فەستيۆالدىڭ اشىلۋ سالتاناتىندا ءسوز سويلەگەن ءبىلىم جانە عىلىم ۆيتسە-ءمينيسترى اسحات ايماعامبەتوۆ مەملەكەت باسشىسىنىڭ ءبىلىم بەرۋ سالاسىن دامىتۋ بويىنشا بەرگەن تاپسىرمالارى مەن العا قويعان مىندەتتەرىن ەسكە سالدى. وسى شارۋالار اياسىندا ەلىمىزدىڭ 800 مەكتەبىنە زەرتحانالار قويىلىپ, روبوت-تەحنيكا بويىنشا فاكۋلتاتيۆتىك كۋرستار ەنگىزىلگەنىن حابارلادى. «2020 جىلعا دەيىن رەسپۋبليكانىڭ بارلىق مەكتەبى روبوت-تەحنيكامەن, زەرتحانالارمەن, باعدارلامالاۋمەن قامتاماسىز ەتىلەدى», دەپ مالىمدەدى ول.
حالىقارالىق دەڭگەيدەگى شارانىڭ شىمىلدىعى روبوت-تەحنيكاعا ارنالعان كەرەك-جاراق, قۇرال-جابدىق, ادىستەمەلىك ماتەريالدار قويىلعان كورمەمەن اشىلدى. مۇندا 3D-پرينتەر ارقىلى بولشەكتەرى شىعارىلىپ, قۇراستىرىلعان ونىمدەر, بالالارعا جيناستىرۋعا ارنالعان روبوتتىڭ بازاسى, ۆيرتۋالدى الەمنىڭ ىشىنە ەنگىزەتىن قۇرىلعىلار جانە الىستى الدىڭا الىپ كەلەتىن كۆادروكوپتەرلەر كورەرمەن نازارىنا ۇسىنىلدى.
بيىلعى فەستيۆالعا پولشا, رەسەي, قىرعىزستان جانە قازاقستاننان كەلگەن 771 كوماندا قاتىسىپ, بولاشاق ينجەنەرلەر 32 اتالىم بويىنشا باق سىنادى. قولىنان ونەر تامعان ورەندەر 3D پرينتەرىنىڭ كومەگىنە سۇيەنىپ ءتۇرلى مودەلدەردى جاساپ شىعارسا, مەكتەپ جاسىنا دەيىنگى بالاقايلار روبوتتاردى قۇراستىرۋمەن اينالىستى. سونداي-اق جاسوسپىرىمدەر ۆيرتۋالدى شىندىق شلەمى جانە باسقارۋ ساۋساقتارى ارقىلى روبوت مودەلدەرىن جيناستىردى.
جالپى, «Roboland-2018» فەستيۆالى باستالماس بۇرىن وبلىستىڭ ماڭدايالدى عالىمدارى مەن بەلسەندى ۇستازدارى دوڭگەلەك ۇستەل باسىندا جيىن وتكىزگەن بولاتىن. ونداعى ماقسات – مەكتەپتەردەگى روبوت-تەحنيكا زەرتحانالارىنىڭ بازاسىندا تەحنوپاركتەر قۇرۋ جايىن تالقىلاۋ ەدى. سايىپ كەلگەندە, بۇل جوبا ىسكە اسىپ جاتسا, وبلىس وقۋشىلارىنىڭ روبوت قۇراستىرۋ ارقىلى زياتكەرلىك ءبىلىمى جەتىلە تۇسەر ەدى دەگەن پىكىر ءبىراۋىزدان ايتىلدى جيىن ۇستىندە.
قازىرگى تاڭدا جالپى ءبىلىم بەرۋ سالاسىندا روبوت-تەحنيكا ەرەكشە ماڭىزعا يە بولىپ, بۇل جوباعا باسا كوڭىل بولىنە باستاعانى بەلگىلى. ءبىلىم جانە عىلىم مينيسترلىگىندە روبوت-تەحنيكانى دامىتۋ ماسەلەلەرى بويىنشا رەسپۋبليكالىق ۇيلەستىرۋ كەڭەسىنىڭ قۇرىلعانى سوزىمىزگە دالەل. اتالعان كەڭەستىڭ قۇرامىنا مەملەكەتتىك ورگانداردىڭ, ۇكىمەتتىك ەمەس ۇيىمداردىڭ وكىلدەرى, اتا-انالار قوعامىنىڭ مۇشەلەرى مەن عالىمدار ەنگەن. سونىمەن قاتار ۇكىمەتتىڭ تاپسىرماسى بويىنشا, بيىل روبوت-تەحنيكا بويىنشا حالىقارالىق, رەسپۋبليكالىق جانە ايماقتىق سايىستار وتكىزۋدىڭ جول كارتاسى ازىرلەنىپ, بەكىتىلدى. ياعني الداعى ۋاقىتتا ەلىمىزدىڭ بارلىق وڭىرىندە روبوت-تەحنيكانى دامىتۋ بويىنشا اۋقىمدى جوبالار قولعا الىنباقشى. دوڭگەلەك ۇستەل بارىسىندا وبلىس ۇستازدارى تسيفرلى جۇيەگە كوشۋ, تەحنولوگيالاردى, روبوت-تەحنيكانى, سونىمەن بىرگە ءبىلىم بەرۋ روبوت-تەحنيكاسىن دامىتۋ ماسەلەلەرى بويىنشا ءوز پىكىرلەرىن ورتاعا سالدى.
سونىمەن فەستيۆالدىڭ ءۇشىنشى كۇنى وسىمەن ءتورتىنشى مارتە ءوتىپ تۇرعان حالىقارالىق روبوت-تەحنيكا, باعدارلامالاۋ جانە يننوۆاتسيالىق تەحنولوگيالار سايىسىنىڭ قورىتىندىسى شىعارىلدى. جالپىكوماندالىق ەسەپتە قاراعاندى وبلىسىنىڭ ۇجىمى 165 مەدالدى جەڭىپ الىپ, قارسىلاستارىنان قارا ءۇزدى. جۇلدەلى ەكىنشى ورىنعا قورجىنىنا 19 مەدال سالعان اقمولا وبلىسىنىڭ كومانداسى, ال ءۇشىنشى ورىندى ەلوردا كومانداسى قاناعات تۇتتى. استانالىقتاردىڭ ەنشىسىندە – 17 مەدال.
مەملەكەت باسشىسى «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندە 2018-2019 وقۋ جىلىندا تاعى 20 مىڭ گرانت ءبولۋ كەرەكتىگىن ايتتى. «بۇل ءتورتىنشى ونەركاسىپتىك رەۆوليۋتسيا جاعدايىنداعى جاڭا ەكونوميكادا زور سۇرانىسقا يە بولاتىن سان مىڭ جاڭا ماماندى دايارلاۋعا مۇمكىندىك بەرەدى. مۇندا ەڭ الدىمەن ينجەنەرلەر, اقپاراتتىق تەحنولوگيا, روبوت-تەحنيكا, نانوتەحنولوگيا سالاسىنىڭ ماماندارى تۋرالى ءسوز بولىپ وتىر. بۇل دا جاستارعا مەملەكەت قامقورلىعىنىڭ ايقىن كورىنىسى», دەگەن بولاتىن ەلباسى. وسى تۇرعىدان كەلگەندە, قاراعاندىدا وتكەن حالىقارالىق «Roboland-2018» فەستيۆالىنىڭ زاماناۋي تەحنولوگيانىڭ ۇشار بيىگىنە تالپىنعان زەردەلى جاسقا بەرەرى كوپ دەپ سەنىممەن ايتۋعا بولادى.
قايرات ءابىلدا,
«ەگەمەن قازاقستان»
قاراعاندى
سۋرەتتى تۇسىرگەن
لينار گاليموۆ
