شارانىڭ اشىلۋ سالتاناتىندا ءسوز العان اتالعان وقۋ ورنىنىڭ رەكتورى مۇحتار تولەگەن ەلباسىنىڭ «رۋحاني جاڭعىرۋ» باعدارلاماسى شەڭبەرىندە ۋنيۆەرسيتەت عالىمدارى بەس جىلدىڭ كولەمىندە «100 مونوگرافيا» سەرياسىن شىعارۋدى قولعا العانىن اتاپ ءوتتى.
«مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ جارىق كورگەنىنە تۋرا ءبىر جىل تولدى. ءبىر جىلدىڭ ىشىندە س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى وبلىس اكىمدىگىمەن بىرلەسە وتىرىپ كوپتەگەن جۇمىستار اتقاردى. كەشەندى باعدارلامانىڭ ءبىر جىلدىعىنا وراي ىستەلگەن جۇمىستاردىڭ ەسەبى رەتىندە 14 مونوگرافيالىق ەڭبەكتىڭ تۇساۋىن كەسىپ وتىرمىز», - دەگەن ۋنيۆەرسيتەت باسشىسى بيىل تاعى دا 15 مونوگرافيا جارىققا شىعاتىنىن جەتكىزدى.
شاراعا وبلىستىق ىشكى ساياسات باسقارماسىنىڭ باسشىسى نەللي كراسنوباەۆا دا قاتىسىپ, جاڭا وقۋلىقتار مەن مونوگرافيالار ستۋدەنتتەردىڭ ءبىلىمىن ودان ءارى جەتىلدىرە تۇسەتىنىنە سەنىم ءبىلدىرىپ, بۇل ەڭبەكتەردىڭ بارلىعى وقۋ ۇردىسىندە پايدالانىلۋى كەرەكتىگىن تىلگە تيەك ەتتى.
ازامات قاسىم,
«ەگەمەن قازاقستان»
وسكەمەن
سۋرەتتى تۇسىرگەن تىلەۋبەك شاياحمەت
