32 جاستاعى نورۆەگيالىق بياتلونشى وليمپيا ويىندارىنىڭ ءتورت دۇركىن چەمپيونى. سونداي-اق ول وليمپيادانىڭ ءۇش كۇمىس جانە ءبىر قولا مەدالىن جەڭىپ العان. سۆەنسەن ءوز كارەراسىندا 12 رەت الەم چەمپيوناتى جارىسىندا توپ جارسا, التى رەت تۇعىردىڭ ەكىنشى ساتىسىنان كورىنگەن. ال ءۇش رەت ءۇشىنشى ورىندى قاناعات تۇتقان.
نورۆەگيالىق سپورتشى 38 رەت الەم كۋبوگىندا چەمپيون اتانىپ, 88 رەت تۇعىر ساتىسىنا (38-21-29) كوتەرىلگەن. سونداي-اق ول 2009/10 جىلعى ماۋسىمدا الەم كۋبوگىنىڭ جالپى كەزەڭىنىڭ جەڭىمپازى اتانعان.
ۇزدىك گول انىقتالدى
فۋتبولدان مەكسيكالىق مانۋەل نەگرەتە ارياسانىڭ 1986 جىلى بولگاريا قۇراماسىنىڭ قاقپاسىنا سوققان دوبى الەم چەمپيوناتىنىڭ تاريحىنداعى ەڭ ادەمى گول دەپ تانىلدى. بۇل تۋرالى حالىقارالىق فۋتبول فەدەراتسياسىنىڭ (فيفا) رەسمي سايتى مالىمدەدى.
فيفا-نىڭ فەيسبۋك الەۋمەتتىك جەلىسىندەگى رەسمي پاراقشاسىندا جانكۇيەرلەر اراسىندا ارنايى ساۋالداما جۇرگىزگەن. ساۋالداماعا الەم چەمپيوناتىنىڭ تاريحىنداعى ەڭ ۇزدىك 32 فۋتبولشىنىڭ سوققان گولىن ىرىكتەپ العان. ءبىر ايتا كەتەرلىگى, ۇزدىك گولعا ۇمىتكەر رەتىندە نەگرەتەنىڭ ەكى گولى ەنگەن. ءبىرى 1982 جىلى برازيليادا وتكەن فۋتبول الامانىندا كسرو (2:1) قاقپاسىنا جانە 1986 جىلى بولگاريا قاقپاسىنا سالعان گولى. ناتيجەسىندە ونىڭ ءوز ەلىندە سوققان گولى الەم چەمپيوناتى تاريحىنداعى ۇزدىك گول دەپ تانىلدى.
ايتا كەتەيىك, 1986 جىلى مەكسيكادا وتكەن الەم بىرىنشىلىگىنىڭ 1/8 فينالىندا مەكسيكا بولگاريا قۇراماسىمەن جولىعىپ, 2:0 ەسەبىمەن باسىم تۇسكەن بولاتىن.
قارىمتا كەزدەسۋ وتكىزبەك
شەتەلدىك The Sports Journal باسىلىمىنىڭ جازۋىنشا, 2018 جىلى كاسىپقوي بوكستان ەكس-الەم چەمپيونى كىشى فلويد مەيۆەزەر مەن ەرەجەسىز جەكپە-جەك وكىلى يرلانديالىق كونور ماكگرەگورمەن قارىمتا كەزدەسۋ وتكىزۋى مۇمكىن.
باسىلىمنىڭ حابارلاۋىنشا, ەكى سپورتشى اراسىنداعى ەكىنشى ايقاس سەگىزبۇرىشتا وتكەنىمەن, جەكپە-جەك ەرەجەسى بوكس سپورتىنا سايادى. بوكسشىلار الاڭعا جالاڭاياق شىعىپ, تورتتىك ولشەمدەگى قولعاپپەن جۇدىرىقتاسادى. كەلىسىمشارت بويىنشا كەزدەسۋ 70,3 كيلو سالماقتا وتپەك. راۋند ۇزاقتىعى 5 مينۋتقا سوزىلادى. سونداي-اق ەرەجە بويىنشا, اياقپەن تەبۋگە, كۇرەسۋگە, شىنتاق جانە تىزەمەن تەبۋگە دە تىيىم سالىنعان.
جەكپە-جەكتى Mayweather Promotions, UFC جانە McGregor Entertainment پروموۋتەرلىك كومپانياسى ۇيىمداستىرماق.
دايىنداعان ءالي بيتورە,
«ەگەمەن قازاقستان»
