ءۋاليحاننىڭ «ەگەمەن قازاقستاننىڭ» باس رەداكتورى كەزىندە ء«مىن قايراتقا, اۋىلىم...» اتتى سىن ماقالا ۇسىندىم. ءوزىمدى اعا گازەتتىڭ «سوتسياليستىك قازاقستان» اتالعان شاعىنان شتاتتان تىس اۆتورى سانايتىن مەن, ماقالانى ۇسىنۋىن ۇسىنسام دا, جارىق كورەتىنىنە ونشاما سەنىمدى بولعانىم جوق. ءويتىپ كوڭىلىمە ءدۇدامال كىرۋىنىڭ سەبەبىن ايتسام, وتكەن عاسىردىڭ توقسانىنشى جىلدارىنىڭ ەكىنشى جارتىسىندا, 1995 جىلى قابىلدانعان جاڭا كونستيتۋتسيا بويىنشا جەرگە جەكەمەنشىك تە بولۋى كەرەك دەگەن ءتارتىپ بەرىلدى. كولحوز, سوۆحوزدار جاپپاي تاراتىلىپ, اۋىل اتاۋلى, مىسالى, شىعىس قازاقستان وبلىسى, ۇلان اۋدانىنىڭ كوشەلەرىنە اسفالت توسەلگەن, مادەنيەت ءۇيى, ەت كومبيناتى, سۋ قۇبىرى, كاناليزاتسياسى, ءار ءۇي سايىن ىشىندە ۆانناسى, تۋالەتى بار «قاراوزەك» مال بورداقىلاۋ سوۆحوزى ءاپ-ساتتە توز-توز بولدى.
«جەكەمەنشىك دەسە, قازىر ىشەر اسىمىزدى جەرگە قوياتىندى شىعاردىق. ونىڭ بىردە پايداسى تيسە, بىردە زيانى تيەتىنىن قۇداي ءبىزدىڭ سانامىزعا قوندىرا الماي-اق قويدى. ءبىز – شىعىس ەلىمىز. شىعىس تاريحىندا جەرگە جەكەمەنشىك اتىمەن بولماعان...» دەگەن سياقتى نارىق ناۋىتىنا نارازى ء«مىن قايراتقا, اۋىلىم» اتتى ماقالانىڭ اۋىلدى تىعىرىقتان شىعارۋدىڭ امالى رەتىندە «قاراوزەكتە» جاڭادان قۇرىلعان «بىرلىك» كووپەراتسياسىن قولداپ دامىتۋعا شاقىرعانى كولحوز, سوۆحوزدى قايتا جاڭعىرتپاقشى كەرتارتپالىق سانالماق-تى...
دەيتۇرعانمەن, اعا گازەتىمىزدىڭ باس رەداكتورى ءۋاليحان قاليجانوۆ شىرىلداعان شىندىقتى ايناعا تۇسىرگەندەي ماقالانى «ەگەمەننىڭ» 1997 جىلعى ءۇش نومىرىنە ۇتىرىنە دەيىن وزگەرتپەي جاريالادى.
نە پىكىردىڭ دۇرىس-بۇرىستىعىن ۋاقىت كورسەتپەك. باس رەداكتور اۋىلدىڭ كەساپاتقا ۇشىراعان تاعدىرى تۋرالى سىنعا جول بەرىپ اعاتتىق جاساماعانىن ءومىردىڭ ءوزى راستادى.
جۇرتقا ءمالىم, ەلباسى نۇرسۇلتان نازارباەۆتىڭ 2016 جىلعى مامىرداعى جارلىعى بويىنشا جەر كودەكسىنىڭ جەكەلەگەن تارماقتارىنا 2021 جىلدىڭ جەلتوقسان ايىنا دەيىن موراتوري ەنگىزىلدى. ءسويتىپ اۋىل شارۋاشىلىعى ماقساتىنداعى جەرلەردى قازاقستاندىقتارعا جەكەمەنشىككە, شەتەلدىكتەرگە جالعا بەرۋگە تىيىم سالىندى. جانە ءبىر ايتارلىقتاي جاڭالىق – رەسپۋبليكامىزدا اۋىلشارۋاشىلىق كووپەراتيۆتەرىنىڭ قۇرىلا باستاۋى.
شىندىق, ادىلەتتىلىك ءۇشىن ارپالىسۋ جۋرناليست, جازۋشى ۋاليحانعا اۋەلدەن-اق بويىنا ءسىڭىستى قاسيەت. كۇندەردىڭ كۇنى, ءۋاليحاننىڭ «لەنينشىل جاستىڭ» باس رەداكتورى كەزىندە كابينەتىنە حالىق ءارتىسى, داڭقتى رەجيسسەر اسقار توقپانوۆ كىرەدى. كىرگەن بويدا:
– ءۇي, اينالايىن, وقىدىم, اعالارىڭدى بايقاتپاي اراشالاپ الىپسىڭدار, كەلشى بەتتەرىڭنەن سۇيەيىن, – دەپ اق باتاسىن بەرەدى.
اسەكەڭنىڭ ءويتىپ اعىنان جارىلۋىنىڭ سەبەبى بار-دى. قازاقستان ورتالىق كومسومول كوميتەتى گازەتتىڭ باس رەداكتورىنا جەلتوقسان كوتەرىلىسىن ۇيىمداستىرۋشىلاردىڭ ءبىرى اسقار توقپانوۆتى اياۋسىز اشكەرەلەيتىن ماقالا جاريالايسىڭ دەپ بۇيىرادى. بۇيرىقتى جەتكىزۋشى: كۇن تارتىبىندە پارتبيلەت تۇرعانىن ۇمىتپاعىڭ! – دەپ دىكىڭدەيدى.
اسەكەڭدى وققا بايلاعىسى جوق رەداكتسيا امالىن تاۋىپ, نەگىزىنەن قازاق پەداگوگيكا ينستيتۋتىنىڭ كومسومول كوميتەتىنىڭ جۇمىسىن سىنايدى دا, اسقار توقپانوۆتى ەلەۋسىز كەيىپكەر ەتەدى...
ءۋاليحان قاليجانوۆ – قالامى قارىمدى جۋرناليست, ادىلەت قازىسى بولۋىمەن قاتار, داۋىرىمەن قاناتتاس, ىسىلعان مەملەكەت جانە قوعام قايراتكەرى دە. 1978-1980 جىلدارى ول, قازاقستان كومسومولى ورتالىق كوميتەتىنىڭ نۇسقاۋشىسى, سەكتور مەڭگەرۋشىسى, 1995-1996 جىلدارى قازاقستان رەسپۋبليكاسى ءباسپاسوز جانە اقپارات قۇرالدارى ءمينيسترىنىڭ ورىنباسارى, 1998-1999 جىلدارى پارلامەنت سەناتى ءباسپاسوز قىزمەتىنىڭ باسشىسى, پارلامەنت ءماجىلىسىنىڭ ءىى, ءىىى, ءىV شاقىرىلىمدارىنىڭ دەپۋتاتى بولىپ, زور جاۋاپتى قىزمەتتەردى ابىرويمەن اتقاردى.
مۇحتار اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى قىزمەتىنە اۋىسقانىندا ءۋاليحان قاليجانوۆ ءوزىنىڭ ۇلكەن مەملەكەتتىك جانە قوعامدىق كاتەگوريالارمەن ويلايتىن دارىندى قايراتكەر ەكەنىن دالەلدەي ءتۇسىپ, مەكەمەنىڭ عىلىمي-زەرتتەۋ ءھام عىلىمي-ۇيىمداستىرۋشىلىق جۇمىستارىنا ويداعىداي باسشىلىق ەتۋدە. سوڭعى جىلدارى ينستيتۋت ادەبيەتتانۋدىڭ كەلەلى پروبلەمالارىن كوتەرىپ, عىلىمي تەكسەرۋ-زەرتتەۋلەرىندە ايتارلىقتاي ناتيجەلەرگە قول جەتكىزدى.
ەلباسى «بولاشاققا باعدار: رۋحاني جاڭعىرۋ» ەڭبەگىندە ء«بىز جاڭعىرۋ جولىندا بابالاردان ميراس بولىپ, قانىمىزعا سىڭگەن, بۇگىندە تامىرىمىزدا بۇلكىلدەپ جاتقان ىزگى قاسيەتتەرىمىزدى قايتا تۇلەتۋىمىز كەرەك... ابايدىڭ دانالىعى, اۋەزوۆتىڭ عۇلامالىعى, جامبىلدىڭ جىرلارى مەن قۇرمانعازىنىڭ كۇيلەرى, عاسىرلار قويناۋىنان جەتكەن بابالار ءۇنىن – رۋحاني مادەنيەتىمىزدىڭ وسى اسا ماڭىزدى پاراسىن ساقتاۋ, دامىتۋ كەرەك» دەگەنى ءمالىم.
ينستيتۋت حالقىمىزدىڭ ەرتە زاماننان بەرگى رۋحاني مۇراسىن تۇگەل جيناقتاپ, 100 تومدىق «بابالار ءسوزى» سەرياسىن شىعاردى. بۇل يگىلىكتى ءىس ەلباسىنىڭ اتا مۇرانى جاڭا زامان ىڭعايىنا لايىقتاپ, جاس ۇرپاقتىڭ قاجەتىنە جاراتۋىمىز كەرەك دەگەن پايىمىن جۇزەگە اسىرۋعا ادەبيەت ينستيتۋتى ۇجىمىنىڭ بىلەك سىبانىپ كىرىسكەنىنە بۇلجىماس دالەل.
ىسكەر باسشى ءۋاليحان قاليجانوۆ – زەرگەر زەرتتەۋشى ءارى قالامى ۇشقىر جازۋشى دا. جيىرمادان استام كىتاپتىڭ اۆتورى. مۇحتار اۋەزوۆ اتىنداعى ينستيتۋت بوساعاسىنا كەلگەنىنەن بەرمەن قاراي عانا, اينالدىرعان 6 جىل ىشىندە «ويكوز», «ۇلت رۋحى», «ۆ پوتوكە ۆرەمەني», «جامبىل», «زامانا ءسوزى» دەگەن بەس كىتاپ تۋدى. «ويكوز» كىتابى (2012): «رەپرەسسيالانعان ەپوستار», «ۇلت رۋحى» (2105): «حV-ءحVىىى عاسىرلارداعى ادەبي مۇرا جانە قازاق تاريحى», «ۆ پوتوكە ۆرەمەني» (2014): «يسپىتانيە يستوريەي», «زامانا ءسوزى» (2016): «زار زاماننان زاڭعار زامانعا» اتتى ماقالالاردان باس الادى. اتالعان ماقالالار تاقىرىبىنىڭ وزىنەن-اق, ادەبيەتىمىزدىڭ ەرتە زاماندارداعى جاي-كۇيىنەن باستاپ بۇگىنگى زامانعا دەيىنگى دامۋ ءورىسى قامتىلاتىنى, اۆتوردىڭ عىلىمي-زەرتتەۋ دياپوزونىنىڭ مەيلىنشە كەڭ ەكەندىگى كورىنەدى.
باسپا اڭعارتپاسىندا «جامبىل» كىتابى – ۇلى اقىننىڭ «عۇمىرنامالىق جانە شىعارمالارىنىڭ ادەبي-كوركەمدىك الەمى تۋرالى زەرتتەۋ» دەلىنگەن. اۆتور شىعارماسىنىڭ «اقىن دەگەن ءبىر بۇلاق» اتتى ءبولىمىنىڭ جانرىن «ەسسەلەر» دەپ انىقتاپتى. ول ەسسەلەرىنىڭ ۇزىن سانى ءجۇز وتىزدان اسىپ جىعىلادى. بەلگىلى ءبىر مەزەتتە سان ساپاعا اينالىپ كەتەتىن ديالەكتيكا زاڭىنا سايكەس, جامبىلدىڭ بالالىق, ەستيار, ەسەيۋ شاقتارىن, قايتپاس, قايسار كۇرەسكەر حاراكتەرىن, جەر جۇزىنە ايگىلى اقىن بيىگىنە كوتەرىلۋىن بەينەلەگەن ءبولىمىنىڭ جانرىن, بىزدىڭشە, – قازاق حالىق پوەزياسىنىڭ الىبى, قازاق اۋىز ادەبيەتىنىڭ كوسەمى جامبىل جاباەۆ تۋرالى رومان-ەسسە ساناعان دۇرىسىراق.
شىعارما جامبىلدىڭ اكەسى جاپانىڭ, ۇستازى, ءپىرى ءسۇيىنبايدىڭ, جاكەڭنىڭ اتاقتى اقىن, سازگەر زامانداستارى – كەنەننىڭ, شاشۋباي مەن بالۋان شولاقتىڭ, قازاقتىڭ باسقا دا وركەشتى ونەرپازدارىنىڭ وبرازىن بەللەتريستيكالىق مانەردە, ناقتىلى دا ناقىشتى سۋرەتتەيدى. كومپوزيتسياسى شىمىر, جيناقى, تۋعان حالقىنىڭ عاسىردان استام ارعى-بەرگى تاريحىن قامتيتىن, جەتىسۋ وڭىرىنەن, قازاقتىڭ ۇلان-عايىر دالاسىنان باستاپ سوناۋ ماسكەۋ, لەنينگراد, كاۆكازعا دەيىنگى وڭىرلەرگە ەپيكالىق قۇلاشىن جايعان, نازىك ماحابباتتى ليريكامەن كومكەرىلگەن تۋىندى, ايت-ايتپا, – ناعىز رومان-ەسسە.
شىعارمانىڭ: ء«سۇيىنبايدان جامبىل قالاي باتا الدى؟», «جۇلدىز قالاي جانادى», ء«وز قۇنىن ءوزى الىپ كەتكەن», «جامبىل قالاي جەتىسۋدىڭ ءبىرىنشى اقىنى اتاندى؟», «ماداقتان شىققان شاتاق ءسوز», «مايكوت قالاي ىعىستى؟», «ۇزەڭگى جولداس», «جەڭىلگەن سارىباس جەرى وسى», ت.ب. ەسسەلەرىنەن ولەڭ ءسوزدىڭ جامبىلعا اجىراماس باق بولىپ قونۋىنىڭ, ايتىس اقىن ونەرىنىڭ قالىپتاسۋ, شىڭدالۋ, بايگە بەرمەس شاباندوزى اتالۋىنىڭ قىر-سىرىنا قانىعامىز.
رومان-ەسسە جامبىلدى جامبىل ەتكەن, حح عاسىردىڭ گومەرى اتاندىرعان قاسيەتىنىڭ قىر-سىرلارىنا قانىقتىرادى. جامبىلدىڭ ۇستازى ءسۇيىنبايدىڭ, دوس, جولداس ءىنىسى كەنەننىڭ, سونداي-اق جامبىلمەن ايتىس باسەكەسىنە تۇسكەن قۇلمامبەت, مايكوت, سارىباس, ت.ب. اقىنداردىڭ بەينەلەرى جانە جامبىلدىڭ وتەگەن, ساۋرىق, سۇرانشى باتىرلارعا ارناعان جىر-پوەمالارى ءبىر بولەك, كەڭەس كەزىندە تۋعان جىر, پوەمالارى ءبىر بولەك ءسوز ەتىلەدى.
جامبىلدىڭ مىنەز-ءبىتىمى, وي-سەزىم ەرەكشەلىكتەرى – قايتپاس قايسار جاۋجۇرەكتىلىگى, «الماس قىلىش» حاراكتەرى ايتىستاردا شىڭدالادى. «اۋىزدىعىمەن الىسقان كەمەل شاققا جەتكەن», «وردا بۇزعان وتىزدى» ارتقا» تاستاعان جامبىلدىڭ قۇلانايان قۇلمامبەتپەن ايتىسى ايتىلعانعا ايقىن دالەل.
ادامدىقتى ايت, ەرلىكتى ايت,
ەل بىرلىگىن ساقتاعان باتىرلىقتى ايت.
قارىمبايداي ساراڭدار تولىپ جاتىر,
ونى ماقتاپ, اۋرە بولماي, جونىڭە قايت!
رومان-ەسسە سۋرەتىنىڭ بوياۋلارى قانىق, تارتىمدى, جىلتىراۋىق, جارقىراۋىق ەمەس. «جامبىل بىردەن ات ويناتىپ, جاڭا زاماننىڭ جىرشىسى بولدى دەسەك, تاريحقا دا, جاكەڭ رۋحىنا دا قيانات بولار ەدى» دەپ ەسكەرتەدى اۆتور. رومان-ەسسە جاڭا زاماننىڭ جاقسىلىقتارىن اسىرمايدى, جاماندىقتارىن جاسىرمايدى. 1929 جىلى جامبىل جيىرماعا تارتا جىلقىسىن قوسىپ كولحوزعا مۇشەلىككە وتكەنىمەن, وتىزىنشى جىلدىڭ باس شەنىندە قىرعىزستانعا كوشۋگە ءماجبۇر بولادى. 1932 جىلعى اشتىقتا وزىنە تارتقان اقىن, تالانتتى پەرزەنتى قوجاش وپات بولادى («قىرعىز اسقان ەكى جىل» اتتى ەسسە).
جامبىلدىڭ باقىتىنا قاراي, كوپ ۇزاماي باسىنا تۇسكەن قايعىنىڭ قارا بۇلتى سەيىلە باستادى. بۇل جايتتاردى, جامبىلدىڭ جاڭا وكىمەتپەن قالاي ءتىل تابىسقانىن رومان-ەسسە قىسقا دا ۇتىمدى جەتكىزەدى. كەرنەيلەتىپ, سىرنايلاتپايدى. ەل جاقتان جامبىل: «كەڭەس وكىمەتى كەڭ ەكەن». «جاڭا وكىمەت ءبارىن تەڭەستىردى. ەندى باي دا, كەدەي دە جوق وتىرىقشى كاسىپكە ۇيرەتەدى» دەگەن جۇرەك جىلىتار حابار ەستيدى. «شالقاردىڭ شالقىپ جۇرگەن مەن اققۋى, كەلمەدى ساسىق شالشىق جەردە قالعىم» دەپ شالقىتا باستاعانى ءداپ سول كەزدەر. جامبىل 1934 جىلى الماتىدا اقىندار مەن انشىلەردىڭ, ونەرپازداردىڭ رەسپۋبليكالىق جيىنىنا قاتىسىپ, «الماتىعا كوك ەسەكپەن كەلىپ, داڭق پىراعىنا ءمىنىپ قايتادى».
1936 جىلدىڭ كوكتەمى. جامبىل قازاق ادەبيەتى مەن ونەرىنىڭ ونكۇندىگىنە قاتىسۋشىلارمەن بىرگە ماسكەۋگە بارادى.
«ماسكەۋ جامبىلعا قاتتى ۇنادى. اتى جەر جارعان قالانى كورەم دەپ ويلاپ پا ەكەن, جامبىل جاڭارعان ەلدى كوردى جول بويى...جامبىلدىڭ بويىنا ەرەكشە قۋات قۇيىلدى... كورگەن كوز, ەستىگەن قۇلاق, سەزىنگەن جۇرەك بار. مۇنى قالاي جىرلاماسقا؟ وسى جىر ماسكەۋدە شارىقتادى. بۇل جامبىلدىڭ جاڭا زامانعا دەگەن ريزاشىلىعى ەدى».
رومان-ەسسەدەگى, «جامبىل» كىتابىنىڭ باسقا دا تۋىندىلارىنداعى, مىسالعا, «جامبىل پوەزياسىنىڭ تاريحي نەگىزدەرى», «جامبىل پوەزياسىنىڭ پوەتيكاسى» اتتى عىلىمي-زەرتتەۋ ماقالالارىنداعى اۆتورلىق پوزيتسيانىڭ سۋبەكتيۆتىلىگىنەن گورى, وبەكتيۆتىك جاعى باسىم.
«كۇنسىزدەرگە كۇن بولعان» – تىڭ مەتافورا, قازاق حالقى ءومىرىنىڭ قازان رەۆوليۋتسياسىنان كەيىنگى اسقان قۋانىشى بەينەلەنگەن ناعىز وبەكتيۆتىك قۇبىلىس. البەتتە, قازاق ەلىنە تىكە قاتىستى. نيكولاي ءىى پاتشا جاعرافيا كارتاسىنان «قازاق» ءسوزىن ءوشىرىپ, ولكە-ولكەلەرىمىزدى باتىس ءسىبىر, شىعىس ءسىبىر, پالەنباي, تۇگەنباي گۋبەرنيالارعا بولشەكتەپ, تۋ-تالاقاي ەتىپ جىبەردى. نيكولاي پاتشا تاقتان تۇسكەن سوڭ الاشوردا قوزعالىسى قازاق اۆتونومياسىن قۇرۋدى, قازاق جەرىن تۇتاسىمەن قايتارۋدى رەسەيدىڭ كەرەنسكي باستاعان ۋاقىتشا ۇكىمەتىنەن, سونسوڭ ادميرال كولچاكتان, ءسىبىر ۇكىمەتى دەيتىننەن سۇراندى. بىراق بۇل شىركىندەردىڭ بىرىنەن قايىر بولمادى. ەل تىلەگىنە تەك ۆلاديمير يليچ لەنين قۇلاق استى. 1919 جىلعى 10 يۋلدە ۆ.ي.لەنين «قىرعىز (قازاق) ولكەسىن باسقارۋ جونىندەگى رەۆوليۋتسيالىق كوميتەت قۇرۋ تۋرالى دەكرەتكە, 1920 جىلعى 26 اۆگۋستا قىرعىز (قازاق) اۆتونوميالى سوتسياليستىك سوۆەت رەسپۋبليكاسىن قۇرۋ تۋرالى دەكرەتكە قول قويدى. 1936 جىلى مارتتا قازاق ەلى ستاليندىك كونستيتۋتسيا بويىنشا وداقتان بولىنۋگە دەيىن قۇقىلى قازاق سوۆەت رەسپۋبليكاسى اتاندى...
جامبىل وسى ۇلى وزگەرىستەردىڭ ءبارىن كورىپ, ءبىلىپ وتىردى. ۇلتىمىزدىڭ ۇلى قۋانىشىن حالىق اتىنان جىرلادى. رومان-ەسسە سول بۇلجىماس شىندىقتى, ايداي اقيقاتتى قاز-قالپىندا سۋرەتتەسە, نەسى ايىپ... جامبىل ولەڭ-جىرلارىن داتتاۋشىلىق اۆتور كوزقاراسىنا, دۇنيەتانىمىنا كولەڭكەسىن تۇسىرمەدى مە ەكەن؟ – دەگەن كوڭىلىڭدە تۋعان ساۋالعا رومان-ەسسەدەن «الايدا, بۇلايداعا» سالىنبايتىن, ايقىن دا اشىق جاۋاپ تاباسىڭ.
رومان-ەسسە جامبىلدىڭ لەنينگراد كوشەلەرىنە پلاكات بولىپ ىلىنگەن ولەڭىن شىن جۇرەكتەن سۇيىنە, سۇيسىنە تولعايدى: «...جاقسىلىق ەشقاشان ۇمىتىلمايدى. بۇگىندە ەگەمەن ەلدىڭ جامبىل اقىنى پەتەربۋرگ تورىندە تۇر... «لەنينگرادتسى, دەتي موي, لەنينگرادتسى, گوردوست مويا!» دەپ باستالاتىن ولەڭ مىستان قۇيىلىپ جازىلعان».
اكادەميك ءۋاليحان قاليجانوۆ عىلىمي ەڭبەكتەرىندە جامبىل جاباەۆ شىعارمالارىنا قاتىستى ءوز ەلىمىزدىڭ جانە شەتەل وقىمىستىلارىنىڭ, قالامگەرلەرىنىڭ زەرتتەۋلەرىن, ۇلى اقىن تۋرالى كوپتەگەن ەڭبەكتەرىن شولىپ تالقىلايدى. جامبىلدى «ۆوستوچنايا شارمانكا» دەپ جازىپ, ءتىپتى فولكلور مەن اۋىز ادەبيەتى ەكى بولەك عىلىمي ۇعىم ەكەندىگىنە قوناق بەرمەگەن شەت ەل زەرتتەۋشىلەرىنىڭ وسى سەكىلدى الىپقاشتى تۇجىرىمدارىن ءۋاليحان قاليجانوۆ سىن تەزىنە سالادى: «...ۆسەگدا لي زدراۆىي سمىسل پريسۋتستۆۋەت ۆ پرەدلاگاەمىح ۆنيمانيۋ چيتاتەلەي ستاتياح؟».
ۇلكەن قالامگەر, عالىم, سىنشى, جازۋشى ءۋاليحان قاليجانوۆتىڭ مازمۇنى تەرەڭ, ءتىلى شۇرايلى, وقىلۋى تارتىمدى ەڭبەكتەرى ونىڭ قازاق ادەبيەتىندەگى بيىك ورنىن كورسەتەدى.
* * *
ءومىر دەگەنىڭ اللا تاعالانىڭ كۇنى سياقتى. بىردە جاز. جاز بولىپ جادىراتادى. بىردە قىس. قىس بولىپ قىسادى.
ء ۋاليحان باۋىرىم! كۇنى كەشە قارالى جيىندا: ء«ۇمىتجان جارىمنىڭ ءتانىن ەل-جۇرتى جەر قويناۋىنا جەرلەسە, مەن ءۇمىتجانىمنىڭ جانىن جۇرەگىمە جەرلەدىم» دەپ ەدىڭ.
قايتەرسىڭ, تاعدىر نە سالسا دا كونەسىڭ...
مەنىڭ بايقاۋىمدا, ۋاكەڭدى اۋىر قايعى جاسىتا العان جوق. جەتپىس جاسىندا قىتايدا ءبىر ايەل جوعارى ءبىلىم العانىن كۋالاندىراتىن ديپلوم العانىنا, ال, دونالد ترامپ جەتپىسىندە اقش سياقتى جەر جۇزىندەگى ەڭ الىپ مەملەكەتتىڭ تىزگىنىن ۇستاۋ مارتەبەسىنە يە بولعانىنا قاراعاندا, بۇل جاس – ادامنىڭ جەتىپ-پىسكەن ۋاقىتى. بۇگىنگى مەرەيتوي يەسى ءۋاليحان قاليجانوۆ جەتپىسىنىڭ جەلكەسىنە مىنگەن شاعىندا, ۇلى اباي ايتپاقشى, «عىلىمدى ىزدەپ, دۇنيەنى كوزدەپ», ءوزى ءسۇيىپ قالاعان سالادا, رۋحاني قازىنامىزدى بايىتۋ جولىندا تاس ءتۇيىن, جىگەر-قايراتپەن ەڭبەكتەنۋدە.
شەريازدان ەلەۋكەنوۆ,
مەملەكەتتىك سىيلىقتىڭ لاۋرەاتى
