مەن وقۋ ورنىنىڭ باسشىسى رەتىندە پرەزيدەنتتىڭ يپوتەكالىق نەسيەنىڭ پايىزدىق ءوسىمىن تومەندەتۋ, العاشقى جارنا كولەمىن ازايتۋعا بايلانىستى باستامالارىن ەرەكشە اتاپ وتكىم كەلەدى. بىزدەگى كوپتەگەن جاس مۇعالىمدەر, وندىرىستىك وقىتۋ شەبەرلەرى العاشقى كەزدەرى ازعانتاي ەڭبەكاقىمەن وتباسىن اسىراپ, جاتاقحانا نەمەسە جالدامالى پاتەرلەردى جاعالاپ جۇرەتىنى شىمبايىما باتاتىن.
پرەزيدەنت رەسپۋبليكالىق ورتاشا جالاقىدان تومەن ەڭبەكاقى الاتىن تەحنيكالىق قىزمەتكەرلەرىمىز, لابورانتتارىمىز, ءتىپتى قاراۋىلدارىمىزعا دەيىنگى ساناتتاعى توپتىڭ دا مۇددەسىنە ساي كەلەتىن باستامالاردى كوتەردى. ەگەر تابىس سالىعى تومەندەتىلسە, ولاردىڭ جالاقىلارى جوعارىلاپ, تابىسى ءسال دە بولسا كوبەيەر ەدى.
مەنى ەلباسىنىڭ جوعارى ءبىلىم الۋعا بولىنەتىن گرانتتار سانى كوبەيتىلىپ, ساپاسىنا ءمان بەرىلەتىنى تۇرعىسىنداعى باستاماسى شىن قۋانتتى. بۇل باستاما العىر, ۇزدىك وقۋشىلاردىڭ سىرتقا كەتۋىنە توقتاۋ بولارى ءسوزسىز. پرەزيدەنتتىڭ ءتورتىنشى باستاماسى دا ءبىلىم سالاسىنا تىكەلەي بايلانىستى. قولىنا ديپلومىن العان تۇلەگىمىز شاعىن نەسيە دە الىپ ءوز كاسىبىن باستاپ جاتسا, ارماندارىنىڭ ورىندالۋىنا ءبىر تابان جاقىنداي تۇسەر ەدى.
دەپۋتات رەتىندە ەلىمىزدى گازداندىرۋدىڭ كەشەندى باعدارلاماسىن دا قوس قولداپ قولدايمىن. اسىرەسە اۋىل جاستارى تۋعان جەرىندە ءتۇتىن تۇتەتىپ, الىسقا ارمان قۋىپ كەتپەۋشى ەدى.
سايىپ كەلگەندە, الەۋمەتتىك مەملەكەتتى قالىپتاستىرۋ ەلدىڭ ىنتىماعىنا, تۇراقتىلىعى مەن قازاقستاننىڭ تۇتاستاي دامۋىنا وڭ ىقپال ەتەرىنە سەنەمىن.
مارات جۇرقاباەۆ,
قوستاناي قالالىق ءماسليحاتىنىڭ دەپۋتاتى
