– بۇل كەرەمەتتى جاساعان كىم ەكەن؟ – دەپ جاتىرمىز تاڭعالىپ.
– قازىناگۇل دەگەن اپامىز بار, بۇل ساۋكەلە سول كىسىنىڭ قولىنان شىققان كەرەمەت, – دەدى ورتالىق ديرەكتورى نۇرسۇلۋ ەركەبايقىزى.
نۇرسۇلۋدىڭ ايتۋىنشا, قازىناگۇل قىلىشبايقىزى قوياندى اۋىلدىق كلۋبىنىڭ مادەنيەت قىزمەتكەرى. اۋىلداعى «كاۋسار» اجەلەر ءانسامبلىن باسقارادى. وسى ءانسامبلدىڭ مۇشەلەرى ءناسيپا التاەۆا, شولپان تەجەكوۆا, گۇلباعيران قايىرباي, ءناسىپ مالىباي, سۇلۋشاش قۇرمانوۆا 10 جىلعا جۋىق ۋاقىتتان بەرى ءان سالىپ, ويۋ-ورنەك ويىپ, جۇرتشىلىقتى قولونەرلەرىمەن قىزىقتىرىپ كەلەدى. بىلتىر كاۋسارلىقتاردىڭ ۇيىمداستىرۋىمەن «التىن ويماق» قولونەر كورمەسى ۇيىمداستىرىلىپتى. كورمەنىڭ ماقساتى – حالقىمىزدىڭ ۇلتتىق ناقىشتاعى بۇيىمدارىن زامانعا ساي جاڭا ۇلگىدە كورسەتۋ. وسى ورتالىقتاعى كورمەدە اپا-اجەلەر جاساعان قولونەر بۇيىمدارى جيناقتالىپتى. ءتىپتى اجەلەر ءارتۇرلى كيمەشەكتەر ۇلگىسىن جاساپ, «كيمەشەكتەر شەرۋىن» دە وتكىزىپتى.
مىسالى, گۇلباعيران اپاي كورپەشە, جاستىقشالاردى جاساپ, توقىما توقيدى, قازىناگۇل اپاي فەتردان ويۋ قۇرايدى, وسى ماتادان قىزدارعا ارنالعان ۇلتتىق ناقىشتاعى زاماناۋي قول سومكەلەرىن, قامزول, باس كيىم تىگەدى. ال كورمەگە قويىلعان وسى بۇيىمداردىڭ ىشىندە ەرەكشە كوزگە تۇسەتىنى قازاق قىزدارىنىڭ سۇلۋلىعىن پاش ەتەتىن باس كيىمدەرىنىڭ ءبىرى – ساۋكەلە.
قازىناگۇلدىڭ ساۋكەلەنى بيىك, كوزگە تۇسەرلىكتەي ەتىپ جارقىراتىپ, اشەكەيلەپ جاساۋداعى ماقساتى قىزدارعا وزگە جۇرتتىڭ ەمەس, ءوزىمىزدىڭ ۇلتتىق باس كيىمدى كيىپ ۇزاتىلۋ كەرەكتىگىن ەسكە سالۋ ەدى. ساۋكەلەنى ۇزاتىلعان قىزدار جانە ونىڭ جانىنا ەرىپ جۇرەتىن قۇربىلارى دا كيگەن. نەگىزگى بولىكتەرى – ءتاج, توبە, قۇلاقباۋ جانە ارتقى بويى. ماڭداي تۇسىنا جىبەك شاشاق تاعادى. قىزدارىمىزعا ساۋكەلەنىڭ ۇلتىمىزدىڭ مادەنيەتى مەن ونەرىنىڭ وزىق ۇلگىسى, ونەر تۋىندىسى رەتىندە باعالاناتىن قاستەرلى دۇنيە ەكەنىن ۇقتىرۋدى ويلاعان. قازىناگۇل ساۋكەلەنى 3 اي بويى تىگىپ, جاساپ شىعىپتى.
– جالپى, «اتامۇرا» ورتالىعى 1993 جىلى 16 جەلتوقساندا اشىلدى. ماقساتى – ۇمىتىلىپ بارا جاتقان سالت-داستۇرلەر, تاريح پەن مادەنيەت, ءتىلىمىزدى, ۇلتتىق ونەرىمىزدى ناسيحاتتاۋ. مىسالى, «عاسىرلار سارىنى», «جىگىت سۇلتانى», «قازاقتىڭ كەلىندەرى-اي», «كيەلى كيمەشەك», ء«اۋجار», «تۇساۋكەسەر», «سەلت ەتكىزەر», «اۋىلداعى توي» رۋحاني-مادەني شارالارىن وتكىزدىك. ورتالىقتا «اقساقالدار ءادىل-قازىلىعى» قوعامدىق بىرلەستىگى, «جۇلدىز» ۆوكالدىق ۇيىرمەسى, «جاس تولقىن» اقىندار مەكتەبى, «شابىت» ادەبي بىرلەستىگى, «قىران», «گۇلزار», «اتامۇرا» فولكلورلىق-ەتنوگرافيالىق ۇلت-اسپاپتار ءانسامبلى بار. ورتالىققا قالانىڭ 16 اۋىلدىق كلۋبى قارايدى. بارلىق كلۋبتاردا كوركەمونەرپازدار ۇجىمدارى جۇمىس ىستەيدى. ورتالىقتا, جازۋشى روللان سەيسەنباەۆ, «شال» فيلمىندە باستى ءرولدى سومداعان ەربولات توعۇزاقوۆ بولدى. ءۇندىستان مەن فرانتسيا ەلشىلەرىن دە قارسى الدىق, – دەيدى نۇرسۇلۋ تولەۋباەۆا.
سونىمەن بىرگە ورتالىقتا قۋات ابۋسەيىتوۆ, قالمۇقان يساباي, فاريزا وڭعارسىنوۆا, روزا باعلانوۆا, ەرمەك سەركەباەۆ سەكىلدى بەلگىلى تۇلعالار بولىپتى.
فاريدا بىقاي,
«ەگەمەن قازاقستان»
پاۆلودار وبلىسى,
ەكىباستۇز قالاسى
سۋرەتتى تۇسىرگەن پانا ىدىرىسوۆا
