– داۋرەن, بيىلعى قۇرلىق بىرىنشىلىگىنەن قانداي اسەر الىپ قايتتىڭىز؟
– چەمپيونات وتە قىزىقتى ءارى تارتىستى ءوتتى. بىرىنشىلىك بارىسىندا قانشاما ەموتسياعا تولى ويىندار بولدى. ءبىزدىڭ قۇراما 2016 جىلى سەربيادا وتكەن چەمپيوناتپەن سالىستىرعاندا جوعارى دەڭگەيدە وينادى. وكىنىشكە قاراي بۇل جولى جۇلدە بۇيىرمادى. ەۋروپا قۇرامالارى ءبىر-بىرىنە شامالاس, وڭاي ويىن بولعان جوق.
– ۇزاق ۋاقىت جاراقاتتان كوز اشپادىڭىز؟ قازىر جاعدايىڭىز قالاي؟
– بيىل بۇلشىق ەتتەن ەكى رەت جاراقات الدىم. سوڭعىسى وتە قيىنعا سوقتى, ەكى جارىم اي دوپ تەپكەن جوقپىن. باقىتىما وراي ەۋروپا چەمپيوناتىنا دەيىن قالىپقا كەلىپ ۇلگەردىم. قازىر ءبارى جاقسى.
– ەندى وتكەنگە شەگىنىس جاساپ كورسەك, فۋتبولشى بولۋىڭىزعا نە سەبەپ؟
– مەنى ۇلكەن اعام جەتى جاسىمدا فۋتبولعا الىپ كەلدى. تيمۋر مەكتەپتە فۋتبول سەكتسياسىنا قاتىساتىن, ال مەن ونىڭ سوڭىنان اڭدىپ, ىستەگەنىن قايتالاپ جۇرەتىنمىن. ءسويتىپ دوپ تەبۋدى بىرتە-بىرتە باستاپ كەتتىم. الدىمەن مەكتەپتىڭ كومانداسىندا, سوسىن «شاحتەردە» وينادىم. 14-تەن 25 جاسىما دەيىن «تۇلپار» ساپىندا وينادىم. ءبىزدىڭ بۋىننىڭ جولى بولدى دەپ ايتا الامىن, ويتكەنى ءامىرجان مۇقانوۆ جانە ۆلاديمير كراۆچەنكو سەكىلدى باپكەرلەردەن ءتالىم الدىق.
– قاراعاندىنىڭ 1987-1990 جىلدارى تۋعان فۋتزالشىلارى وسىدان 10 جىل بۇرىن جارقىراپ شىقتى, ۇلتتىق قۇرامانىڭ نەگىزىن قالادى. بىراق كەيىنگى جاستاردان قۇراماعا شاقىرىلىپ جۇرگەندەرى جوقتىڭ قاسى. مۇنىڭ سەبەبى نەدە؟
– 2005 جىلى «تۇلپار» كومانداسى قۇرىلدى. ال ءبىز 1987-1990 جىلعى جىگىتتەر «تۇلپار-2» كومانداسىندا وبلىس چەمپيوناتىندا ويناپ جۇردىك. ءامىرجان مۇقانوۆ پەن ۆلاديمير كراۆچەنكو باستاعان باپكەرلەر شتابى ءبىزدى نەگىزگى قۇرامعا تارتتى. ارادا 1,5 جىل وتكەندە قازاقستان چەمپيوناتىنا قاتىستىق. باپكەرىمىز سەنىم ارتتى, قاتەلىكتەردەن ساباق الۋدى ۇيرەندىك. الاڭدا كوپ ويناۋىمىزعا مۇمكىندىك الدىق. ونىڭ ۇستىنە باسەكەلەستىك وتە جوعارى بولدى. سونىڭ ءبارى ءوز جەمىسىن بەردى. قازىر جاستاردا ونداي ويىن تاجىريبەسى جوق. ەڭ وكىنشتىسى «تۇلپاردىڭ» باياعى مەكتەبى قالمادى.
– اعاڭىز تيمۋردىڭ «تۇلپار» ساپىندا ويناعانىن, ءبىر كەزدەرى ۇلتتىق قۇراماعا شاقىرىلعانىن بىلەمىز. بىراق سوڭعى كەزدەرى نەگە كورىنبەي كەتتى؟
– «تۇلپار» ساپىندا «ستولبا» بولىپ وينايتىن. ءوزى سولاقاي. كەيىننەن كوپ ۋاقىتىن وقۋعا ءبولىپ, فۋتزالدان الىستاپ كەتتى. قازىر وبلىس بىرىنشىلىگىندە ءوزى ءۇشىن عانا وينايدى.
– بوس ۋاقىتىڭىزدا نەمەن اينالىساسىز؟
– شىنىن ايتۋ كەرەك, مەندە بوس ۋاقىت اسا كوپ ەمەس. بولا قالعان جاعدايدا ۇيدە بولامىن, اراسىندا مونشاعا بارامىن. الماتىدا ءوزىم جالعىز تۇرعاندىقتان كەشكە شىڭعىس ەسەنامانوۆتىڭ ۇيىنە قوناققا بارىپ, ونىڭ بالالارىمەن وينايمىن.
– شەتەلدىڭ قاي كومانداسى ۇنايدى؟
– وزگە ەلدىڭ قۇراماسىنا ەشقاشان جانكۇيەر بولعان ەمەسپىن. ال كلۋبتاردان يسپانيانىڭ «اتلەتيكو» كلۋبىنا بۇيرەگىم بۇرادى. ويتكەنى ماعان جۇلدىزداردى جيناپ الاتىن كوماندالار ەشقاشان ۇناعان ەمەس. ال «اتلەتيكونىڭ» وزىندىك ويىن ورنەگى جانە كوماندالىق رۋحى بار. سوندىقتان جانىما جاقىن كوماندا.
– الەمدىك فۋتبول جۇلدىزدارى گول سوققاندا ارقايسىسى وزدەرىنشە تويلاپ جاتادى. ءسىزدىڭ سونداي ەرەكشە ءستيلىڭىز بار ما؟
– مەندە ونداي ەرەكشە «فيشكا» جوق. گول سوققاندا قۋانعانىمدى قالاي بىلدىرەمىن دەپ ويلاپ كورمەپپىم. باستىسى, كومانداما پايدام تيسە بولدى, گول سوعۋ جەكە ماقساتىم بولعان ەمەس. كولۋمبيادا وتكەن الەم چەمپيوناتىندا يسپانيا قاقپاسىنا سوققان گولىم ەسىمدە.
– جەيدەدەگى نومىرىڭىزگە قاتتى ءمان بەرەسىز بە؟
– بۇرىن ۇنەمى «5» نومىرمەن وينايتىنمىن. بىراق «قايراتتا» بۇل ءنومىر بوس ەمەس. ۋاقىت كەلە قانداي نومىرمەن ويناسا دا ءبارىبىر ەكەنىن ءتۇسىندىم. تەك «6» جانە «13» دەگەن ساندار ۇنامايدى, باسقا كەز كەلگەنىن الۋعا دايىنمىن.
بەك تولەۋ,
جۋرناليست
