«جىر جۇلدىزى ماعجان پوەزياسى–ۇلتتىق رۋحانيات مەكتەبى» اتتى حالىقارالىق بايقاۋ بىرنەشە اتالىم بويىنشا ءوتىپ, اقمولا, سولتۇستىك قازاقستان وبلىستارىنان جانە كورشى رەسەيدەن جاس ونەرپازدار قاتىستى.
ءبىرىنشى كەزەڭ «ولەڭ-مەنىڭ شولپانىم, ايىم, كۇنىم» دەپ اتالدى. وندا ۇمىتكەرلەر اقىننىڭ جىرلارىن جاتقا وقۋدان جارىسقا ءتۇستى. پەتروپاۆلدىق ءدىلناز امانگەلديەۆا 90-عا جۋىق ولەڭىن مۇدىرمەي ايتادى ەكەن. ومبىلىق گۇلميرا مۇحامەدجانوۆا دا جاپ-جاقسى دايىندالىپ كەلىپتى. «تولقىننان تولقىن تۋادى» سىنىندا شايىردىڭ ءومىرى مەن شىعارماشىلىعى باياندامالارعا ارقاۋ ەتىلدى. كوكشەتاۋلىق ەردەن نۇراحمەتتىڭ زەرتتەۋ ىزدەنىستەرى ءسۇيسىندىردى. «اقىن دا ءبىر بالا عوي ايعا ۇمتىلعان» كەزەڭىندە ماعجاننىڭ جاس ءىزباسارلارى سىرشىل سەزىمگە, ليريزمگە تولى جىرلارىن شابىتتانا وقىدى. «ورانىپ گۇلگە توڭىرەك, اق سامال كەۋدە ۇرعانداي. اينالىپ جەرگە كۇبىرلەپ, جىر وقىپ ماعجان تۇرعانداي» سەكىلدى كەستەلى جىر شۋماقتارى مولىنان كەزدەستى.
قازىلار القاسىنىڭ ۇيعارىمىمەن ايىم امانگەلدى («تولقىننان تولقىن تۋادى»), قاراقات جۇماحمەت («ولەڭ–مەنىڭ شولپانىم, ايىم, كۇنىم») دامير باقىتجان («اقىن دا ءبىر بالا عوي ايعا ۇمتىلعان»), دياس اياعان («اقىنىن ارداقتايدى الاش باردا») جەڭىمپاز اتاندى. كاسىپكەر جومارت وماروۆ تاعايىنداعان سەگىز سەرى اتىنداعى جۇلدە ومبى وبلىسى ەسىلكول اۋدانى قاسقات اۋىلىنان كەلگەن سابينا وماروۆاعا تاپسىرىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
