ءراسىمدى اشقان مەملەكەتتىك حاتشى گۇلشارا ابدىقالىقوۆا ەلباسى نۇرسۇلتان نازارباەۆتىڭ قۇتتىقتاۋ ءسوزىن وقىپ بەردى.
«قازاق تەلەۆيزياسىنىڭ حابار تاراتا باستاعانىنا 60 جىل تولۋىمەن قۇتتىقتايمىن. بۇگىندە قوعام ءومىرىنىڭ كۇندەلىكتى تىنىس-تىرشىلىگىن تەلەديدارسىز كوزگە ەلەستەتۋ قيىن. سوندىقتان بۇل – وتاندىق تەلەۆيزيانىڭ مىڭداعان قىزمەتكەرلەرىنىڭ عانا ەمەس, بارشا قازاقستاندىقتاردىڭ ورتاق مەرەيلى مەرەكەسى دەۋگە بولادى. وسى جىلداردا سىزدەر رەسپۋبليكامىزدىڭ كۇردەلى وتكەنى مەن بۇگىنگى تاۋەلسىز قازاقستاننىڭ سان-سالالى جەتىستىكتەرىن, وزەكتى پروبلەمالارىن دەر كەزىندە تاسپاعا ءتۇسىرىپ, وتانىمىزدىڭ بەينەلى شەجىرەسىن جازىپ كەلەسىزدەر. 1958 جىلدىڭ كوكتەمىندە ومىرگە جولداما العان قازاقستان تەلەۆيزياسى بۇگىندە كوپتەگەن تەلەارنالاردان تۇراتىن, مىڭداعان كاسىبي ماماندار ەڭبەك ەتەتىن, ۇزدىك تەحنيكامەن جابدىقتالىپ, جوعارى تەحنولوگيالارعا ارقا سۇيەيتىن اۋقىمدى سالاعا اينالىپ وتىر. سونىڭ ىشىندە 60 جىلدان بەرى كورەرمەننىڭ ۇزدىكسىز كوزايىمى بولىپ كەلە جاتقان قازاق تەلەۆيزياسىنىڭ قارا شاڭىراعى – Qazaqstan ۇلتتىق تەلەارناسىنىڭ الاتىن ورنى ەرەكشە», دەلىنگەن مەملەكەت باسشىسىنىڭ قۇتتىقتاۋ حاتىندا.
2017 جىلدان بەرى جىل سايىن ەكران ۇزدىكتەرىن انىقتاپ, تەلەجۋرناليستەردىڭ كاسىبي دارەجەسىن كوتەرۋگە ارنالعان «تۇمار» سىيلىعى بيىل 14 اتالىم بويىنشا جۇزدەن جۇيرىك شىققان مىقتىلارعا بۇيىردى. ونىڭ ىشىندە قازاق تەلەۆيزياسىنىڭ 60 جىلدىعى مەن استانانىڭ 20 جىلدىعىنا ارنالعان قوس جۇلدە ارنايى مەرەيتويلىق اتالىم بويىنشا تابىس ەتىلدى.
قازاق تەلەۆيزياسىنىڭ 60 جىلدىعى دەمەكشى, اقپارات جانە كوممۋنيكاتسيالار ءمينيسترى داۋرەن اباەۆ قازاق تەلەۆيدەنيەسىنىڭ ارداگەرلەرىن «قازاق تەلەۆيزياسىنا – 60 جىل» ارنايى مەرەيتويلىق مەدالىمەن ماراپاتتاپ, اعا بۋىن ارىپتەستەرگە قۇرمەت كورسەتتى. «وزدەرىڭىز بىلەتىندەي, ەلباسى نۇرسۇلتان نازارباەۆ تەلەۆيزيا سالاسىنىڭ جاڭا تەحنولوگيالىق تالاپتارعا ساي وزگەرۋى مەن دامۋىنا زور كوڭىل ءبولىپ, ۇنەمى قولداۋ ءبىلدىرىپ كەلەدى. بۇل – جاڭا مەديانىڭ الەمدىك تالاپتارعا ساي دامۋىنا ايتارلىقتاي ىقپال ەتۋدە», دەپ ءسوز باستاعان مينيستر ءارى قارايعى لەبىزىن ارداگەرلەرگە باعىتتادى: «الەم زامان تالابىنا ساي وزگەرىپ جاتىر. سوعان سايكەس تەحنولوگيالار دا, اقپارات الماسۋ ادىستەرى دە زاماناۋي ءوز جولىن قالىپتاستىردى. بىراق مۇنىڭ ەشبىرى دە تەلەجۋرناليستيكانىڭ باستى تالابى – ءوز كاسىبىنە دەگەن ادالدىق, كورەرمەن الدىنداعى جاۋاپكەرشىلىك پەن قۇرمەتتى وزگەرتە المايدى», دەي كەلە, تەلەۆيزيا كوريفەيلەرىنە وتاندىق تەلەجۋرناليستيكانىڭ دامۋىنا قوسقان سۇبەلى ۇلەسى مەن كەلەر ۇرپاق كادەسىنە جارار تاعىلىمدى تاجىريبەسى ءۇشىن بارشا تەلەجۋرناليستەر اتىنان العىس ايتتى. قۇتتىقتاۋ سوڭى «تۇمار» ۇلتتىق سىيلىعىن سالتاناتتى تۇردە تاپسىرۋ راسىمىنە ۇلاستى.
بايگە قورىتىندىسى بويىنشا, «تۇماردىڭ» قازاق تەلەۆيزياسىنىڭ 60 جىلدىعىنا ارنالعان ارنايى سىيلىعىمەن «تەلەۆيدەنيەگە قوسقان ۇلەسى ءۇشىن» اتالىمىندا وتاندىق تەلەەكراننىڭ ەرلەر اراسىنان شىققان تۇڭعىش ديكتورى, العاشقى كوممەنتاتور سوۆەت ماسعۇتوۆ ماراپاتتالدى. استانانىڭ 20 جىلدىعىنا وراي تاعايىندالعان «استانا تۋرالى ۇزدىك جوبا» اتالىمىنا KazakhTV ارناسىنىڭ «مەنىڭ استانام» جوباسى لايىق دەپ تانىلدى. سونداي-اق اتالمىش ارنانىڭ «ۇلت قازىناسى» («سوكروۆيششە ناتسي») باعدارلاماسى – «ۇزدىك اعارتۋشىلىق باعدارلاما», «نا ەدينە س پريرودوي» جوباسىنىڭ وپەراتورى ماكسيم لەۆيتين – «ۇزدىك وپەراتورلىق جۇمىس» اتالىمىندا جۇلدەگەر اتاندى. «567» كينوكومپانياسى» تۇسىرگەن رەجيسسەر اسقار ۇزاباەۆتىڭ ورىس تىلىندەگى «تاك موگلو بىت» دەرەكتى ءفيلمى «ۇزدىك دەرەكتى كينو» اتالىمى بويىنشا توپ جارسا, 31 ارنانىڭ «ينفورمبيۋرو» جاڭالىقتار توپتاماسى قاتارىنان 2 جىل بويى «ۇزدىك اقپاراتتىق باعدارلاما» تۇعىرىنان كورىندى. رەجيسسەر قۋانىش ورازالين – «ۇزدىك رەجيسسەرلىك جۇمىس», «حابار» ارناسىنىڭ ءجۋرناليسى اسقار نيازوۆ – «جىلدىڭ ۇزدىك تەلەجۋرناليسى» اتالىمدارىندا «تۇمار» تاعىنىپ, ۇزدىك اتاندى. «جەتىسۋ» ارناسى «ۇزدىك ايماقتىق تەلەارنا» دەپ تاڭدالسا, «استانا» تەلەارناسى تۇسىرگەن «اسىل ارمان» سەريالىنىڭ «ۇزدىك تەلەسەريال» اتالىمىندا باعى جاندى. «تۇماردىڭ» بيىلعى قورىتىندىسى Qazaqstan ۇلتتىق ارناسى ۇجىمى ءۇشىن دە تابىستى بولدى. ۇلتتىق ارنا ءۇش بىردەي اتالىم بويىنشا توپ جاردى. ولار: «مەن – قازاقپىن!» باعدارلاماسى – «ۇزدىك ويىن-ساۋىقتىق جوبا», «قارەكەت» توك-شوۋى – «ۇزدىك الەۋمەتتىك باعدارلاما» اتانسا, «دارا جول» باعدارلاماسىنىڭ جۇرگىزۋشىسى دانا نۇرجىگىت «ۇزدىك تەلەجۇرگىزۋشى» دەپ تانىلدى.
ال «تەلەۆيزيالىق ماۋسىمنىڭ ۇزدىك وقيعاسى» اتالىمى بويىنشا «تۇمار» سىيلىعى «حابار» ارناسىنىڭ «ۇلتتىق مۋزىكالىق جۇلدە» جوباسىنا تابىس ەتىلدى. شىعارماشىلىق ۇجىمعا جۇلدەنى ارنايى تاپسىرعان اقپارات جانە كوممۋنيكاتسيالار ءمينيسترى داۋرەن اسكەربەك ۇلى: ء«بىزدىڭ بۇگىنگى جينالۋ سەبەبىمىز – ەڭ الدىمەن اقپارات سالاسىنىڭ ارداگەرلەرىنە قۇرمەت كورسەتىپ, العىس ءبىلدىرۋ. ەكىنشىدەن, «تۇمار» ۇلتتىق سىيلىعىن تابىستاۋ ارقىلى تەلەجۋرناليستەردىڭ كاسىبي دارەجەسىن كوتەرىپ, ىنتالاندىرۋ. قازاق كوز تيمەسىن, سۇرىنبەسىن دەگەن نيەتتە جۇيرىگىنە تۇمار تاققان. «جۇيرىككە – تۇمار» دەگەن جاقسى ءسوز وسىدان شىققان. ءبىز دە ىرىمنان اتتاماي, «تەلەۆيزيا سالاسىندا جۇرگەن جۇيرىكتەرىمىز سۇرىنبەسىن, ءاردايىم بيىكتەن كورىنسىن» دەگەن تىلەكتە «تۇماردى» تاعايىنداعان ەدىك. بۇگىن اعا بۋىن مەن جاستاردىڭ باس قوسقان ەرەكشە كەشىنە كۋا بولىپ وتىرمىز. ارداگەرلەرىمىزدىڭ ۇزاق جىلعى كاسىبي تاجىريبەسى مەن جاستاردىڭ بويىنداعى وتتى جىگەر – وتاندىق تەلەۆيزيامىزدىڭ كەلەشەگىن كەمەل ەتەتىنىنە سەنىمىم زور», دەپ ماراپاتتاۋ كەشىن تۇيىندەدى.
ايتا كەتەيىك, 2018 جىلى «تۇمار» ۇلتتىق سىيلىعىنا ۇمىتكەر رەتىندە بارلىعى 397 جۇمىس كەلىپ ءتۇستى. سونىڭ اراسىنان قازىلار القاسىنىڭ شەشىمىمەن بايگە ەرەجەسىنىڭ تالاپتارىنا سايكەس راسىمدەلگەن 355 ءوتىنىم قاراۋعا قابىلداندى. جوعارىدا اتاپ وتكەنىمىزدەي, 400-گە تارتا جۇمىستىڭ ىشىنەن توپ جارعان ۇزدىك جوبالار مەن جۋرناليستەر 14 اتالىم بويىنشا «تۇمار» سىيلىعىنا يە بولدى.
نازەركە جۇماباي,
«ەگەمەن قازاقستان»
سۋرەتتەردى تۇسىرگەن ورىنباي بالمۇرات,
«ەگەمەن قازاقستان»
