مەرەكەلىك شارانى ۇيىمداستىرۋشىلار ىسمەرلەرگە ماتالاردى وزدەرىنىڭ وتباسىلىق قورجىندارىنان شىعارعان. الماتىلىق كاسىپكەر ءاليا ءابدىبايتوۆا بۇل باستامانىڭ توركىنى ۇلتتىق داستۇرىمىزدەن تامىر الاتىندىعىن ايتادى.
– ءاربىر قازاقتىڭ شاڭىراعىندا, سورەلەردە ساقتالعان سىيلىقتار بولادى. ادەتتە بۇلار: شاپاندار, ورامال, كەزدەمە ماتالار. ۇيگە كەلگەن قوناقتى قۇر قول شىعارماۋ ءداستۇرى الميساقتان كەلە جاتقان ءۇردىس. دۇنيە تاپشى بولعان زاماندا ماتا سىيلاۋ وزىندىك ۆاليۋتالىق سىي بولاتىن. بۇل ءالى كۇنگە دەيىن بار. بىزدەر وسىنداي ماتالاردى ءوز ءىسىنىڭ ناعىز كاسىپقويىنا بەرگەن كەزدە قانداي دۇنيە تۋاتىنىن كوپشىلىككە كورسەتىپ, وزىندىك سىناق جاساۋعا شەشىم قابىلدادىق, – دەيدى شارانى ۇيىمداستىرۋشىلار.
ەرەكشە سىناقتىڭ ناتيجەسىندە تاماشا كيىم ۇلگىلەرى تۋىپ, زاماناۋي ءسان ۇلگىلەرىنەن دە ادەمى كويلەكتەر تىگىلدى. ەتەگى جەر سىزعان جولبارىس تەرىلى كويلەكتى AWSM برەندىنىڭ ديزاينەرلەرى جاسادى. كوزدىڭ جاۋىن العان كوك قىسقا بالاق پەن ۇلتتىق ورنەكتەرى بار سۆيتشوتتى BRU برەندى تىكتى. ال Janellە ۇيدە كيىپ جۇرەتىن كۇلگىن ءتۇستى, بارقىت جەڭدى حالاتىمەن كورىندى. جاس ديزاينەردىڭ ءبىرى Diana Paukstyte ۇلەسىنە سارعىش جاسىل ءتۇستى ماتا بۇيىرىپتى. AR Selection برەندىنىڭ ديزاينەرلەرى وزىنە سەنىمدى بيكەشتىڭ بەينەسىن ءسان ۇلگىسىنە سىيدىرعان. Bahmali-ءدىڭ گۇلدى كوفتاسى مەن قىزعىلت ءتۇستى جۇقا بەلدەمشەسى دە رومانتيكالىق بيكەشكە جاراسا كەتتى. جينالعاندارعا بارىنەن بۇرىن Kiori برەندىنىڭ نازىك مايدا گۇلدى كويلەگى ۇنادى.
– مەن ءوز كويلەگىمدى «كانتري» ستيلىندە ءپىشىپ, جاعا-جەڭدەرىنە شىلتەردەن جەلبىرشەك سالدىم. ماتانىڭ ۇزىندىعى 4 مەتر, ساپاسى وتە تاماشا ەكەن. ەسكى ماتا دەۋگە قيمايسىڭ. مۇنداي كەزدەمەمەن جۇمىس ىستەگەن ماعان ادەمى اسەر سىيلادى, – دەيدى Kiori برەندىنىڭ اۆتورى گاۋھار احمەتوۆا.
سونىمەن كونە ماتالاردان تىگىلگەن كويلەكتەر اۋكتسيوندا ساتىلىپ, تۇسكەن قاراجات قايىرىمدىلىق قورلارىنا اۋدارىلدى. ءسان الەمىنىڭ مەرەكەلىك شاراسىنا قاتىسقاندار دوم ء«اۋتيزمدى جەڭەمىز» جوباسى مەن «اشىق الەم» قق تاربيەلەنۋشىلەرىنىڭ ونەرىنەن شىنايى ءلاززات الدى. ءومىر سۇرۋگە قۇشتار بۇلدىرشىندەر بۇل مەرەكەگە ۇلكەن دايىندىقپەن كەلگەنى جينالعانداردى تولقىتتى.
ايناش ەسالي,
«ەگەمەن قازاقستان»
الماتى
