وتكەن سەنبىدە وبلىس اكىمى بەردىبەك ساپارباەۆ ۋچاسكەدەگى قۇرىلىس جۇمىستارىنىڭ بارىسىمەن تانىستى.
اشىق اسپان استىنداعى بىرەگەي ويىن-ساۋىق ساياباعى وسى جىلدىڭ ماۋسىم ايىندا اشىلادى. بۇل جەردە حايۋاناتتار پاركى, ەتنواۋىل, ۇيالى پلانەتاري, ميني-گولف الاڭى, جازعى كىتاپحانا, ۇلكەن لابيرينت, قۇزعا ورمەلەۋ, جىل بويعى مۇز ايدىنى, سپورت جانە ويىن الاڭدارى, باتۋتتار, ارقاندار پاركى, تير, بوۋلينگ تاعى باسقالار بولادى.
– بالالار مەن ەرەسەكتەرگە ارنالعان بۇل وتباسىلىق ساياباعى دەمالىس پەن ويىن-ساۋىقتى بىرىكتىرۋگە مۇمكىندىك بەرەدى. جابدىقتارعا تاپسىرىس بەرىلدى, جەتكىزىلىپ جاتىر, – دەدى وبلىس اكىمىنە «Nurai Invest Group» ديرەكتورى ەربول مۇحامەدجان.
ايماق باسشىسى ساياباق ساپاسىنا ەرەكشە نازار اۋدارا وتىرىپ, ساياباقتىڭ «باقىتتى بالا» جوباسى اياسىندا كىشكەنتاي اقتوبەلىكتەر ءۇشىن ەڭ ۇلكەن سىيلىق بولاتىنىن اتاپ ءوتىپ, ونى حالىقارالىق بالالاردى قورعاۋ كۇنىنە دەيىن ءبىتىرۋدى تاپسىردى.
ەسكە سالا كەتەيىك, دەمالىس ساياباعى «كيىز ءۇي پاركى» ءىرى جوباسىنىڭ ءبىر بولىگى بولىپ سانالادى, ونىڭ ەكىنشى كەزەڭىن 2020 جىلعا دەيىن ىسكە اسىرۋ جوسپارلانىپ وتىر. اتاپ ايتقاندا, ينۆەستورلار وسى ۋاقىتقا دەيىن 9 ميلليارد تەڭگە تۇراتىن مادەني-ساۋىق كەشەنىنىڭ قۇرىلىسىن اياقتاۋدى كوزدەپ وتىر.
– كەشەننىڭ جالپى اۋدانى 40 مىڭ شارشى مەتردى قۇرايدى. بۇل باتىس وڭىرىندەگى جانە قازاقستانداعى ەڭ ءىرى ساياباقتار تىزىمىنە ەنەتىن بولادى. سەگىز قاباتتى عيمارات ءۇش بلوكتان تۇرادى: ىسكەرلىك-اكىمشىلىك, سپورتتىق-ساۋىقتىرۋ جانە مادەني دەمالىس ويىن-ساۋىق بولىپ بولىنەدى دەپ, – ەربول مۇحامەدجان ءسوزىن جالعاستىردى.
جوبادا ينۆەستيتسيالىق ۋچاسكەلەر, اسفالتتاۋ, كوگالداندىرۋ, جاقىن ماڭداعى اۋماقتى اباتتاندىرۋ قاراستىرىلعان. اتاپ ايتقاندا, 500-گە جۋىق شىرشا جانە كانادالىق ۇيەڭكىلەر وتىرعىزىلادى.
تەمىر قۇسايىن,
"ەگەمەن قازاقستان"
