– بۇدان بولەك, كەيبىر اتا-انالار ءوز بالالارىنا ارناپ ۇيگە دە دومبىرا ساتىپ الىپ جاتىر ەكەن. مۇنىڭ ءبارى مەكتەپ وقۋشىلارىنىڭ دومبىراعا قۇمارلىعىن وياتىپ, ۇلتتىق ونەردى مەڭگەرۋىنە ىقپال ەتەرى ءسوزسىز, – دەيدى اقجايىق اۋداندىق ءبىلىم ءبولىمىنىڭ باسشىسى باقىت ىلياسقىزى.
جالپى, باتىسقازاقستاندىقتار ماحامبەت, قۇرمانعازى, داۋلەتكەرەي, دينا, مامەن, ەسجان, قالي, وقاپ سەكىلدى كۇيشى-دومبىراشىلاردىڭ ءوز جەرلەسى ەكەنىن ماقتان تۇتادى. سوندىقتان دا بولار, وڭىردە كۇي ونەرىن, دومبىرا اسپابىن وسكەلەڭ ۇرپاققا كەڭىنەن ناسيحاتتاۋ قولعا الىنعان. ماسەلەن, 2018 جىلدىڭ باسىنان بەرى اقجايىق اۋدانىنداعى 46 مەكتەپتە ءۇزىلىس كەزىندە كۇي ويناتىلىپ ءجۇر.
– ءۇزىلىس كەزىندە ويناتۋ ءۇشىن 177 كۇيدىڭ ءتىزىمىن بەردىك. مەكتەپتەردە كۇي ويناتۋ ءۇشىن قاجەتتى راديوتورابى جەلىسى بار. ءوزىم دە تىڭداپ ءجۇرمىن, دومبىرانىڭ قوڭىر داۋسى قۇلاققا وتە جاعىمدى, كەرەمەت اسەر ەتەدى ەكەن, – دەيدى باقىت ىلياسقىزى.
12 ساۋىردە مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسى جارىق كورگەنىنە تۋرا ءبىر جىل تولادى. ءدال وسى كۇنى اقجايىق اۋدانى ورتالىعىندا «مەن سىيعا تارتقان دومبىرا» اكتسياسى قورىتىندىلانىپ, سىيلىققا جينالعان دومبىرا مەكتەپ ۇجىمدارىنا تاپسىرىلاتىن بولادى.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان وبلىسى
