مەموراندۋمعا قازاقستان مەن يسپانيا حالىقتارى اراسىنداعى ءداستۇرلى دوستىقتى, ءوزارا تۇسىنىستىك پەن سەنىمدىلىكتى ودان ءارى نىعايتۋ, دوستىق قاتىناس ورناتۋ جانە ەكى ۇيىمنىڭ اراسىنداعى جان-جاقتى ىنتىماقتاستىقتى كەڭەيتۋ, جاستار الماسۋىن ىلگەرىلەتۋ, الەۋمەتتىك, مادەني, عىلىمي, ءبىلىم بەرۋ جانە باسقا دا سالالارداعى ىنتىماقتاستىقتى دامىتۋ, جان-جاقتى ستراتەگيالىق ارىپتەستىكتى ۇلعايتۋ ماقساتىندا قول قويىلدى.
مەموراندۋمعا قول قويۋعا «ازيا ءۇيى» باس ديرەكتورى دەۆيد ناۆاررو گارسيا جانە ەلباسى قورى اتقارۋشى ديرەكتورىنىڭ ورىنباسارى سۇلتان ايتجانوۆ قاتىستى.
ەكىجاقتى ىنتىماقتاستىق بويىنشا بىرلەسكەن ءىس-شارالار وتكىزۋ, قازاقستان مەن يسپانيا جاستارىنىڭ دوستىق ساپارلارى, ءبىلىم بەرۋ, عىلىم, مادەنيەت سالاسىنداعى بىرلەسكەن جوبالار مەن باعدارلامالاردى ازىرلەۋ جانە ىسكە اسىرۋ جانە ۋنيۆەرسيتەتتەر, زەرتتەۋ ورتالىقتارى جانە باسقا دا مەكەمەلەرمەن تىكەلەي ىنتىماقتاستىق اياسىندا جۇزەگە اسىرىلادى.
«ازيا ءۇيى» – ازيا مەن تىنىق مۇحيتى ەلدەرىندە مامانداندىرىلعان مادەني جانە ءبىلىم بەرۋ مەكەمەسى. بارسەلونادا ورنالاسقان بۇل مادەني ورتالىق كورمەلەر, كونفەرەنتسيالار مەن سەمينارلار ۇيىمداستىرادى. ورتالىق زەرتتەۋ-تالداۋ جۇمىستارىمەن اينالىسۋعا مۇمكىندىك بەرەدى. «ازيا ءۇيى» 2001 جىلى يسپانيا ۇكىمەتىنىڭ سىرتقى ىستەر جانە ىنتىماقتاستىق مينيسترلىگى, كاتالونيا ۇكىمەتى, بارسەلونا مەن مادريد قالالىق كەڭەستەرىمەن بىرلەسە قۇرىلدى.
بۇدان باسقا, ەلباسى قورى تاراپىنان مادريدتە «استانا – ۇلى دالانىڭ ءىنجۋ-مارجانى» اتتى فوتوكورمە ۇسىنىلدى.
فوتوكورمە يسپانيا كورولى فيليپپ VI 2014 جىلى اشقان كارلوس دە امبەرەس قورىنىڭ (Fundación Carlos de Amberes) عيماراتىندا ءوتتى.
فوتوكورمەنى اشۋ بارىسىندا قازاقستاننىڭ يسپانيا كورولدىگىندەگى توتەنشە جانە وكىلەتتى ەلشىسى باقىت دۇيسەنباەۆ جانە قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى اتقارۋشى ديرەكتورىنىڭ ورىنباسارى سۇلتان ايتجانوۆ قۇتتىقتاۋ ءسوز سويلەدى.
استانا قۇرىلىستارىنىڭ 100-دەن استام كارتينالارى جانە «بەيمالىم قازاقستان» فوتوسۋرەتتەر سەرياسىنان تۇراتىن قازاقستاننىڭ بىرەگەي تابيعاتى كورسەتىلگەن فوتوكورمەنى تاماشالاۋعا بەلگىلى قوعام جانە ساياسي قايراتكەرلەر, سونداي-اق يسپانيانىڭ مادەنيەت جانە ونەر مايتالماندارى كەلدى.
قوناقتار ۇلى دالانىڭ, ەۋرازيا جۇرەگىندەگى ۋلترازاماناۋي قالانىڭ سۇلۋلىعى مەن بەينەسىن جارقىن فوتوسۋرەتتەر ارقىلى تاماشالادى.
سونىمەن بىرگە كورمە قوناقتارىنا ەلباسى قورىنىڭ تاپسىرىسى بويىنشا ازىرلەنگەن «A day in Astana» فوتوالبومى سىيعا تارتىلدى.
«ەگەمەن-اقپارات»
