مۇنداي اڭگىمەنىڭ قوزعالۋىنا سەنات دەپۋتاتتارى مۇرات باقتيار ۇلى مەن بەكمىرزا ەلامانوۆتىڭ قىزىلوردا وبلىسى, قارماقشى, جالاعاش جانە جاڭاقورعان اۋداندارىنىڭ تۇرعىندارىمەن, شارۋا قوجالىعى وكىلدەرىمەن, ارداگەرلەر كەڭەسىمەن, اۋداندىق ماسليحات دەپۋتاتتارىمەن, ەمحانا ۇجىمىمەن سونداي-اق اۋدان بەلسەندىلەرىمەن كەزدەسۋ بارىسىندا وسى سالادا جۇمىس ىستەپ جاتقان ەڭبەككەرلەردىڭ اۋىل شارۋاشىلىعى كووپەراتيۆتەرى تۋرالى زاڭ ءالى ءوز دارەجەسىندە جۇمىس ىستەپ جاتقان جوق دەگەن ءۋاجى سەبەپ بولدى.
«كووپەراتيۆتەردىڭ ءرولىن كۇشەيتۋ ءۇشىن, ولاردى قاناتتاندىراتىن ىنتالاندىرۋ تەتىگى قاراستىرىلىپ, قاجەتتى دارەجەدە قارجىلاندىرىلۋى كەرەك» دەدى شارۋا قوجالىقتارىنىڭ وكىلدەرى.
كەزدەسۋ كەزىندە دەپۋتاتتار تۇرعىندارمەن وي-پىكىرلەر الماسىپ, سوڭى ەمەن-جارقىن اشىق اڭگىمەگە ۇلاستى. ەلباسى ۇندەۋىنىڭ باسىمدىقتارىن ناتيجەلى جۇزەگە اسىرۋعا جان-جاقتى تالقىلاۋلار جاسالىپ, سەناتورلار جينالعان جۇرتتى ەلىمىزدى وركەندەتۋ جولىندا جۇمىلا جۇمىس جاساۋعا شاقىردى.
سونىمەن قاتار, سەنات دەپۋتاتتارى اۋدان اكتيۆتەرىمەن بىرگە اپاتتى جاعدايداعى اۋرۋحانالاردى ارالادى, شەشىمىن تاپپاي كەلە جاتقان جالاعاش اۋداندىق ورتالىق اۋرۋحانا قۇرىلىسىن قارجىلاندىرۋ, جالاعاش اۋدانىنىڭ ورتالىعىن گازداندىرۋ ماسەلەسى سياقتى اۋقىمدى پروبلەمالىق سۇراقتارعا نازار اۋداردى.
مۇرات باحتيار ۇلى جانە بەكمىرزا ەلامانوۆپەن كەزدەسكەن اۋىل تۇرعىندارى وزدەرىنىڭ وتىنىشتەرى مەن ۇسىنىستارىن ايتتى. سولاردىڭ ءبىرى – جەردى جالعا بەرۋ ينستيتۋتىن قالىپتاستىرۋ ماسەلەسى. جينالعان حالىق كوكەيلەرىندەگى سۇراقتارعا قاناعاتتانارلىق جاۋاپ الىپ تارقاستى.
