ياعني حالىقتىڭ ءوسىمى جاقسى. بىراق مۇنداعى ەڭ ءبىر كۇردەلى ماسەلە – جۇمىسسىزدىق. ياعني جۇمىس ىستەۋگە قابىلەتى زەينەت جاسىنا جەتپەگەن 22 مىڭ ادام ەكى قولعا ءبىر كۇرەك تاپپاي قينالىپ ءجۇر. ءتىپتى بۇلاردىڭ 13 مىڭىندا جوعارى ءبىلىمى بار.
وتكەن اپتانىڭ اياعىندا وسى ءبىر قوردالانعان ماسەلەنى رەتتەۋ ماقساتىندا باي-ولكە ايماقتىق وكىلەتتەر قۇرىلتاي توراعاسى باۋىرجان دالەل ۇلى باستاعان ايماق باسشىلارى ەلورداعا كەلىپ, دۇنيەجۇزى قازاقتارى قاۋىمداستىعىنىڭ پارمەندى ۇيىمداستىرۋىمەن كەلەلى باسقوسۋ وتكىزدى.
جيىنعا دياسپورا ىسىنە قاتىسى بار ەلىمىزدەگى سالالىق ۆەدومستۆولاردان ارنايى وكىلدەر شاقىرىلىپ, بايولكەلىك قانداستارىمىزدى الاڭداتىپ وتىرعان الەۋمەتتىك جاعداي تالقىلاندى.
وسى ورايدا, دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارىنىڭ كەڭەسشىسى مۇحيت يزبانوۆ, الىستاعى قانداستاردىڭ ساياسي جانە الەۋمەتتىك ماسەلەسىنە بەيجاي قاراۋعا ءتيىس ەمەسپىز دەگەندى جيىنعا قاتىسۋشى ۆەدومستۆو وكىلدەرىنە ەسكەرتە وتىرىپ, بۇل تۋرالى وتكەن جازدا ۇيىمداستىرىلعان دۇنيەجۇزى قازاقتارىنىڭ V قۇرىلتايىندا ەلباسى نۇرسۇلتان نازارباەۆ قانداستارىمىزعا مەملەكەت پەن قوعام تاراپىنان جان-جاقتى قولداۋ مەن كومەك كورسەتۋدى تاپسىرعانىن اتاپ ايتتى.
باسقوسۋ ۇستىندە قانداستارىمىزعا قاتىستى الەۋمەتتىك ماسەلەلەرمەن اينالىسۋشى باستى مەكەمە ەڭبەك جانە حالىقتى الەۋمەتتىك قورعاۋ مينيس-
ترلىگىنىڭ وكىلى رۋسلان تلەۋباەۆ مىرزا ءسوز الىپ, شەتتەن كەلگەن باۋىرلار «ورالمان كۋالىگىن» العان ساتتەن باستاپ, قازاقستاندىق ازاماتتارمەن بىردەي الەۋمەتتىك سۇرانىستارعا يەلىك ەتۋگە تەڭ قۇقىلى ەكەندىگىن جەتكىزىپ, قازاقستان رەسپۋبليكاسى ۇكىمەتىنىڭ 2016 جىلعى 18 اقپانداعى №83 قاۋلىسىنا سايكەس ورالمانداردى قونىستاندىرۋ ءۇشىن ارنايى وڭىرلەر ايقىندالعانىن, مۇنداي مارتەبەگە اقمولا, شىعىس قازاقستان, قوستاناي, پاۆلودار, سولتۇستىك قازاقستان وبلىستارى يە بولعاندىعىن, سول سەبەپتى بۇل وڭىرلەرگە قونىستانعان ورالماندارعا تومەندەگىدەي مەملەكەتتىك قولداۋ شارالارى رەتىندە سۋبسيديا قاراستىرىلعاندىعىن اتاپ ءوتتى:
1. قونىس اۋدارعان وتباسىنىڭ ءاربىر مۇشەسىنە بىرجولعى تولەم 35 اەك (84,2 مىڭ تەڭگە) بەرىلەدى;
2. تۇرعىن ءۇي جالداۋ جانە كوممۋنالدىق قىزمەتتەرگە كەتەتىن شىعىندارىن جابۋ ءۇشىن ءاربىر جالداۋشى وتباسىنا 12 ايدىڭ كولەمىندە 15-تەن 30 اەك-كە (36,1 - 72,1 مىڭ تەڭگە ارالىعى) دەيىن قارجى تولەنەدى;
3. 2018 جىلدان باستاپ وڭىرارالىق قونىس اۋدارۋعا جاردەم كورسەتەتىن جۇمىس بەرۋشىگە 450 اەك مولشەرىندە سۋبسيديالار بەرىلەدى جانە دە بيزنەس-يدەيالاردى ىسكە اسىرۋعا ارنالعان مەملەكەتتىك گرانتتار 100 اەك-كە دەيىنگى مولشەردە ۇسىنىلادى.
ياعني جوعارىدا اتاپ وتىلگەن الەۋمەتتىك-قۇقىقتىق كورسەتكىشتەردى پايدالانۋعا ورالمان قانداستار تولىق قۇقىلى دەگەن ءسوز.
جيىن بارىسىندا قانداستارىمىزعا قاتىستى الەۋمەتتىك ماسەلەلەردىڭ سىرتىندا, شەتەلدەگى قازاق جاستارىنىڭ قازاقستاندا ءبىلىم الۋ جايى, سونىمەن قاتار باسقا مەملەكەتتە وقىعان جەكە تۇلعانىڭ ماماندىق ديپلومىن وتاندىق ستاندارتقا سايكەستىرۋ ءىسى, سونداي-اق قونىستانۋشىلارعا كاسىپتىك دەڭگەيدە ءبىلىم بەرۋدىڭ قاجەتتىلىگى ت.ب. ءسوز بولىپ, بۇلاردىڭ كەيبىرى سول جەردە شەشىمىن تاپتى.
بەكەن قايرات ۇلى,
«ەگەمەن قازاقستان»
