گەولوگيا عىلىمىنىڭ تەوريالىق جانە پراكتيكالىق ماسەلەلەرىن شەشۋدەگى كورنەكتى جەتىستىكتەرى, مەتاللوگەنيا دەپ اتالاتىن جاڭا عىلىمنىڭ نەگىزى مەن دامۋىن, قازاقستاننىڭ مينەرالدى شيكىزات قورىن بارلاۋ, قۇرۋ جانە كەشەندى پايدالانۋ بويىنشا ەرەن ەڭبەكتەرى, كەڭەس وداعى كەزىندە رەسپۋبليكا عىلىمىن ۇيىمداستىرۋ مەن دامىتۋ – اكادەميك, قازاقستان عىلىم اكادەمياسىنىڭ ۇيىمداستىرۋشىسى جانە تۇڭعىش پرەزيدەنتى قانىش ساتباەۆتىڭ اتىمەن تىعىز بايلانىستى ەكەنى راس.
وسى تۇستا قازاقستان پرەزيدەنتى نۇرسۇلتان نازارباەۆ قانىش ساتباەۆ تۇلعاسى تۋرالى پايىمداي كەلە «...مەنىڭ ويىمشا, قانىش يمانتاي ۇلى كەشەگى وتكەن كەڭەستەر وداعىنىڭ عانا ۇلى ادامدارىنىڭ ءبىرى ەمەس, ول ءوتىپ بارا جاتقان عاسىردىڭ ۇلى پەرزەنتى. تاپ وسىنداي زاڭعارعا قازاقستاننان دا, قازاقتاردىڭ اراسىنان دا ەشبىر ادام كوتەرىلگەن ەمەس. مەن قانىش ساتباەۆتى تەك قازاق ۇلتىنىڭ عانا ەمەس, جالپى بۇرىنعى كەڭەستەر وداعىنىڭ ۇلى ادامدارىنىڭ قاتارىنا قوسامىن. مەن ونى ءادىل تورەلىك جاساپ, دۇرىس شەشىمدەر شىعاراتىن شىنايى تورەشىلەر سىندى ۋاقىت پەن تاريحتىڭ باعاسى دەپ باعالار ەدىم», دەيدى.
كەلەلى ءماجىلىستى ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ اشىپ «بۇگىندە ساتباەۆ مۇراسىنا قاتىستى مەتاللوگەنيا, مينەرالوگيا, گەوحيميا, پايدالى قازبالار, ستراتيگرافيا, تەكتونيكا, گەوگرافيا, ەكونوميكا سىندى ءتۇرلى عىلىم سالالارىندا جازىلعان 800-گە تارتا ىرگەلى ەڭبەكتەر بار. بىلتىر پرەزيدەنت ن.نازارباەۆ قوعامدىق سانانى جاڭعىرتۋ باعىتتارىنىڭ ءبىرى رەتىندە ءبىلىم سالاسىنىڭ بەلگىلەنگەندىگىن اتاپ وتكەن بولاتىن. ۇلتىمىزدىڭ بەتكە ۇستار ۇلى پەرزەنتى ق.ساتباەۆتىڭ عىلىم دامۋىنا قوسقان ۇلەسى مەن ەڭبەك جولى كەيىنگى بۋىن ءۇشىن سانا جاڭعىرۋىنىڭ نەگىزگى باعىتى بولىپ قالا بەرمەك», دەدى.
كونفەرەنتسيادا ق.ساتباەۆتىڭ قازاقستان عىلىمىنىڭ دامۋىنا سىڭىرگەن وراسان زور ەڭبەگى حاقىندا شەتەلدىك جانە وتاندىق عالىمدار كولەمدى باياندامالار جاسادى.
تاجىكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى نازيرماد اليزود ءوز سوزىندە قانىش ساتباەۆ قازاق حالقىنا عانا ەمەس, بۇكىل تۇركى حالىقتارىنا ورتاق تۇلعا دەسەك قاتەلەسپەيمىز. زامانىندا ونىڭ تاجىك كسر عىلىم اكادەمياسىنىڭ اشىلۋىن ۇيىمداستىرۋعا تىكەلەي اتسالىسقانىن بۇگىندە ماقتانىشپەن ايتامىز. اكادەميك ق.ساتباەۆتى ماڭگى ەستە ساقتاۋ ءۇشىن مۇنداي ءىس-شارالار ەكى ەلدە دە ءجيى ءوتىپ تۇرادى. ونىڭ ونەگەلى جولىن بولاشاق ۇرپاققا ۇلگى ەتۋ ءبىزدىڭ پارىزىمىز», دەدى.
سونداي-اق گەولوگيا جانە جەر قويناۋىن پايدالانۋ كوميتەتىنىڭ توراعاسى اقباتىر نادىرباەۆ, «قازاقمىس» كورپوراتسياسىنىڭ باس ديرەكتورى باقتيار قرىقپىشەۆ, ك.اقىشەۆ اتىنداعى ارحەولوگيا عىلىمي زەرتتەۋ ينستيتۋتىنىڭ ديرەكتورى مارال حابدۋلينا جانە اكادەميكتىڭ تىكەلەي ۇرپاعى, نەمەرەسى ءاليما جارماعامبەتوۆا بايانداما جاسادى. ءاليما قانەكەيقىزى بۇگىندە اتا جولىمەن عىلىم سالاسىندا ءوزىنىڭ دارا ەسىمىن قالىپتاستىرعان ۇلكەن عالىم. بۇگىندە «د.سوكولسكي اتىنداعى ورگانيكالىق كاتاليز جانە ەلەكتروحيميا ينستيتۋتى» ەنشىلەس مەملەكەتتىك كاسىپورنى ديرەكتورىنىڭ ورىنباسارى قىزمەتىن اتقارىپ وتىرعان تەكتىنىڭ تۇياعى دا ءوز ءسوزىن اتاسىنىڭ حح عاسىرداعى قازاقستاننىڭ دامۋىنا زور ۇلەسىن قوسقان قوعام جانە مەملەكەت قايراتكەرى ەكەنىن, ءبىر سوزبەن ايتقاندا ناعىز كوشباسشى تۇلعا ەكەنىنەن باستادى. «ول ويىنداعىسىن جۇزەگە اسىرۋ ارقىلى بىرنەشە عالىمدار بۋىنىنا اسىقپاي ءارى جەمىستى جۇمىس ىستەۋگە مۇمكىندىك بەردى. اينالاسىنا باتىل, ىمىراسىز, ءوزى سياقتى قايسار پىكىرلەستەردى جيناي ءبىلدى. وتاندىق عىلىمنىڭ ابىرويىن اسقاقتاتقان زامانداستارى عىلىم اكادەمياسىنىڭ العاشقى مۇشەلەرى وسىعان دالەل», دەيدى ءا.جارماعامبەتوۆا.
جالپى, قانىش تاعىلىمى بۇگىندە ونىڭ عىلىمي باستامالارى مەن مۇرالارىنىڭ جان-جاقتى ناسيحاتتالۋىمەن قۇندى. عالىمنىڭ ءومىرى مەن ەڭبەك جولىن ونەگە ەتۋ ارقىلى وسكەلەڭ ۇرپاققا پاتريوتتىق جانە ادامگەرشىلىك تاربيە بەرۋ ماسەلەلەرى جىل سايىن جاڭا بۋىننىڭ جادىندا جاڭعىرىپ كەلەدى.
ميراس اسان,
«ەگەمەن قازاقستان»
