29-30 ناۋرىز كۇندەرى اۋداندا تاسقىن سالدارىنان 414 ءۇيدى سۋ باسىپ, 811 ادام قاۋىپسىز جەرگە كوشىرىلگەن-ءدى. بۇگىندە 474 ادام ۇيلەرىنە ورالسا, 34 ادام ەۆاكۋاتسيالىق بەكەتتەردى, 303 ادام تۋىستارىن پانالاۋدا. ەڭ قيىنى سول, اۋداندا 129 ءۇي ءتورت-بەس كۇننەن بەرى سۋ استىندا قالىپ وتىر. بۇگىن وبلىس اكىمى دانيال احمەتوۆ تىكۇشاقپەن زىريان اۋدانىنا ارنايى بارىپ, سۋ باسقان ۇيلەردى كورىپ, ەۆاكۋاتسيالىق بەكەتتەرگە ورنالاسقان تۇرعىندارمەن كەزدەسىپ, حال-جاعدايلارىن ءبىلىپ قايتتى.
ايماق باسشىسى اۋەلى مالەەۆ اۋىلىنا كىرە بەرىستەگى كوپىردىڭ جانىندا تۇرعىزىلىپ جاتقان بوگەت قۇرىلىسىمەن تانىستى. بۇل جەردە 1, 2, 3 ءساۋىر كۇندەرى بۇقتىرما وزەنىنىڭ مۇزىن جارۋ جۇمىستارى جۇرگىزىلگەن ەكەن. وزەن جاعاسىنداعى ۇلكەندىگى 4-5 مەترلىك مۇز كەسەكتەرىنەن-اق مۇندا تاسقىننىڭ ەكپىنى قانشالىقتى بولعاندىعىن اڭعارۋ قيىن ەمەس. زىريان اۋدانى اكىمىنىڭ سۋ تاسقىنى جونىندەگى ارنايى توپ باسشىسى امانگەلدى تىمباەۆتىڭ ايتۋىنشا, 31 ناۋرىزدا ءۇش كۇن توقتاۋسىز جاۋعان جاڭبىردان وزەندەگى سۋ دەڭگەيى 7 مەترگە دەيىن جەتىپ, كوپىردەن اسىپ, اۋىلعا قاۋىپ تونگەن. قازىرگى ۋاقىتتا مۇنداعى سۋ دەڭگەيى 3 مەترگە دەيىن تومەندەگەن.
د.احمەتوۆ زىريان قالاسىنداعى 4-5 كۇننەن بەرى سۋ استىندا توبەسى عانا قىلتيىپ تۇرعان ۇيلەردى دە كوردى. بۇل جەردە قازىرگى ۋاقىتتا 74 ءۇي سۋ استىندا قالىپ وتىر. توتەنشە جاعداي سالاسى ماماندارى مۇنداعى سۋ دەڭگەيى 2 مەتر شاماسىندا بولىپ تۇرعانىن, ءۇش تاۋلىكتە سۋ دەڭگەيى 30 سانتيمەترگە تومەندەگەنىن ايتادى. وبلىس اكىمى ءبىر-ەكى كۇن كولەمىندە سۋدى سورۋ جۇمىستارىن اياقتاۋدى تاپسىردى.
قازىرگى ۋاقىتتا وڭىردە تاسقىننان زارداپ شەككەن قالالار مەن اۋدانداردا قالپىنا كەلتىرۋ جۇمىستارى جۇرگىزىلىپ جاتقانى بەلگىلى. جالپى, 9 ناۋرىزدان بەرگى ارالىقتا ايماقتا 1371 ءۇيدى سۋ باسىپ, 3004 ادام قاۋىپسىز جەرلەرگە كوشىرىلىپتى. ونىڭ 2212-ءسى ۇيلەرىنە ورالسا, 240 ادام ەۆاكۋاتسيالىق بەكەتتەردى پانالاۋدا. قازىر وبلىستا مەملەكەتتىك قىزمەتكەرلەر, كاسىپورىن جۇمىسشىلارى مەن ستۋدەنتتەردەن قۇرالعان 3492 ادام, 603 كاسىبي مامان مەن 488 تەحنيكا اپاتتى اۋىزدىقتاۋ, اۋلا-ۇيلەردى تازارتۋ شارالارىنا جۇمىلدىرىلعان.
بۇگىن وسكەمەندە وڭىردەگى تاسقىن جاعدايىنا بايلانىستى جيىن وتكىزگەن د.احمەتوۆ وبلىس ورتالىعىندا 11, اياگوزدە 52, گلۋبوكوەدە 21, شەمونايحادا 16, كاتونقاراعاي اۋدانىندا 4 ءۇي تۇرۋعا جارامسىز دەپ تانىلعانىن, سەمەي مەن زىرياندا ارنايى كوميسسيا جۇمىس ىستەپ جاتقانىن, الدىن الا ەسەپتەۋلەر بويىنشا تاسقىننان كەلگەن شىعىن كولەمى 3,2 ميلليارد تەڭگەنى قۇراپ وتىرعانىن ايتتى.
ازامات قاسىم,
«ەگەمەن قازاقستان»
شىعىس قازاقستان وبلىسى
سۋرەتتەردى تۇسىرگەن اۆتور
