سۋرەتتى تۇسىرگەن ورىنباي بالمۇرات
گۇلشارا ابدىقالىقوۆا ۇلتتىق تەلەۆيزيا سىيلىعىن تاپسىرۋ ءراسىمىن اشىپ, قازاقستان رەسپۋبليكاسى پرەزيدەنتى نۇرسۇلتان نازارباەۆتىڭ قۇتتىقتاۋ ءسوزىن وقىپ بەردى.
قۇتتىقتاۋدا 1958 جىلدىڭ كوكتەمىندە جۇمىسىن باستاعان قازاق تەلەۆيزياسىنىڭ بۇگىندە جوعارى تەحنولوگيالارعا ارقا سۇيەيتىن اۋقىمدى سالاعا اينالىپ وتىرعانى ايتىلعان. ول ۇزدىك تەحنيكامەن جابدىقتالعان تەلەارنالاردى قامتيدى جانە بۇل سالادا مىڭداعان كاسىبي ماماندار ەڭبەك ەتۋدە. اسىرەسە قازاق تەلەۆيزياسىنىڭ قارا شاڭىراعى – «قازاقستان» ۇلتتىق تەلەارناسىنىڭ الاتىن ورنى ەرەكشە.
«مەملەكەت قازاق تەلەۆيزياسىنىڭ زامان تالابىنا ساي دامۋى ءۇشىن بارلىق مۇمكىندىكتەردى جاساۋدا. تمد اۋماعىندا بالاماسى جوق «قازمەديا ورتالىعى» – وسىنىڭ ايقىن دالەلى», – دەلىنگەن قۇتتىقتاۋ حاتتا.
ەلباسىنىڭ قۇتتىقتاۋى وقىلعاننان كەيىن «تۇمار» تەلەۆيزيالىق سىيلىعىن تاپسىرۋعا ارنالعان سالتاناتتى ءراسىم ءوتتى.
ءىس-شارا بارىسىندا مەملەكەتتىك حاتشى قازاق تەلەۆيدەنيەسىنىڭ قۇرىلۋ تاريحىنا جانە قازاق تەلەۆيدەنيەسىنىڭ 60 جىلدىق مەرەيتويىنا ارنالعان كورمەنى ارالاپ كوردى.
شاراعا پارلامەنت دەپۋتاتتارى, مەملەكەتتىك ورگاندار باسشىلارى, قوعام قايراتكەرلەرى, تەلەۆيزيا سالاسىنىڭ ارداگەرلەرى, رەسپۋبليكالىق تەلەارنالار مەن باق وكىلدەرى قاتىستى.
***
«تۇمار» سىيلىعى 2017 جىلى تاعايىندالدى. ول تەلەۆيزيا ونەرى سالاسىنداعى جوعارى جەتىستىكتەر ءۇشىن بەرىلەدى جانە قازاقستان تەلەۆيزياسىنىڭ ساپاسىن ارتتىرۋعا, دارىندى كاسىبي مامانداردى قولداۋعا ارنالعان.
2018 جىلى وسى سىيلىققا ۇسىنىلعان جۇمىستار 14 نوميناتسيا بويىنشا قابىلداندى. استانانىڭ 20 جىلدىق مەرەيتويى مەن قازاق تەلەۆيزياسىنىڭ 60 جىلدىعىنا ارنالعان نوميناتسيالار دا بار.
كونكۋرسقا بارلىعى 400-گە جۋىق ءوتىنىم ۇسىنىلعان. ولاردىڭ سانى وتكەن جىلمەن سالىستىرعاندا 1,6 ەسە ارتقان.
