بۇگىن «الماتى» اۋدانى تج باسقارماسىنىڭ قىزمەتكەرلەرى Astana Mall ساۋدا ويىن-ساۋىق ورتالىعىنا كەزەكتەن تىس تەكسەرىسپەن باردى.
«قر باس پروكۋراتۋراسىنىڭ نۇسقاۋى مەن ىشكى ىستەر ءمينيسترىنىڭ بۇيرىعىنا سايكەس ءبىز كەزەكتەن تىس تەكسەرىسپەن شىقتىق. بۇگىنگى ولقىلىقتاردىڭ بارلىعى قۇقىقتىق ستاتيستيكا ورگاندارىندا تىركەلىپ, ارنايى ەسەپكە الىناتىن بولادى. ال ەرتەڭ تەكسەرىس جۇمىستارىن باستايتىن بولامىز. ءبىز قوسىمشا ەۆاكۋاتسيالاۋ ەسىكتەرىنىڭ ءبىرى جابىق ەكەنىن انىقتادىق. ءىلۋلى تۇرعان بەلگىلەردەن ادامداردىڭ عيماراتقا ءبىر ەسىكتەن كىرىپ, سول ەسىكتەن شىعاتىنىن بايقاۋعا بولادى. بۇدان بولەك, كولەمدى بەلگىلەردىڭ, ناۆيگاتسيانىڭ جوقتىعى انىقتالدى», - دەپ مالىمدەدى «الماتى» اۋدانى تجب-نىڭ باسشىسى نۇرلان وماروۆ.
اۋدان اكىمى ادىلبەك سارسەمباەۆتىڭ ايتۋىنا قاراعاندا, انىقتالعان بۇزۋشىلىقتار ءۇشىن ەرەجەنى بۇزۋشىلار ايىپپۇلعا كەسىلەدى.
«بۇگىن ءبىز وسى عيماراتتا بىرنەشە ولقىلىقتىڭ بار ەكەنىن انىقتادىق. مىسالى, قوسىمشا شىعۋ ەسىگى ق ۇلىپتالعان. بۇل – وتە ورەسكەل بۇزۋشىلىق. وسىعان وراي, ءتيىستى كولەمدە ايىپپۇلدار تولەنۋى قاجەت. مەنىڭ تاپسىرمام بويىنشا تجب ەرتەڭ اتالمىش نىساندى تەكسەرۋگە كىرىسەدى», - دەدى اۋدان اكىمى.
قازىرگى تاڭدا Astana Mall سوسو-دا 12 شىعۋ ەسىگى بار. ولاردىڭ ونى – ەۆاكۋاتسياىلىق ەسىكتەر.
ايتا كەتەيىك, ەلوردانىڭ «الماتى» اۋدانىندا 59 ساۋدا نىسانى مەن 3 ويىن-ساۋىق ورتالىعى بار. بۇگىنگە دەيىن «الماتى» اۋدانىنىڭ تجب اتالمىش نىسانداردىڭ بەسەۋىندە تەكسەرىس جۇمىستارىن جۇرگىزىپ ۇلگەرگەن. تەكسەرىس جۇمىستارى, سونداي-اق, ءىرى تۇرعىن ءۇي كەشەندەرىندە دە جۇرگىزىلمەك. بارلىق نىساندار كەستەگە سايكەس تەكسەرىلەتىن بولادى.
