كونستيتۋتسيالىق كەڭەس توراعاسى قايرات ءماميدىڭ توراعالىعىمەن وتكەن وتىرىستا قاراعاندى وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ «نەكە (ەرلى-زايىپتىلىق) جانە وتباسى تۋرالى» كودەكسى 47-بابىنىڭ 5-تارماعىن كونستيتۋتسيالىق ەمەس دەپ تانۋ تۋرالى ۇسىنىس قارالدى. سوتتىڭ ءىس جۇرگىزۋىندەگى جاڭا تۋعان ءسابيدى كۇتىپ-باعۋعا اليمەنت جانە ونىڭ اناسىن كۇتىپ-باعۋعا اقشالاي قاراجات ءوندىرىپ الۋ تۋرالى ازاماتتىق ءىس ءوتىنىش بەرۋگە سەبەپ بولعان. وسى ۇسىنىستا انالىقتى جانە بالالىقتى الەۋمەتتىك قورعاۋ ماسەلەلەرى قوزعالعان.
سوتتىڭ پىكىرى بويىنشا كودەكستىڭ اتالعان نورماسى كونستيتۋتسيانىڭ انا مەن بالا مەملەكەتتىڭ قورعاۋىندا بولادى دەگەن 27-بابىنىڭ تالاپتارىمەن سايكەسپەيدى. وسىعان بايلانىستى وتىرىستا پارلامەنت دەپۋتاتتارى, ۇكىمەتتىڭ, باس پروكۋراتۋرانىڭ, ادىلەت, ءبىلىم جانە عىلىم, ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ وكىلدەرى جانە باسقا دا ادام قۇقىقتارىن قورعاۋ ۇيىمدارىنىڭ وكىلدەرى ءوز پىكىرلەرىن ءبىلدىردى. سونىمەن قاتار كونستيتۋتسيالىق كەڭەس ساراپشىلار پىكىرىنە تالداۋ جاسادى. ال اتا زاڭىمىزدىڭ ايشىقتىعىن ارداقتايتىن كونستيتۋتسيالىق كەڭەس وتىرىسىنا العاش رەت جوو زاڭ فاكۋلتەتىنىڭ ستۋدەنتتەرى دە قاتىستى. بولاشاق زاڭگەرلەر ءۇشىن مۇنداي جوعارى دەڭگەيدەگى وتىرىستا مەملەكەتتىك ورگانداردىڭ تالقىلاعان ماسەلەلەرى بويىنشا بىلىكتى ماماندار پىكىرلەرىن تىڭداۋ زاڭ ءبىلىمىن ناقتى تاجىريبە ىسىمەن ۇشتاستىرا تۇسەتىنى ايقىن.
جان-جاقتى تالداۋلاردان كەيىن كونستيتۋتسيالىق كەڭەس توراعاسى ايتىلعان ءوتىنىشتىڭ نىسانىن زەردەلەي وتىرىپ, وتاندىق زاڭنامالار مەن جەكەلەگەن شەتەلدەردىڭ دە پراكتيكاسى تالداناتىنىن جەتكىزدى. وسىلايشا, بۇعان ناقتى شەشىم دايىنداۋ ءۇشىن كونستيتۋتسيالىق كەڭەستىڭ قورىتىندى شەشىمى قوسىمشا حابارلاناتىن بولدى.
الەكساندر تاسبولات,
«ەگەمەن قازاقستان»
