ءباسپاسوز جيىنىندا ەنەرگەتيكا ۆيتسە-ءمينيسترى پرەزيدەنتتىڭ «ەلدى گازبەن قامتاماسىز ەتۋدى جالعاستىرۋ» دەپ اتالاتىن بەسىنشى باستاماسىن ىسكە اسىرۋ باعىتىنداعى جۇمىستار جايىن باياندادى. ەلباسى قازاقستان حالقىنا ارناعان ۇندەۋىندە ءبىر جارىم جىل ىشىندە, ياعني 2019 جىلدىڭ جەلتوقسان ايىنا دەيىن استانانى, قازاقستاننىڭ ورتالىق جانە سولتۇستىك وڭىرلەرىن گازبەن قامتاماسىز ەتۋ ماقساتىندا «قىزىلوردا – جەزقازعان – قاراعاندى – تەمىرتاۋ – استانا» باعىتى بويىنشا «سارىارقا» ماگيسترالدى گاز قۇبىرىنىڭ قۇرىلىسى جوباسىن جۇزەگە اسىرۋدى تاپسىرعان بولاتىن.
ءمالىم بولعانداي, «سارىارقا» ماگيسترالدى گاز قۇبىرى جوباسىنا «قازترانسگاز» اق تەحنيكالىق-ەكونوميكالىق نەگىزدەمە ازىرلەگەن. وعان «مەمساراپتاما» رمك وڭ باعاسىن بەردى, دەيدى ماماندار. جوبانىڭ جالپى قۇنى 370 ملرد تەڭگەنى (ققس-مەن) قۇرايدى. جوبانى كەزەڭ-كەزەڭىمەن ىسكە اسىرۋ كوزدەلگەن.
م.مىرزاعاليەۆتىڭ ايتۋىنشا, بۇگىندە مەملەكەت باسشىسىنىڭ تاپسىرماسىنا سايكەس ۇزىندىعى 1081 شاقىرىم, قۇنى 267 ملرد تەڭگە بولاتىن «قىزىلوردا – جەزقازعان – قاراعاندى – استانا» باعىتى بويىنشا ءبىرىنشى كەزەڭ ازىرلەنىپ جاتىر. گاز قۇبىرىنىڭ وسى ۋچاسكەسى استانا, قاراعاندى, تەمىرتاۋ, جەزقازعان قالالارىنىڭ تۇرعىندارىن جانە ماگيسترالدى گاز قۇبىرى تراسساسى بويىنا جاقىن ورنالاسقان ەلدى مەكەندەردى تابيعي گازبەن قامتاماسىز ەتەتىن بولادى.
«سارىارقا» جوباسىن ىسكە اسىرۋ استانادا اۋاعا كەتەتىن زياندى قالدىقتاردى جىلىنا 36,1 مىڭ تونناعا دەيىن ازايتۋعا مۇمكىندىك بەرەدى. «سارىارقا» ماگيسترالدى گاز قۇبىرىنىڭ قۇرىلىسى بارىسىندا شامامەن 800 جۇمىس ورنى جانە ونى پايدالانۋ كەزەڭىندە 225 جۇمىس ورنى اشىلادى دەپ كوزدەلىپ وتىر. سونىمەن قاتار قاراعاندى, اقمولا وبلىستارى جانە استانا قالاسى اكىمدىكتەرى گاز تاراتۋ جەلىلەرىن جوبالاۋ مەن سالۋ ماسەلەلەرىن پىسىقتاپ جاتىر. وسىلايشا تاراتۋ جەلىلەرىنىڭ ءبىرىنشى كەزەڭى گاز قۇبىرىنىڭ قۇرىلىسى اياقتالىسىمەن 2019 جىلدىڭ جەلتوقسانىندا قوسىلۋعا دايىن بولۋى ءتيىس.
«سارىارقا» گاز قۇبىرىنىڭ ءبىرىنشى بولىگى, ياعني «قىزىلوردا – جەزقازعان – قاراعاندى – تەمىرتاۋ – استانا» باعىتى اعىمداعى جىلدىڭ سوڭىندا اياقتالادى دەگەن جوسپار بار. الايدا وعان دەيىن جەرگىلىكتى اكىمدىكتەر گازدى تاراتۋ جۇيەلەرىن ازىرلەۋى ءتيىس. سوندا عانا كوگىلدىر وتىن تۇتىنۋشىلارعا تاراتىلادى. م.مىرزاعاليەۆتىڭ ايتۋىنشا, گاز قۇبىرى قىزىلوردانىڭ قاراوزەك اۋىلىنان باستاۋ الىپ, الدىمەن استاناعا, سودان سوڭ كوكشەتاۋ مەن پەتروپاۆلعا دەيىن تارتىلادى. «گاز قۇبىرى 2019 جىلدىڭ اياعىنا دەيىن استاناعا جەتەدى. ال ماگيسترال بوس تۇرماۋ ءۇشىن قاراعاندى مەن اقمولا وبلىستارى, سونداي-اق, استانا اكىمدىكتەرى گازدى تاراتۋ جەلىلەرىن جوبالاۋدى تەزدەتۋى كەرەك. ءبىز ارنايى جينالىس وتكىزدىك. وسى سالاداعى جۇمىستار باستالىپ جاتىر. ارينە ءبىراز ۋاقىت قاجەت بولادى. دەگەنمەن گاز ماگيسترالى استاناعا جەتكەندە العاشقى تاراتۋ جۇيەلەرى دايىن بولادى. قالا اكىمى دە ۋادە بەرىپ وتىر. گاز الدىمەن جىلۋ ەلەكتر ستانساسىنا, ودان كەيىن وڭتۇستىك-شىعىس شاعىن اۋدانىنا تارتىلادى», دەدى ۆيتسە-مينيستر.
2014 جىلى ۇكىمەت قازاقستاندى 2015-2030 جىلدارعا دەيىن گازداندىرۋدىڭ باس سحەماسىن بەكىتكەن بولاتىن. وسى سحەماعا سايكەس گازداندىرۋ دەڭگەيىن اعىمداعى 47 پايىزدان 2030 جىلعا قاراي 56 پايىزعا دەيىن جەتكىزۋ كوزدەلىپ وتىر. بۇل 3 ملن ادامدى نەمەسە 1,6 مىڭنان استام ەلدى مەكەندى گازبەن قامتاماسىز ەتۋگە مۇمكىندىك بەرمەك.
دينارا بىتىك,
«ەگەمەن قازاقستان»
