- مارجان باقىتقىزى, ءوزىڭىز جەتەكشىلىك ەتەتىن «جاس وتان» جاستار قاناتى العاشقىلاردىڭ قاتارىندا ءۇن قاتىپ, جۇرتشىلىقتى قايىرىمدىلىق كومەك جاساۋعا شاقىردىڭىزدار. گۋمانيتارلىق كومەك جيناۋ قالاي جۇرگىزىلىپ جاتىر؟
- وسكەمەندە گۋمانيتارلىق بەكەت اشىلعان 12 ناۋرىزدان بەرى جان-جاقتان حابارلاسىپ, كومەك قولىن سوزۋعا نيەت ءبىلدىرىپ جاتقان جاندار از ەمەس. قىزمەتتەگى ازاماتتاردان باستاپ قاراپايىم ادامدار دا جان-جاقتان حابارلاسىپ جاتىر. ءتىپتى تۇنگى ساعات ۇشتە اقتاۋ قالاسىنان ءبىر اپامىز: «نە بولىپ جاتىرسىڭدار؟ امانسىڭدار ما؟» دەپ تەلەفون شالدى, ەرتەسىندە كومەك رەتىندە اقشا سالىپ جىبەرىپتى. 5 كەلى مايىن, 10 كەلى روشكيىن اكەپ جاتقان قاراپايىم تۇرعىندار دا بار. شىن مانىندە, ەلىمىزدىڭ ىنتىماق-بىرلىگى وسىندايدا كورىنەدى ەكەن. ءبىز قازىر نەگىزىنەن قۇرىلىس ماتەريالدارى, جىلى كيىمدەر, بۇزىلمايتىن تاعامدار, جەكە گيگيەنالىق زاتتار مەن كەڭسە تاۋارلارىن قابىلداپ جاتىرمىز. 4-5 كۇن كولەمىندە جينالعان دۇنيەلەردىڭ العاشقى لەگىن 17 ناۋرىز كۇنى كاماز كولىگىمەن اياگوزگە جونەلتتىك. ناقتىراق ايتساق, 11 توننا ۇن, 10 توننا كارتوپ, 6 توننا قاراقۇمىق, 2 توننا كۇنباعىس مايى, 3 توننا ماكارون ونىمدەرى مەن شارۋاشىلىق تاۋارلارى تاسقىننان زارداپ شەككەن تۇرعىندارعا جىبەرىلدى.
- قايىرىمدىلىق شاراسىنا بەلسەندى اتسالىسقان ازاماتتار مەن مەكەمەلەر جونىندە ايتىپ وتسەڭىز.
- جالپى العاندا, وبلىس تۇرعىندارىنىڭ كوپشىلىگى اياگوزدەگى جاعدايعا بەي-جاي قاراعان جوق. قولدان كەلگەن كومەكتەرىن كورسەتىپ جاتىر. وسكەمەننىڭ وزىنە كەلسەك, شاھارداعى «مارات م» جشس, «كسەدو» جشس, «شىعىساگروحولدينگ» جشس, «شىعىسسۇت» جشس, «شىعىس تاڭى» بازارى, تۋبەركۋلەزگە قارسى وبلىستىق ديسپانسەر مەن وبلىستىق بالالار مەن جاسوسپىرىمدەر كىتاپحاناسى ۇجىمى مەن ەرجان نۇرباەۆ, لۇقبەك تۇماشينوۆ, ءاليا دوسىباەۆا, سەيىلجان سايلاۋباەۆ سىندى وبلىستىق جانە قالالىق ءماسليحات دەپتۋتاتتارى ىزگى ىسكە ەرەكشە قولداۋ كورسەتتى. «جاقسىنىڭ جاقسىلىعىن ايت نۇرى تاسىسىن» دەمەكشى, وبلىستىق ءماسليحات دەپۋتاتى لۇقبەك تۇماشينوۆتىڭ 15 توننا قۇرىلىس ماتەريالدارىن, ەرجان نۇرباەۆتىڭ 2 توننا ۇن بەرگەنىن ايتپاي كەتۋگە بولماس. وسكەمەندەگىدەي گۋمانيتارلىق بەكەت وبلىستىڭ بىرقاتار قالا-اۋداندارىندا دا اشىلىپ, سەمەي مەن ريددەر قالالارىنان, شەمونايحا, كاتونقاراعاي, اباي, گلۋبوكوە اۋداندارىنان اياگوزگە گۋمانيتارلىق كومەك جونەلتىلدى. بۇلار – ازىرگە سۋ تاسقىنى قاۋپى جوق اۋداندار. ال ەندى وزدەرى دە سۋ تاسقىنىمەن الىسىپ جاتقان اۋدانداردى «كومەكتەسىڭدەر» دەپ قيناعان جوقپىز. «نۇر وتان» پارتياسىنىڭ ءوڭىردىڭ قالا-اۋداندارىنداعى بۇكىل فيليالدارى ءبىر كۇندىك جالاقىلارىن اۋدارعانىن دا اتاپ وتۋگە بولادى. «جاس وتان» جاستار قاناتىنىڭ باسقا وبلىستاعى فيليالدارىنىڭ جەتەكشىلەرى, ءوزىمنىڭ ارىپتەستەرىمە ەرەكشە العىسىمدى بىلدىرگىم كەلەدى. ءبىر-ەكى كۇندە پاۆلودار, اقتوبە, اتىراۋ, باتىس قازاقستان, قىزىلوردا وبلىستارىنان گۋمانيتارلىق كومەك كەرۋەنى كەلۋگە ءتيىس.
- بۇل شارا ءالى دە جالعاسىپ جاتقان بولار.
- ءيا, جالعاسىن تابادى. ويتكەنى, وڭىردە قار ءالى تولىق كەتكەن جوق. تاسقىن قاۋپى ءالى دە بار. سوندىقتان وبلىستىڭ قاي جەرىنە جاردەم كەرەك بولادى, سونىڭ بارىنە مۇمكىندىگىنشە كومەك قولىن سوزۋعا تىرىسامىز. اياگوزگە كۇندەلىكتى حابارلاسىپ, تۇرعىندارعا نە قاجەتتىگىن سۇراپ-ءبىلىپ وتىرمىز. ءدال قازىرگى ۋاقىتتا ولارعا ءبىرىنشى كەزەكتە توسەك جابدىقتارى كەرەك. ويتكەنى, سۋ استىندا قالىپ قويعانى بەلگىلى. «جاس وتاننىڭ» وسكەمەن قالاسىنداعى بەلسەندىلەرى تەك گۋمانيتارلىق كومەكپەن شەكتەلمەي, ارىقتاردى تازارتىپ, جەر ۇيدە تۇراتىن جالعىز باستى قارت ادامداردىڭ اۋلاسىنداعى قاردى سىرتقا شىعارۋعا دا كومەكتەسىپ جاتىر.
رەتى كەلگەندە ايتا كەتەيىن, قازىرگى ۋاقىتتا رەسپۋبليكانىڭ 9 وڭىرىندە 17 گۋمانيتارلىق كومەك بەكەتى اشىلعان. ونىڭ بەسەۋى - شىعىس قازاقستاندا. سونىمەن قاتار وڭىردەگى مەشىت قىزمەتكەرلەرى «شىعىستىڭ اسارى» اتتى شارانى قولعا الىپ جاتقانىن دا اتاپ وتۋگە بولادى.
- Cۇحباتىڭىزعا العىس بىلدىرەمىز.
اڭگىمەلەسكەن ازامات قاسىم,
«ەگەمەن قازاقستان»
وسكەمەن
