الماتىعا ەۋروپالىق تىڭدارماندار اراسىندا اتى كەڭىنەن تانىمال سالۆاتورە شاررينو جانە توسيو حوسوكاۆا, بەلگىلى قازاقستاندىق كومپوزيتور اقتوتى رايىمقۇلوۆا جانە سانجار بايتەرەكوۆتەر مەيمان رەتىندە شاقىرىلعان فەستيۆالدىڭ دارەجەسى ەڭ وزىق, سونى باعىتتاعى مۋزىكانىڭ ورىندالۋىمەن ايقىندالدى. كونسەرۆاتوريانىڭ زالدارى مەن وقۋ اۋديتوريالارىندا قازىرگى زاماننىڭ جەتەكشى مۋزىكانتتارى, مۋزىكاتانۋشىلار مەن ءان-كۇي بىلگىرلەرى XXI عاسىرداعى مۋزىكا تىلىندە پىكىرتالاس جۇرگىزىپ, مۋزىكا الەمىنىڭ ەڭ باستى مالىمەتتەرىمەن, جاڭالىقتارىمەن تانىستىرىپ, ونىڭ ەڭ وزەكتى باعىتتارىن ايقىنداپ كورسەتۋ ءۇشىن جينالدى. جالپى ماقساتى – جاڭا اكادەميالىق مۋزىكانى دامىتۋ, شىعارماشىلىق بايلانىستى جانداندىرۋ, ونەردى وي مەن ءومىردىڭ قۇرالى رەتىندە جەتىلدىرە ءتۇسۋ, قازىرگى زامانعى مۋزىكالىق شىعارمالاردى ناسيحاتتايتىن باستامالارعا قاتىسۋ.
فەستيۆالدىڭ كونتسەرتتىك باعدارلاماسى كەڭ اۋقىمدا جوسپارلاندى. ونىڭ اياسىندا 12 قازاقستاندىق جانە 4 شەتەلدىك پرەمەرا, سونداي-اق دارىستەر, تۇساۋكەسەرلەر, شاقىرىلعان قوناقتار مەن قازاقستاندىق مۋزىكانتتاردىڭ شەبەرلىك ساعاتتارى وتكىزىلدى. ماسەلەن, تريستان ميۋراي ءوز دارىسىندە «دىبىستان مۋزىكالىق كومپوزيتسياعا» قالاي ءوتۋ كەرەكتىگىن ايتسا, كلاۋس لەنگ تىڭداۋشىلارىنا «ماحاببات جانە نوتا» تاقىرىبىن ۇسىندى.
زاماناۋي مۋزىكا باعىتتارىن قاداعالاپ, بۇل ونەردى جاڭاشا جەتىلدىرۋ جولىندا ىزدەنىپ جۇرگەن اتى الەمگە ايگىلى كومپوزيتورلار تريستان ميۋراي (فرانتسيا) جانە كلاۋس لانگ (اۆستريا), فلەيتاشى ماريو كارولي (يتاليا), سكريپكاشى ۆلاديسلاۆ پەسين (رەسەي), «Nikel» (يزرايل), ديريجەر فەدور لەدنەۆ (رەسەي), «يگەرۋ» (قازاقستان) جانە قازاقستان رەسپۋبليكاسىنىڭ مەملەكەتتىك اكادەميالىق سيمفونيالىق وركەسترى ءتورت كۇن بويى قاتىسۋشىلاردىڭ قابىلەتىن سارالاپ, كورەرمەندەر الدىندا وزدەرى دە ونەر كورسەتتى.
زاماناۋي مۋزىكا فەستيۆالى الماتىدا عانا وتكىزىلەدى. فەستيۆالدىڭ ناقتى ناتيجەسى رەتىندە وزدەرىن تانىتۋدىڭ بىرەگەي جولىن ىزدەۋدەن جالىقپايتىن مۋزىكانتتار سانىنىڭ ارتۋىن, قازىرگى زامان مۋزىكاسى ورىندالاتىن كونتسەرتتەردەن جاڭا يدەيالار تاپقىسى كەلەتىن تىڭداۋشىلار قاتارىنىڭ تولىعا تۇسكەنىن اتاۋعا بولادى. ەندىگى جەردە زاماناۋي مۋزىكا فەستيۆالىن ۇلتتىق دەڭگەيدەگى مادەني ءىس-شاراعا اينالدىرۋ كوزدەلىپ وتىر.
ايگۇل احانبايقىزى,
«ەگەمەن قازاقستان»
الماتى
