ءىس-شارانى ۇيىمداستىرۋشى قازاقستان رەسپۋبليكاسى ەنەرگەتيكا مينيسترلىگىنىڭ, اتىراۋ وبلىسى اكىمدىگىنىڭ, «قازمۇنايگاز» ۇك اق-نىڭ, KAZENERGY قاۋىمداستىعىنىڭ, “KazService” قازاقستاننىڭ سەرۆيستىك كومپانيالار وداعىنىڭ رەسمي قولداۋىمەن Iteca قازاقستاندىق كورمە كومپانياسى بولىپ تابىلادى. بىرنەشە جىلدان بەرى Global Oil&Gas Atyrau بيزنەس-كەزدەسۋلەر مەن ماڭىزدى ءىس-شارالار وتكىزەتىن الاڭعا اينالدى.
كورمەنىڭ اشىلۋ سالتاناتىنا قر ەنەرگەتيكا ۆيتسە-ءمينيسترى بولات اقشولاقوۆ پەن ءوڭىر باسشىسى نۇرلان نوعاەۆ, رەسەي فەدەراتسياسىنىڭ قر-داعى ساۋدا وكىلى الەكساندر ياكوۆلەۆ جانە Iteca جشس ديرەكتورى يۋري بوروديحين قاتىستى.
- اتىراۋ ءوڭىرى جوسپارلى ءارى سەرپىندى دامۋدا. مەملەكەت باسشىسى نۇرسۇلتان نازارباەۆتىڭ تاپسىرماسىمەن وبلىستا وبلىس ەكونوميكاسىن ءارتاراپتاندىرۋ تۇرعىسىندا جوسپارلى جۇمىستار جۇرگىزىلۋدە. كورمەگە قاتىسۋشىلارعا ءوز ريزاشىلىعىمدى بىلدىرگىم كەلەدى, ويتكەنى ولار دا ەكونوميكانىڭ دامۋىنا, كەنورىندارىن دامىتۋعا جانە ارىپتەستەردىڭ اراسىنداعى قاتىناستاردى دامىتۋعا ءوز ۇلەستەرىن قوسۋدا. مۇنداي الاڭ بارلىق قاتىسۋشىلارعا ولاردىڭ جۇمىس باعىتتارىنا قاراماستان ءوز بيزنەسىنىڭ اۋقىمى مەن شەكاراسىن كەڭەيتۋگە مۇمكىندىك بەرەدى. بۇگىنگى كۇنى وبلىستا مىڭنان اسا شەتەلدىك جانە بىرلەسكەن كاسىپورىندار جۇمىس جاسايدى. وبلىس الەمنىڭ 50 ەلىمەن ىنتىماقتاستىقتا, - دەپ اتاپ ءوتتى العى سوزىندە اتىراۋ وبلىسىنىڭ اكىمى نۇرلان نوعاەۆ.
- مۇنداي ءىس-شارانىڭ مۇناي-گاز ءوندىرۋ تاريحى ءدال وسى جەردە باستالعان اتىراۋ وبلىسىنىڭ اۋماعىندا ءوتىپ وتىرعانى قۋانتادى. مۇناي-گاز سالاسى قازاقستان ەكونوميكاسى دامۋىنىڭ قوزعاۋشى كۇشى بولىپ قالادى, سوندىقتان ءبىز ءبارىمىز ونىڭ سەرپىندى جانە قارىشتى دامۋىنا قىزىعۋشىلىق تانىتامىز. كورمەگە ءجۇز ەلدىڭ وكىلدەرى قاتىسۋدا جانە بارلىعى وزدەرىنىڭ جاڭاشىل شەشىمدەرىمەن بولىسە الادى جانە جاڭا ىسكەرلىك بايلانىستار ورناتا الادى, -دەپ اتاپ كورسەتتى قر ەنەرگەتيكا ۆيتسە-ءمينيسترى بولات اقشولاقوۆ.
ونەركاسىپتىك جابدىقتار مەن مۇناي-گاز سالاسىنا بارلىق قاجەتتى قۇرالدار بار ءوز پاۆيلوندارىن ۇلىبريتانيانىڭ, بەلورۋسسيانىڭ, رەسەيدىڭ, تۇركيانىڭ, ءازىربايجاننىڭ جۇزدەن اسا كومپانياسى كورسەتتى. ەكسپوزيتسيالاردىڭ سانى وتكەن جىلمەن سالىستىرعاندا 8%-عا ۇلعايدى.
Global Oil&Gas Atyrau كورمەسىمەن بىرگە كورمە كەشەنىندە AtyrauBuild-2018 قۇرىلىس جانە ينتەرەر كورمەسى ورنالاسقان, وعان قاتىسۋشىلار قۇرىلىس, ينتەرەر, جول قۇرىلىسى سالاسىنداعى جاڭالىقتاردى تانىستىرۋدا. كورمەنىڭ بارلىق قاتىسۋشىلارىنا ءوز ءونىمى تۋرالى ايتۋعا, جاڭا كەلىسىمشارتتار جاساۋعا مۇمكىندىكتەر بەرىلدى.
مۇنان باسقا ءىس-شارا باعدارلاماسىنا قازاقستاننىڭ مۇناي-گاز سالاسىنداعى كتك (كاسپي قۇبىر كونسورتسيۋمى), NCOC, ەمبىمۇنايگاز سياقتى ءىرى قاتىسۋشىلاردىڭ سەمينارلارى مەن تۇساۋكەسەرلەرى ەنگىزىلگەن.
كورمەنىڭ التىن ارىپتەستەرى «ەمبىمۇنايگاز» اق, NCOC, «كاسپي قۇبىر كونسورتسيۋمى» اق بولدى. كورمەنىڭ باس ارىپتەسى –بيىل ءوزىنىڭ 25 جىلدىعىن اتاپ وتەتىن «تەڭىزشەۆرويل» جشس.
