بىرەگەي جوبانى قولعا الىپ, باستاما كوتەرگەن اليانستىڭ ولكەتانۋشى-ەتنوگرافتار كلۋبى بولىپ وتىر. جوبانى جۇزەگە اسىرۋعا ارحەولوگيا, ولكەتانۋ جانە ەتنوگرافيا سالاسى بويىنشا ءوز ىقىلاسىمەن ىزدەنىپ جۇرگەن تاريحشى عالىمدارمەن بىرگە, بىرنەشە مىڭ الماتىلىق وقۋشى مەن ستۋدەنت تە جۇمىلدىرىلدى. جاس ولكەتانۋشىلار العاشقى تابىستارى مەن اسەرى تۋرالى الەۋمەتتىك جەلىلەردە, مەرزىمدى باسىلىمداردا پايىمدى پىكىرلەرىمەن ءبولىسىپ وتىرادى. جوبا مەرزىمى اياقتالعان سوڭ جۇمىس ناتيجەسى نەگىزىندە الماتى مەن قالا ماڭىنداعى تاريحي, ارحەولوگيالىق ەسكەرتكىشتەردىڭ كارتاسى جاسالىپ, «الماتى قالاسى تۋرالى 100 قىزىقتى دەرەك» اتتى جاڭا جيناق جارىق كورمەك.
ولكەتانۋشى-ەتنوگرافتار كلۋبىنىڭ جەتەكشىسى, قازۇۋ-ءدىڭ تاريح, ارحەولوگيا جانە ەتنولوگيا فاكۋلتەتىنىڭ دەكانى مەڭدىگۇل نوعايباەۆانىڭ ايتۋىنشا, جوبانىڭ ماقساتى – عالىمداردىڭ قولداۋىمەن جاس بۋىندى الماتى قالاسىنىڭ تاريحي مۇراسىن زەرتتەپ, زەردەلەۋگە ەرتە باستان باۋلۋ. «جوبا قوعامدىق سانانى جاڭعىرتۋعا باعىتتالعان «تۋعان جەر» باعدارلاماسىنىڭ ماڭىزدى قۇرامداس بولىگى بولىپ تابىلادى. ءبىز ولكەتانۋ تۋرالى وي مەن ۇستانىمداردى وقۋ باعدارلاماسىنا بەلسەندى تۇردە ەنگىزۋدى قولعا الدىق. سونداي-اق جاستاردىڭ بويىنداعى وتانشىلدىق سەزىمدى وياتۋ ماقساتىندا تاريحي-ولكەتانۋ جانە ەتنوگرافيالىق جۇمىستار جۇرگىزەمىز. ال وتاندى ءسۇيۋ دەگەنىمىز, ەڭ الدىمەن ءوز تۋعان جەرىڭە, ءوز اينالاڭا سۇيىسپەنشىلىكتەن باستالادى», دەيدى قانات قاعىپ وتىرعان جاڭا جوبانىڭ جەتەكشىسى م.نوعايباەۆا.
ال قىزدار مەملەكەتتىك پەداگوگيكالىق ۋنيۆەرسيتەتىنىڭ دوتسەنتى ءاليا يساەۆا ءوز بايانداماسىندا ەتنوگرافيالىق مازمۇنداعى ساۋالداما جۇرگىزگەن ستۋدەنت-ەرىكتىلەر توبىنىڭ جۇمىسى تۋرالى اڭگىمەلەسە, قازاق سپورت جانە تۋريزم اكادەمياسىنىڭ دوتسەنتى, ەكسكۋرسيا جۇرگىزۋشى و.ليۋتەروۆيچ: «الماتى – مىڭ جىلدىق تاريحى بار قايتالانبايتىن قالا. مۇندا ساۋلەت ونەرى مەن مادەنيەتتىڭ سان ءتۇرلى عاجايىپ ەسكەرتكىشتەرى شوعىرلانعان. شاھارىمىز كوز قۋاندىراتىن كورىكتى ورىندارعا وتە باي. الماتى ەرتەدەن-اق شەتەلدىك جانە وتاندىق ساياحاتشىلار ءۇشىن تۋريستىك ورتالىققا اينالعان, ەندى مىنە, ونىڭ باسقا دا جاڭا مۇمكىندىكتەرىنىڭ كوكجيەگى كورىنىپ كەلەدى», دەيدى.
جاس ولكەتانۋشىلار ءوز زەرتتەۋلەرىنىڭ قورىتىندىسىن كوپشىلىككە جاريالاي باستادى. مىسالى, م.بازارباەۆ اتىنداعى №138 مەكتەپتىڭ 11 سىنىپ وقۋشىسى دىنمۇحامەد الياسقاروۆ ءوز مەكتەبىنىڭ ولكەتانۋشىلار كلۋبى ارقىلى الماتى قالاسىنداعى عيماراتتاردىڭ تاريحى, كوشە اتاۋلارى, سونداي-اق اتاقتى ادامداردىڭ ءومىربايانى تۋرالى جاڭا مالىمەتتەر مەن اقپاراتتارعا قانىق بولعانىن ايتتى. مەكتەپ بىتىرگەلى وتىرعان جاس تۇلەكتىڭ ايتۋىنشا, مۇنداي باعىتتاعى جۇمىس ادامنىڭ بويىنداعى ىزگىلىك, قۇرمەت سەزىمىن, ەڭ باستىسى كەلەشەككە سەنىمىن وياتپاي قويمايدى.
ايگۇل احانبايقىزى,
«ەگەمەن قازاقستان»
الماتى
