سونداي-اق «قۇرمانعازى دومبىراسى مۋزەي ساحناسىندا» اتتى ءۇش كۇندىك كورمەدە اتىراۋ وبلىستىق تاريحي-ولكەتانۋ مۋزەيىنىڭ قورىندا ساقتاۋلى تۇرعان قۇرمانعازىنىڭ دارا اۋىز مىلتىعى, شاكىرتى دينا نۇرپەيىسوۆانىڭ بەلبەۋى جانە باتىس قازاقستان تاريحي-ولكەتانۋ مۋزەيى قورىنداعى دينانىڭ كامزولى, ءحىح عاسىرداعى شاپانى مەن زەرگەرلىك بۇيىمدار جۇرت نازارىنا ۇسىنىلدى. كورمە سوڭى كۇي جانە ءداستۇرلى ءاننىڭ كەشىمەن جالعاسىن تاپتى. كونتسەرتتە قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ دومبىراشىلارى جانە جەكە ورىنداۋدا قاجىبەك بەكبوسىنوۆ, باتىرجان مىقتىباەۆ, اسەل الينا, راحات سارسەنوۆ, اسىلبەك احاتوۆ, ەدىگە ءنابي ۇلى ونەر كورسەتتى.
مەملەكەت باسشىسى ن.نازارباەۆ «بولاشاققا باعدار: رۋحاني جاڭعىرۋ» باعدارلامالىق ماقالاسىندا: ء«بىزدىڭ ۇلتتىق سالت-داستۇرلەرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز – ءبىر سوزبەن ايتقاندا, ۇلتتىق رۋحىمىز, بويىمىزدا ماڭگىلىك قالۋى ءتيىس. ابايدىڭ دانالىعى, اۋەزوۆتىڭ عۇلامالىعى, جامبىلدىڭ جىرلارى مەن قۇرمانعازىنىڭ كۇيلەرى, عاسىرلار قويناۋىنان جەتكەن بابالار ءۇنى – بۇلار ءبىزدىڭ رۋحاني مادەنيەتىمىزدىڭ ءبىر پاراسى عانا», دەگەن ەدى. ۇلت پەن ۇرپاق كەلەشەگى ءۇشىن كوتەرىلگەن ماسەلەلەردى جۇزەگە اسىرىپ, شەشىمىن تابۋ ماقساتىندا ىقىلاس اتىنداعى حالىق مۋزىكالىق اسپاپتارى مۋزەيى بەلگىلى ادامداردىڭ اسپاپتارىن جينايتىن ءداستۇرىن قايتا جاڭعىرتىپ, قولعا الماق. وسىعان بايلانىستى ارادا ءبىر عاسىر وتكەن سوڭ ۇلى كۇيشى قۇرمانعازى دومبىراسىنىڭ كوشىرمەسى مەن ونىڭ تىكەلەي شاكىرتى ەرعالي ەسجانوۆتىڭ دومبىراسى مۋزەي قورىن تولىقتىرىپ وتىر.
ايگۇل احانبايقىزى,
«ەگەمەن قازاقستان»
الماتى
