازاقستان جىلىنىڭ اتاپ ءوتىلۋى جاڭا كەزەڭگە جول اشىپ, ىنتىماقتاستىعىمىزدىڭ بارلىق سالاسىنا تىڭ سەرپىن بەرەتىن بولادى, – دەدى قازاقستان پرەزيدەنتى.
مەملەكەت باسشىسى قازاقستاننىڭ تۇرىكمەنستانمەن كوپجاقتى ىنتىماقتاستىقتى ودان ءارى نىعايتۋعا نيەتتى ەكەنىن ايتتى.
– بۇگىندە ورتالىق ازياداعى باۋىرلاس مەملەكەتتەر – قازاقستان مەن تۇرىكمەنستاندى تاتۋ كورشىلىك قاتىناستار بايلانىستىرادى. ەلدەرىمىز اراسىندا سەنىمدى ءارى سىندارلى ديالوگ ورناپ, بارلىق باستى باعىتتار بويىنشا ءوزارا تۇسىنىستىكتىڭ جوعارى دەڭگەيىنە قول جەتكىزىلدى, – دەدى نۇرسۇلتان نازارباەۆ.
قازاقستان پرەزيدەنتى يتاليا رەسپۋبليكاسىمەن ساۋدا-ەكونوميكالىق بايلانىستاردىڭ دامىپ كەلە جاتقانىنا ەرەكشە توقتالدى.
– يتاليا قازاقستاننىڭ ساۋدا سالاسىنداعى ارىپتەستەرىنىڭ ۇزدىك ۇشتىگىنە كىرەدى جانە بۇل كورسەتكىش بويىنشا ەۋرووداق ەلدەرى اراسىندا ءبىرىنشى ورىن الىپ وتىر. سونداي-اق, يتاليا – ەلىمىزدىڭ ەكونوميكاسىنا قارجى قۇيىپ وتىرعان ءىرى ينۆەستورلاردىڭ ءبىرى. قازاقستان يتاليامەن جان-جاقتى ىنتىماقتاستىقتى, سونىڭ ىشىندە يننوۆاتسيالار مەن وزىق تەحنولوگيالار سالاسىنداعى بايلانىستاردى ودان ءارى دامىتۋعا نيەتتى, – دەدى مەملەكەت باسشىسى.
سوڭىندا نۇرسۇلتان نازارباەۆ ديپلوماتتاردى تاعى دا قۇتتىقتاپ, ەكىجاقتى قارىم-قاتىناستاردى نىعايتۋ جولىنداعى قىزمەتتەرىنە تابىس تىلەدى.
