پرەزيدەنت ءسوزىنىڭ كىرىسپەسىندە حالىقتىڭ بىرلىگى, مەملەكەتتىڭ سىندارلى ساياساتى ارقاسىندا قازاقستاندىقتار بۇكىل سىننان سۇرىنبەي وتكەنىنە توقتالدى.
ەلباسى قازاقستاننىڭ ءتورت وبلىسىندا قازاق حالقىنا العىس مونۋمەنتى اشىلعانىن اتاپ ءوتتى. اتالعان ەسكەرتكىشتەردىڭ ءبارى قيىن-قىستاۋ زاماندا كومەك قولىن سوزعان حالىق پەن جەرگە العىس رەتىندە قازاقستانداعى ءتۇرلى ەتنوستىق توپتاردىڭ تاراپىنان سالىندى. مۇنىڭ ءبارى قازاق حالقىنىڭ ۇلتتىق تاريحىنا تەرەڭ قۇرمەتتى كورسەتەدى. بۇل ءوزارا قۇرمەت پەن سەنىم ءبىزدىڭ حالىقتىڭ بىرەگەيلىگىن قالىپتاستىرادى. وسى باستاما ارقىلى قازاقستاندىقتاردىڭ كوڭىلىنىڭ كەڭدىگى بايقالادى.
العىس مونۋمەنتى العاش رەت بارشا قونىس اۋدارىلعان ەتنوستاردىڭ راحمەتى رەتىندە 2012 جىلى قيىر شىعىستان كۇشتەپ كوشىرىلگەن كورەيلەردىڭ العاش توقتاعان جەرى ۇشتوبە قالاسىنداعى باستوبە شىڭىندا قازاقستانداعى كورەيلەردىڭ قاۋىمداستىعى تاراپىنان اشىلدى. كەيىنىرەك قازاقستانداعى كورەيلەردىڭ قاۋىمداستىعى باستاماسىمەن مۇنداي مونۋمەنتتەر ورالدا, اتىراۋدا بوي كوتەردى.
«زاماناۋي قازاقستاننىڭ ءوسىپ-وركەندەۋىنە ءاربىر وتانداسىمىز ءوز ۇلەسىن قوستى. مەن ەتنو-مادەني بىرلەستىكتەرگە دە ايرىقشا ريزاشىلىق بىلدىرەمىن. ءبىز, ءبارىمىز بىرگە وتە كۇردەلى, قيلى زامانداردان وتتىك. تاۋەلسىزدىكتىڭ ەڭ تاعدىرشەشتى ساتتەرىندە مەنى ءاردايىم قولداعان حالقىما دا العىس ايتامىن. وتكەن سايلاۋلاردىڭ بارىندە حالقىمىز مەنى ءبىراۋىزدان قولداپ, سايلادى. مەن ءۇشىن ەڭ ۇلكەن ماراپات – وسى. ەلىمنىڭ قولداۋى ماعان جۇمىس بارىسىندا زور كۇش-جىگەر بەردى», دەپ اتاپ وتكەن بولاتىن پرەزيدەنت.
جاڭا الەۋمەتتىك باستامالاردى تانىستىرۋ ساتىندە مەملەكەت باسشىسى ولاردىڭ قوعامداعى الەۋمەتتىك بىرلىكتى نىعايتۋعا, ءاربىر قازاقستاندىقتىڭ ءال-اۋقاتىن جاقسارتۋعا ارنالعانىن اتاپ كورسەتتى.
پرەزيدەنت كوتەرگەن باستامالاردى تالقىلاي وتىرا, قازاقستانداعى كورەيلەر قاۋىمداستىعى مۇشەلەرى ونىڭ ماڭىزدىلىعى مەن وزەكتىلىگىنە توقتالدى. ايتىلعان مىندەتتەر قازىرگى تاڭداعى الەۋمەتتىك ماسەلەلەردى كەشەندى جانە پراگماتيكالىق جولمەن شەشۋگە, ناقتى تاپسىرمالار جۇكتەپ, ناقتى قادامدار جاساۋعا مۇمكىندىك بەرەدى.
سەرگەي وگاي,
قازاقستانداعى كورەيلەر قاۋىمداستىعىنىڭ پرەزيدەنتى
