اسىرەسە قاناتقاقتى جوبالار نەگىزىندە قولعا الىنعان مەكتەپ مۇعالىمدەرىنىڭ بىلىكتىلىگىن ارتتىرۋ ماسەلەسىنە ايرىقشا كوڭىل بولىنۋدە. جاڭا جۇيەنىڭ جەتكەن جەتىستىگى مەن ءالى دە اقساپ جاتقان تۇستارىن سارالاعان ماماندار الماتىداعى ش.ءۋاليحانوۆ اتىنداعى №12 مەكتەپ-گيمنازياسىندا «فيزيكا», «حيميا», «بيولوگيا» پاندەرى بويىنشا اعىلشىن تىلىندە ازىرلەنگەن وقۋ-ادىستەمەلىك كەشەندەردى ءبىلىم بەرۋ ۇردىسىنە ءساتتى ەنگىزۋ» اتتى حالىقارالىق عىلىمي-پراكتيكالىق سەميناردا باس قوستى.
قاتىسۋشىلار جاڭارتىلعان ءبىلىم بەرۋ مازمۇنىن ەنگىزۋ اياسىندا XXI عاسىر وقۋشىسىنىڭ داعدىلارىن دامىتۋ, اعىلشىن ءتىلىن جەتىك بىلەتىن بىلىكتى ءپان مۇعالىمدەرىن دايارلاۋ سىندى وزەكتى ماسەلەلەردى تالقىلادى. ەلىمىزدىڭ ءار وڭىرىنەن كەلگەن بىلىكتى ۇستازدار فيزيكا, حيميا, بيولوگيا پاندەرى بويىنشا اعىلشىن تىلىندە كورنەكتى ساباقتار وتكىزدى. جاڭارتىلعان ءبىلىم مازمۇنىنا سايكەس عىلىمي باعىتتاعى پاندەردى اعىلشىن تىلىندە وقىتۋدىڭ ادىستەمەلىك بازاسىن ءارى قاراي جەتىلدىرۋ بويىنشا ۇسىنىستار ايتىلدى. سەمينار جۇمىسىنا ارنايى كەلگەن Express Publishing باسپاسىنىڭ CLIL ادىستەمەسىنىڭ كەڭەسشى-ساراپشىسى, كەمبريدج ۋنيۆەرسيتەتىنىڭ حالىقارالىق ەمتيحان كەڭەسىنىڭ ساراپشىسى بوب وبيدىڭ سوزىنشە, اعىلشىن ءتىلىن ۇيرەتۋدى پاندىك ءبىلىم بەرۋ بارىسىندا قولدانۋدىڭ ءتيىمدى تۇستارى كوپ. «مەن وقۋشىلارعا ءتىل ۇيرەتۋگە ارنالعان كوپتەگەن مەتوديكالىق كىتاپتار جازدىم.
مۇعالىمدەرمەن پىكىر الماسىپ, ءتىلدى تەز ءارى جەڭىل ۇيرەنۋگە قاتىستى ءوز تاجىريبەممەن ءبولىستىم. مەن ۇيرەتكەن وقۋ باعدارلاماسى بويىنشا مەكتەپ وقىتۋشىلارى اعىلشىن ءتىلىن مەڭگەرۋدىڭ ۆ1 دەڭگەيىنە جەتۋى ءتيىس. فرانتسيا, يسپانيا, يتاليا سياقتى كوپتەگەن ەلدەردىڭ مۇعالىمدەرى دە وسى دەڭگەيدى مەڭگەرگەن. ۆ1 دەڭگەيى اعىلشىن تىلىندە انىق سويلەۋ ارقىلى جەكە پاندەردى يگەرۋگە تولىقتاي جەتكىلىكتى», دەيدى ول. ەلىمىزدەگى نازارباەۆ زياتكەرلىك مەكتەپتەرىنىڭ باعدارلامالارىن ازىرلەگەن مامان ءوز سوزىندە قازاقستاندىق مۇعالىمدەردىڭ ىشىندە, اسىرەسە جاس مامانداردىڭ ءتىل يگەرۋگە دەگەن تالپىنىسى جوعارى ەكەنىن ايتادى. شارا اياسىندا جەكە پاندەر بويىنشا زەرتحانالارعا بولىنگەن بىلىكتى مۇعالىمدەر وقىتۋدىڭ ينتەراكتيۆتى ادىستەرىن پايدالانا وتىرىپ, ءوز ءبىلىم-بىلىگىن ورتاعا سالدى.
الماتى قالالىق ءبىلىم باسقارماسى ماماندارىنىڭ ايتۋىنشا, اعىمداعى جىلدىڭ قازان ايىندا قالا مەكتەپتەرى اراسىندا «جەتى جۇرتتىڭ ءتىلىن ءبىل» اتتى بايقاۋ ۇيىمداستىرىلادى. بايقاۋعا ءار مەكتەپتەن جوعارى سىنىپتا وقيتىن ءبىر وقۋشى عانا قاتىسا الادى. كونكۋرس ناتيجەسىندە ناعىز مىقتىلار سارالانىپ, ءۇش ءتىلدى جەتىك مەڭگەرگەن شاكىرتتەر انىقتالماق. بۇل جوبا مەكتەپ وقۋشىلارىنىڭ ءتىل يگەرۋگە دەگەن قۇلشىنىسىن ارتتىرۋعا باعىتتالعان.
– وتكەن جىلدىڭ قىركۇيەك ايىنان باستاپ بىرقاتار قالا مەكتەپتەرىندە فيزيكا, حيميا, ينفورماتيكا, بيولوگيا پاندەرى اعىلشىن تىلىندە جۇرگىزىلىپ كەلەدى. ونىڭ ناتيجەسى قانداي, پروبلەمالارىن قالاي شەشۋ كەرەك دەگەن ساۋالدارعا جاۋاپ الۋ ءۇشىن, سونداي-اق وسى ۋاقىتقا دەيىن وتكىزىلگەن ءىس-شارالاردىڭ ناتيجەسىن قورىتىندىلاپ, تاجىريبە الماسۋ ماقساتىندا جينالىپ وتىرمىز. الماتى قالاسىندا بارلىعى 202 مەكتەپ بولسا, ونىڭ 27-ءسى وسى قاناتقاقتى جوباعا كىرىپ وتىر. كەيبىر مەكتەپتەردە تەك فيزيكا نەمەسە حيميا پاندەرى, ال كەيبىر وقۋ وشاقتارىندا بارلىق سەگىزىنشى سىنىپتار جوباعا كىرگەن. وتكىزىلگەن سەمينارلار مەن مۇعالىمدەردىڭ ساباقتارىنا قاتىسۋ ناتيجەسىن سارالاي كەلە, ۇشتىلدىلىك بويىنشا وسى پاندەردى اعىلشىن تىلىندە جوعارى سىنىپتاردا دا جۇرگىزۋگە بولاتىنىنا كوز جەتكىزدىك. بالالار ءتىلدى تەك قۇرال رەتىندە قولدانادى دەگەن قورىتىندىعا كەلدىك. ازىرگە ناتيجە جامان ەمەس. بۇل باعىتتاعى جۇمىستار الداعى ۋاقىتتا دا جالعاسىن تاباتىن بولادى, – دەيدى الماتى قالالىق ءبىلىم باسقارماسىنىڭ ورتا ءبىلىم ءبولىمىنىڭ باس مامانى قارلىعاش ءابدىماناپوۆا.
سەمينار ءبىلىم جانە عىلىم مينيسترلىگى مەن «EduStream» ءبىلىم بەرۋ كومپانياسى جانە Express Publishing باسپاسىنىڭ قولداۋىمەن ۇيىمداستىرىلدى. اتالعان ءىس-شارا ۇستازدار قاۋىمى ءۇشىن تاجىريبە الماسۋدىڭ وزىق الاڭىنا اينالدى دەۋگە بولادى.
ارمان وكتيابر,
«ەگەمەن قازاقستان»
الماتى
