قازاقستاندا ءاليا نازارباەۆانىڭ «جاندانۋ الەمى» قورىنىڭ بىرەگەي جوباسى ۇلتتىق «بالا داۋىسى» بالالار ءان بايقاۋىنىڭ ءۇشىنشى ماۋسىمى ءوز باستاۋىن الدى. ەلىمىزدەگى بالالار اراسىندا وتەتىن ەڭ اۋقىمدى ءان بايقاۋىن وسى جىلى قازاقستان رەسپۋبليكاسىنىڭ تۇڭعىش پرەزيدەنتى-ەلباسىنىڭ قورى, قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولدادى.
«بايقاۋدىڭ نەگىزگى ماقساتى – مۋزىكالىق جانە شىعارماشىلىق دارىنى بار بالالاردى انىقتاۋ جانە ولارعا قولداۋ كورسەتۋ, ولاردىڭ شىعارماشىلىق الەۋەتىن جۇزەگە اسىرۋعا جانە بولاشاقتا ولاردىڭ قابىلەتتەرىن دامىتۋعا كومەكتەسۋ», - دەيدى ۇيىمداستىرۋشىلار.
بالالار ءان بايقاۋىنا قاتىسۋعا ءوتىنىمدى 15 ناۋرىز بەن 15 ءساۋىر ارالىعىندا تۇسىرۋگە بولادى. ەلىمىزدىڭ شالعاي اۋداندارىندا تۇراتىن بالالاردى قامتۋ ماقساتىندا بايقاۋدىڭ www.notka.kz رەسمي سايتىندا ونلاين-ىرىكتەۋ وتەدى.
«بايقاۋعا 8-12 جاس ارالىعىنداعى بالالار دايىندىق دەڭگەيىنە قاراماستان, قاتىسا الادى. 18 ەڭ ۇزدىك بالا عانا بايقاۋدىڭ سۋپەر فينالىنا جولداما الادى.
كۇزدە ەلىمىزدىڭ ۇزدىك 18 داۋىسى «جۇلدىزدى ارمان ۇيىندە», الاتاۋدىڭ باۋرايىندا ورنالاسقان «بوبەك» ۇلتتىق ورتالىعىندا باس قوسادى. كۇندەلىكتى, كاسىبي مۋزىكانتتار, حورەوگرافتار, ستيليستەر بالالاردى سۋپەر-فينالدىڭ تەلەۆيزيالىق تۇسىرىلىمدەرىنە دايىندايدى», - دەلىنگەن تاراتىلعان حابارلامادا.
ال 27 قازان مەن 8 جەلتوقسان ارالىعىنداعى ءار سەنبى سايىن بۇكىل ەل ءوز سۇيىكتى قاتىسۋشىسىنا داۋىس بەرە الادى.
بايقاۋدىڭ بارلىق كەزەڭدەرىن كاسىبي قازىلار القاسى جانە سمس-داۋىس بەرۋ ارقىلى تەلەكورەرمەندەر باعالايدى.
بارلىق فيناليستتەر ارنايى سىيلىقپەن ماراپاتتالسا, ەڭ ۇزدىك دەپ تانىلعان «بالا داۋىسى» ەلىمىزدىڭ تاڭداۋلى مۋزىكالىق ءبىلىم ورداسىندا وقۋعا گرانتتى, ەرتەگى الەمى ديسنەيلەندكە ساياحات جولداماسىن يەلەنەدى.
«بالا داۋىسى» بايقاۋىنىڭ سۋپەر-فينالى 8 جەلتوقساندا استانا قالاسىنىڭ «قازاقستان» ورتالىق كونتسەرت زالىندا وتەدى.
