« ۇلىستىڭ ۇلى كۇنى ۇيىمداستىرىلعان اشامايعا مىنگىزۋ ءراسىمى باستالماس بۇرىن قازاقستان, جالشي, شىلىكتى اۋىلدارىنداعى ۇيلەردى ارالاپ, جەتپىستەن استام وتباسىنا, مۇمكىندىگى شەكتەۋلى جاندارعا, قاريالارعا ناۋرىزكوجە تاراتتىق. وسىنداي تاماشا ءداستۇردى ناسيحاتتاعان شاراعا زايسان قالاسىنان, شىلىكتى اۋىلدىق وكرۋگىنەن قوناقتار كوپ جينالدى. ويۋلانعان قۇراق-كورپە جابىلعان تايعا باسىنا ۇكىلى تاقيا, ۇستىنە ۇلتتىق كيىم كيگەن 7 جاستاعى ميراس زامانبەك ەسىمدى بالدىرعاندى مىنگىزىپ, ناعاشى اتاسى باقىتبەك ورتاعا الىپ شىقتى. الدىمەن بالانىڭ قادامى ءساتتى بولسىن دەگەن تىلەكپەن ۇلكەندەر اق باتاسىن بەردى. ودان كەيىن اتاسى نەمەرەسىنىڭ قولىنا تىزگىندى ۇستاتىپ, اقجاۋلىقتى انالار اقجارما تىلەكتەرىن ايتىپ, شاشۋ شاشىلدى. ناعاشى اتاسى جيەنى مىنگەن تايدى جەتەكتەپ, ارلى-بەرلى ءجۇرىپ, جينالعان قاۋىمدى اينالىپ ءوتتى. بۇدان كەيىن اپاسى نەمەرەسىنە سىيلىعىن تاپسىرىپ, جينالعاندار كورىمدىگىن بەرىپ, سىي-سياپاتتارىن جاسادى. بۇل ءراسىمدى وتكىزۋدەگى ماقساتىمىز – ەڭ اۋەلى بۇگىندە ۇمىتىلا باستاعان ءداستۇرىمىزدى دارىپتەۋ بولسا, ەكىنشىدەن, قازىر بار بولعانى 11 ءتۇتىنى عانا قالعان كاكەنتالدى اۋىلى تۇرعىندارىنىڭ كوڭىلىن كوتەرىپ, ءبىر سەرپىلتكىمىز كەلدى», دەيدى وسى يگى شارانى ۇيىمداستىرۋعا ۇيىتقى بولعان, شىلىكتى اۋىلىنداعى اجەلەر القاسىنىڭ ءتورايىمى قاماريا ابۋساعيتوۆا.
جالپى جىلقى مالىنىڭ قازاق ءۇشىن ورنى قاشاندا بولەك. اتقا مىنسەڭ ەڭسەڭ كوتەرىلەدى, ارۋاقتاناسىڭ, ايبارلاناسىڭ. قىزىل قاسقا تايىنا قارعىپ مىنگەن ميراس تا اۋ تولتىرىپ ات ءمىنىپ, اۋىز تولتىرىپ ءسوز ايتقان بۇرىنعى بابالارىنداي باراقات سەزىمدى باستان كەشتى, قۋاندى, شاتتاندى, قايراتتاندى دەيدى بالانىڭ اكەسى ارمان. اشامايعا مىنگىزۋ سالتاناتى اياقتالعان سوڭ اۋىل تۇرعىندارى اراسىندا ارقان تارتىس, جاياۋ جارىس ويىندارى ۇيىمداستىرىلىپ, «قارا جورعا» بيىنەن سايىس ءوتىپ, بالالار تاي جارىستىردى.
ازامات قاسىم,
«ەگەمەن قازاقستان»
شىعىس قازاقستان وبلىسى,
زايسان اۋدانى,
كاكەنتالدى اۋىلى
