سەناتورلار ساپار باعدارلاماسى بويىنشا «Kazakhmys Stelting» جاۋاپكەرشىلىگى شەكتەۋلى سەرىكتەستىگىندە ەڭبەك ۇجىمىمەن كەزدەستى. بالقاش ءوندىرىس الاڭدارىندا بارلىق قوسالقى كاسىپورىنداردى قوسقاندا 10 مىڭعا جۋىق ادام ەڭبەك ەتەدى. دەپۋتاتتار جۇمىسشىلاردىڭ ورتاشا ەڭبەكاقىسىنا, ءوندىرىس جاعدايىنا, تەحنيكالىق قاۋىپسىزدىك جانە وزەكتى ماسەلەلەردىڭ بولۋىنا نازار اۋداردى. كاسىپورىننىڭ تەحنيكالىق ديرەكتورى گۋلاميدين كاميردينوۆ بيىل 30 مىڭ تەڭگەگە كوتەرىلىپ, 170 مىڭعا جەتكەنىن حابارلادى.
كەزدەسۋ بارىسىندا پرەزيدەنتتىڭ ەلىمىزدى گازداندىرۋ جونىندەگى بەسىنشى باستاماسى ەرەكشە ىقىلاس تۋعىزدى. كاسىپورىن وكىلدەرىنىڭ پىكىرىنشە, كومىر مەن مازۋتتان باس تارتۋ جانە گازبەن قامتاماسىز ەتۋگە كوشۋ ەكونوميكالىق كورسەتكىشتەردى عانا ەمەس, ايماقتاعى ەكولوگيالىق جاعدايدى دا جاقسارتاتىن بولادى. سەناتوردىڭ ايتۋىنشا, بۇل ماسەلە وبلىستىق دەڭگەيدە شەشىلەتىن بولادى. پارلامەنت دەپۋتاتتارى كۇكىرت قىشقىلدى مىس بالقىتۋ وندىرىسىندە دە بولدى.
ر.ابدىكەروۆ پەن م.تاعىموۆ №15 مەكتەپ-ليتسەيدە وقۋ ورىندارىنىڭ باسشىلارىمەن جانە بالقاشتاعى ستۋدەنت جاستارمەن كەزدەستى.
- پرەزيدەنتتىڭ بەس الەۋمەتتىك باستاماسى قازاقستاندىقتاردىڭ ءومىر دەڭگەيىن جاقسارتۋعا باعىتتالعان. ءبىز وسى قۇجاتتىڭ ماڭىزدىلىعى مەن وزەكتىلىگىن ايتۋعا كەلدىك, - دەدى رىسقالي ابدىكەروۆ.
سەناتورلار اركىمنىڭ كاسىبىن اشۋداعى تەتىكتەر, ءتيىمدى يپوتەكا شارتتارى, ەلدى مەكەندەردى گازداندىرۋ, سالىقتى تومەندەتۋ تۋرالى ايتا كەلىپ, وتاندىق نارىقتا قانداي ماماندىقتار قاجەت ەكەنىنە توقتالدى.
قالا اكىمى الەكساندر اگليۋلين كەزدەسۋگە قاتىسقان سەناتورلارعا العىس ايتا كەلىپ, بالقاشتىقتار ەلباسىنىڭ ۇندەۋىندە ايتىلعان بارلىق باعىتتاردى جوسپارلى تۇردە جانە تولىقتاي ىسكە اسىرۋعا بار كۇشىن سالاتىنىن ايتتى.
دەپۋتاتتارعا بالقاش قالاسىنىڭ جاعدايىن جاقسارتۋعا ارنالعان بىرقاتار ۇسىنىستار ايتىلدى. اتاپ ايتقاندا, تازالاۋ قۇرىلىستارىن سالۋ مەن تۇرمىستىق قاتتى قالدىقتاردىڭ جاڭا پوليگونىن بەلگىلەۋ, ساياق اۋىلىن ساپالى اۋىز سۋمەن قامتاماسىز ەتۋ, بالقاشتان قاراعاندىعا, استاناعا, الماتىعا جانە باسقا دا قالالارعا جۇيەلى اۋە قاتىناسىن سۋبسيديالاۋ ماسەلەلەرى قوزعالدى. سەناتورلار ودان كەيىن سارىشاعان اۋىلى مەن پريوزەرسك قالاسىنا باردى.
