– الەۋمەتتىك قورعاۋدى تالاپ ەتەتىن تۇرعىندار توبىنىڭ ءبىزدىڭ تاراپىمىزدان ارقاشان دا جىلىلىق كۇتۋى تابيعي زاڭدىلىق, ويتكەنى, ءبىزدىڭ كاسىبي مەكەمەنىڭ اتقاراتىن قىزمەت ولشەمى ولارعا تەك قانا لايىقتى قولعابىس كورسەتۋ, جاردەم بەرۋ ساپاسىمەن باعالانادى, – دەيدى اۋەزوۆ اۋداندىق مەملەكەتتىك زەينەتاقى تولەۋ ورتالىعىنىڭ باسشىسى ءاليا دۇيسەبايقىزى ماقۇلباەۆا. – جىل باسى ناۋرىز مەرەكەسىنىڭ قارساڭىندا ءبىزدىڭ ۇجىمنىڭ ادەتتەگى ەڭبەك ىرعاعىن ەسەلەپ, جىل بويى جاڭاشا لەپپەن ەڭبەك ەتۋى دە سوندىقتان.
كۇن مەن ءتۇن تەڭەسەتىن ايتۋلى جىل مەزەتىندە, تابيعات-انامىزدىڭ ەمىرەنىپ مەيىرىمىن شاشىپ جاتقان ساتىندە ءاليا مەن ونىڭ ارىپتەستەرى مەكەمەگە ۇمىتپەن باس سۇققان بارلىق جانعا جىلى قاباق تانىتىپ, ارقايسىسىمەن جايلى سويلەسۋگە بەيىم. الماتى قالاسىنىڭ اۋەزوۆ اۋدانىندا ورنالاسقان بۇل ورتالىق ءدال بۇگىن قالا اۋماعىنداعى ەڭ كوپ سانالاتىن 50 مىڭعا جۋىق ادامعا جىل بويى ۋاقىتپەن ساناسپاي قالتقىسىز قىزمەت كورسەتەدى. جىل سايىن سانى ۇلعايىپ, قاتارى ءوسىپ, قوسىلىپ جاتقان الەۋمەتتىك توپقا مەملەكەت تاراپىنان كورسەتىلەتىن كومەك قورى ودان دا مولايىپ, ارتا تۇسۋدە. مەملەكەت تاراپىنان بەرىلەتىن جەڭىلدىكتەر مەن جاردەماقىلاردى جاڭادان قابىلدانىپ, وزگەرىپ, تولىقتىرىلىپ جاتقان زاڭ تالاپتارىنا ساي رەتتەپ-رەسىمدەپ, قاتتاپ-قۇجاتتاپ, يەسىنە تاپ-تۇينەاقتاي ەتىپ تابىستاۋ – ءاليا مەن ونىڭ ارىپتەستەرىنىڭ قولىندا. ۇجىم قۇرامىندا نەگىزىنەن 37 قىز-كەلىنشەك قىزمەت اتقارادى. ولاردىڭ ورتا جاسى – 25!
بار قىزمەت تىكەلەي كومپيۋتەرلىك جۇيە, ينتەرنەتتىك جەلى ارقىلى جۇزەگە اسادى. بۇل ارادا ارحيۆپەن جۇمىس ىستەۋ ءىسى دە اسقان بىلىكتىلىك پەن تاباندىلىقتى تالاپ ەتەتىنىن دە اتاپ وتكەن ءجون. ورتالىققا باس سۇعاتىن الەۋمەتتىك توپتار ساناتىنداعى, اتاپ ايتقاندا – زەينەت جاسىنا جەتكەن جانە زەينەت جاسىنداعى ازاماتتار, ەكىقابات ايەلدەر, ءارتۇرلى مۇگەدەكتىك توپتاعى قالا تۇرعىندارى توبىندا ەشۋاقىتتا شەك بولعان ەمەس. ءاليا ماقۇلباەۆا باسقارعان ۇجىمنىڭ باستى ۇستانىمى – مەكەمە ەسىگىن اشقان ءبىر دە ءبىر ادامنىڭ كوڭىلىنە تيتتەي دە قاياۋ تۇسپەۋى ءتيىس. ء«بىز حالىققا ءاردايىم دا لايىقتى قىزمەت ۇلگىسىن كورسەتەمىز!»
...جاپ-جاس ۇجىمنىڭ جىلدىڭ كوكتەم ايىنداعى وسى مەرزىمىن مارە سىزىعىنداي ەتىپ تاڭداپ الۋى –ولاردىڭ تىكەلەي ەرەكشە كاسىبي قىزمەتتەرىنە بايلانىستى. شۋاق شاشقان ناۋرىز كۇندەرى بۇل مەكەمەگە باس سۇققان الەۋمەتتىك توپتاعى ءاربىر جان ونەگەلى قىزمەت ۇلگىسىن كورىپ, جۇرەگىنە مەيىرىم ۇيالاتسا ەكەن, دەيدى ولار.
تالعات ءسۇيىنباي,
«ەگەمەن قازاقستان»
سۋرەتتەردى تۇسىرگەن نۇرمانبەت قيزات ۇلى
الماتى
