پرەزيدەنت حالىققا ۇندەۋىندە: «مەن وركەندەگەن قازاقستان – ەڭ الدىمەن مەملەكەتى ءوزىن قورعاپ, قولدايتىنىن, قامقورلىق جاسايتىنىن سەزىنەتىن, تيىسىنشە ەلىن جان جۇرەگىمەن سۇيەتىن, وزدەرىنە سەنىمدى ادامدار دەپ سانايمىن», دەدى. شىندىعىندا, ەلىن جان جۇرەگىمەن ءسۇيۋ – حالىقتىڭ مەملەكەت ىسىمەن ۇندەستىگىنىڭ كورىنىسى. نۇرسۇلتان نازارباەۆتىڭ بۇل سوزدەرىن جۇرەگىمىزگە جاقىن قابىلدادىق. اسىرەسە, ۇلتتىق-مادەني بىرلەستىكتەرگە نازار اۋدارعانى قۋانتتى. وسى ورايدا قازاقستان حالقىنىڭ بىرلىگىنە قحا-نىڭ قوسقان ۇلەسىن ماقتانىشپەن ايتا الامىز. ەندى مەملەكەت باسشىسى نۇرسۇلتان نازارباەۆتىڭ ناۋرىزداعى ۇندەۋىنە بايلانىستى «قازاقستان – ءبىزدىڭ ورتاق ءۇيىمىز» يدەياسى جاڭا ماعىنامەن تولىعا ءتۇسۋى ءتيىس.
ۇندەۋدىڭ مازمۇنى تۇتاستاي ۇلتتىڭ ءال-اۋقاتىن كوتەرۋگە ارنالعان. ۇلتتىق بانك كەمىندە 1 تريلليون تەڭگە قارجى تارتاتىن ارنايى كومپانيا قۇرىپ, ول قارجىنى بانكتەردىڭ جوعارىدا ايتىلعان شارتتار بويىنشا بەرەتىن جاڭا يپوتەكالىق نەسيەلەرىن ساتىپ الۋعا جۇمساپ, نەسيە ءوسىمىنىڭ مولشەرلەمەسىن قازىرگىدەي 14-16 ەمەس, جىلىنا 7 پايىزدان اسپايتىنداي ەتۋ تۋرالى باستاما كوتەرىلدى. سونداي-اق ورتالىق جانە سولتۇستىك وڭىرلەرگە گاز جەتكىزۋگە بايلانىستى ۇتىمدى شارالار بەكىتىلدى. دەمەك, بۇل باستامالار پرەزيدەنتتىڭ بۇرىنعى ۇسىنىستارى ءتارىزدى الەۋمەتتىك مەملەكەتتىڭ شىنايى ءارى سىندارلى قازاقستاندىق مودەلىن قالىپتاستىرۋعا باعىتتالعان.
ەندى شاعىن نەسيە الاتىنداردىڭ سانى 2017 جىلمەن سالىستىرعاندا 2 ەسەگە ارتىپ, 14 مىڭ ادامعا جەتەتىن بولادى. 2019 جىلدىڭ 1 قاڭتارىنان باستاپ سالىستىرمالى تۇردە جالاقىسى تومەن قازاقستاندىقتاردى قولداۋ ءۇشىن ولاردىڭ سالىق جۇكتەمەسىن 10 ەسەگە ازايتىپ, 1 پايىز عانا سالىق سالىنادى. بۇل شارانىڭ ناتيجەسى بويىنشا جالاقىنىڭ ءوسىمى جۇمىس بەرۋشىلەردىڭ جۇكتەمەسىنە اسەر ەتپەيتىندىگى ماڭىزدى. ءارى قاراي ۇكىمەت تابىس سالىعىنىڭ پروگرەسسيۆتى شكالاسىن ەنگىزۋ مۇمكىندىگىن زەردەلەيتىن بولدى. بۇل جۇيە جالاقىسى تومەن ادامداردىڭ تابىسىن ارتتىرىپ, حالىقتىڭ ءومىر ءسۇرۋ دەڭگەيىن ىڭعايىمەن تەڭەستىرۋگە مۇمكىندىك تۋدىرادى. ۇندەۋدىڭ پرەزيدەنت ەرەكشە باسىمدىق بەرگەن تاعى ءبىر ماڭىزدى باعىتى رەتىندە قازىر جىل سايىن بولىنەتىن 54 مىڭ گرانتقا قوسىمشا 2018-2019 وقۋ جىلىندا تاعى 20 مىڭ گرانت بولىنەتىندىگىن ايتۋعا بولادى.
سونىمەن بىرگە تەحنيكالىق جانە اۋىل شارۋاشىلىعى ماماندىقتارى بويىنشا بارلىق جوعارى وقۋ ورىندارى گرانتتارىنىڭ قۇنىن ۇلتتىق جوعارى وقۋ ورىندارىنىڭ گرانتتارى دەڭگەيىنە دەيىن كوتەرۋ قاراستىرىلعان. پرەزيدەنت نۇرسۇلتان نازارباەۆتىڭ قوعامنىڭ الەۋمەتتىك بىرلىگىن نىعايتۋعا باعىتتالعان باستامالارى ەلدىڭ مۇقتاجدىعىنا ساي كەلدى دەپ ەسەپتەيمىن.
گۇلنار انناكۋليەۆا,
الماتى قالالىق جانە الماتى وبلىسىنىڭ «تۇركىمەن قوعامدىق-مادەني ورتالىعى» قب ءتورايىمى
