بۇگىن ءبىز وسى اۋداننىڭ مادەنيەتى مەن ونەرىنە ايرىقشا ەڭبەك سىڭىرگەن ءبىر ازامات جايىندا ايتقىمىز كەلەدى. كۇرشىم اۋدانىنىڭ مادەنيەت سالاسىنا 20 جىلعا جۋىق ۋاقىت جەتەكشىلىك ەتكەن قابدوللا تۇراروۆ ەسىمىن جەرلەستەرى اركەز قۇرمەتپەن ەسكە الادى. ونەردى جان-تانىمەن سۇيگەن ازامات اۋداندىق مادەنيەت ءبولىمىن باسقارعان جىلدارى ۇلتتىق قۇندىلىقتارىمىز – كۇي, ءان, بي, ايتىس, تەرمە ونەرى قۇلاشىن كەڭگە جايدى. كوپتەگەن تالانتتى جاستاردى تاربيەلەپ, تالاپتارىن ۇشتاپ, ولاردىڭ ۇلكەن ساحناعا شىعۋىنا جاعداي جاسادى. اۋدانداعى ءۇش بىردەي ونەر ۇجىمىنىڭ حالىقتىق تەاتر اتاعىن الاتىنى دا, قاراتوعاي اۋىلىندا 250 ورىندىق مادەنيەت ءۇيىنىڭ سالىناتىنى دا, ونىڭ جانىنان قازاق وركەسترىنىڭ قۇرىلاتىنى دا, كۇرشىم اۋىلىندا تاريحي-ولكەتانۋ مۋزەيى مەن وبلىستاعى العاشقى اقىندار مەكتەبىنىڭ اشىلاتىنى دا وسى كەز. ق.تۇراروۆ اۋداندىق مادەنيەت ءبولىمىن باسقارعان جىلدارى كۇرشىم ونەرپازدارى وبلىستا ۇنەمى الدىڭعى ساپتان كورىنىپ ءجۇردى. مادەنيەت وشاقتارىنىڭ ماتەريالدىق بازاسى جاقسارىپ, ءاربىر اۋىلدا جاڭا كلۋبتار اشىلدى. اۋداننىڭ كىتاپحاناسى 10 جىل بويى وبلىستا ءبىرىنشى ورىندا بولدى. كىتاپحانانى ورتالىقتاندىرۋ جۇمىسى وڭىردە تۇڭعىش رەت كۇرشىمدە جۇرگىزىلدى. اۋدانداعى تالاي ونەرپازداردىڭ باسپانامەن قامتىلۋىنا دا كومەكتەستى. ول كىسى كۇرشىمدى بىلاي قويىپ, تارباعاتاي, زايسان, كاتونقاراعاي مەن بۇرىنعى ۇلكەن نارىن اۋداندارىن جالىقپاي ارالاپ, سونداعى اقىن, ءانشى, تەرمەشىلەردى تاۋىپ, ەل الدىنا شىعاردى. 1986 جىلى اۋداندا «تەرمە» اتتى ۇگىت-ناسيحات بريگاداسىن قۇرىپ, وعان بىرقاتار ءانشى-جىرشىلاردى, تەرمەشىلەر مەن بيشىلەردى توپتاستىردى. ءوڭىردىڭ اۋداندارىن ارالاپ, اقىندار ايتىسىن وتكىزىپ, ۇزدىكتەرىن رەسپۋبليكالىق ايتىستارعا قاتىستىردى. اباش كاكەنوۆ, حاسەن زاكاريا, كەنجەباي قايىرباەۆ سىندى شاكىرتتەرىن بۇگىندە بۇكىل ەل تانيدى دەسەك, ارتىق ايتپاعان بولارمىز. قابەكەڭ تالانتتى جاستاردى تاۋىپ قانا قويعان جوق, جولداما بەرىپ, وقۋعا جىبەردى. ولاردىڭ اراسىنان كەيىننەن وبلىسقا, رەسپۋبليكاعا تانىلعان تالعات كارمەنوۆ, جومارت امىرەنوۆ, سارىباي نۇرعاليەۆ, ەسەن ماجەنوۆ, ساندۋعاش توقتاروۆا, تويجامال تاسجانوۆا, قاراكوز بولاتوۆا, زەينۇر سولتانعۇلوۆ, توقتاۋبەك الديەۆ, قىزىمبەك ءابدىراحمانوۆ, سەرىكحان احمەتوۆ, قانيپا احمەتوۆا, ەركىن قىدىرحانوۆ سەكىلدى انشىلەر مەن مۋزىكا شەبەرلەرى شىقتى.
قابدوللا تۇراروۆ ونەرپازداردى دەمەپ, قولداۋمەن قاتار ءوزىنىڭ شىعارماشىلىعىن شىڭداۋعا دا ۋاقىت تاپتى. اۋەزدى اندەر شىعاردى. قازاق كسر مادەنيەت مينيسترلىگىنىڭ ۇيعارۋىمەن الماتىعا بارىپ, ايگىلى مادەنيەت قايراتكەرلەرى قۇدىس قوجامياروۆ پەن بوريس ەرزاكوۆيچتىڭ الدىندا ءوز ونەرىن كورسەتتى. بىرقاتار اندەرى «جاستىق شاق اۋەندەرى» اتتى رەسپۋبليكالىق جيناققا ەنگىزىلدى.
سان جىلعى ەڭبەگى ەسكەرۋسىز قالعان جوق. شىعىس قازاقستان وبلىسىنىڭ مادەنيەتى مەن ونەرىن دامىتۋداعى ەلەۋلى ەڭبەگى جوعارى باعالاندى. ومىردەن وتكەننەن كەيىن كۇرشىم اۋدانىنىڭ قۇرمەتتى ازاماتى اتاعىنا ۇسىنىلىپ, كۇرشىم اۋىلىنداعى ءبىر كوشەگە ەسىمى بەرىلدى.
ءسوز سوڭىندا ونەر قايراتكەرى, اقىن-سازگەر قابدوللا تۇراروۆ ۇرپاق جادىندا ماڭگى قالۋى ءۇشىن كۇرشىم اۋىلىنداعى مادەنيەت ۇيىنە ەسىمى بەرىلسە دەگەن تىلەگىمىزدى جەتكىزگىمىز كەلەدى. ءبىزدىڭ بۇل ۇسىنىسىمىزدى اۋدان تۇرعىندارى دا قولدايتىنىنا كامىل سەنەمىز.
سايلاۋحان اۋحاديەۆ,
وسكەمەن قالالىق اقساقالدار القاسىنىڭ توراعاسى,
جاڭاباي ءاشىموۆ,
وبلىستىق اقساقالدار كەڭەسىنىڭ توراعاسى,
ءزامزا قىرىقباەۆ,
ءى, ءىى, ءىىى دارەجەلى «ەڭبەك داڭقى» وردەندەرىنىڭ يەگەرى,
امان سولتانعاليەۆ,
وسكەمەن قالاسى جىبەك ماتالار شاعىن اۋدانى اقساقالدار القاسىنىڭ توراعاسى
حاتقا بارلىعى 36 ادام قول قويعان
